„ფასადზე სარემონტო სამუშაოები 2008 წელს ჩატარდა“ - „სახელმწიფო ელექტროსისტემა“ ბარათაშვილზე მომხდარ ტრაგედიას ეხმაურება

2018-02-28 18:49:37, 2416 ნახვა

საზოგადოება

„საქართველოს სახელმწიფო ელექტროსისტემა“ ბარათაშვილის ქუჩაზე, მინის კონსტრუქციის ნაწილის ჩამოვარდნის ფაქტს ეხმაურება, რის შედეგადაც 1 მოზარდი დაიღუპა, 5 კი, დაშავდა.

როგორც განცხადებაშია აღნიშნული, შენობის მოსაპირკეთებელი სამუშაოები განხორციელდა 2008 წელს და ამჟამად არანაირი სარემონტო სამუშაოები არც ფასადზე და არც შენობაში არ მიმდინარეობდა.

ამასთან, სახელმწიფო ელექსტროსისტემა გარდაცვლილი მოზარდის ოჯახს სამძიმარს უცხადებს.

„დღეს, 28 თებერვალს, დაახლოებით დღის 15:30- ზე, სს „საქართველოს სახელმწიფო ელექტროსისტემის“ შენობის გარე ფასადიდან ჩამოვარდა მინის კონსტრუქციის ნაწილი, რის შედეგადაც დაშავდნენ მოზარდები, რომლებიც მომხდარისთანავე გადაიყვანეს საავადმყოფოში.

სამწუხაროდ, ერთ-ერთი მათგანი, ასლან მამედოვი, საავადმყოფოში გარდაიცვალა. ჩვენ სამძიმარს ვუცხადებთ გარდაცვლილი მოზარდის ოჯახს და ახლობლებს. სიტყვები უძლურია ამ უდიდესი ტრაგედიის და ტკივილის გამოსახატავად. ამ მძიმე წუთებში ვდგავართ ოჯახის გვერდით. უსაფრთხოების მიზნით, შემთხვევის ადგილის პერიმეტრი შემოღობილია. შენობის მოსაპირკეთებელი სამუშაოები განხორციელდა 2008 წელს და ამჟამად არანაირი სარემონტო სამუშაოები არც ფასადზე და არც შენობაში არ მიმდინარეობდა. მიზეზების დასადგენად სამხარაულის ექსპერტიზა აწარმოებს მოკვლევას. მომხდარზე დაწყებულია საგამოძიებო მოქმედებები. ვთანამშრომლობთ სამართალდამცავ სტრუქტურებთან და ველოდებით გამოძიების შედეგებს“, - ნათქვამია „სახელმწიფო ელექტროსისტემის“ განცხადებაში.

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები