საქართველოს თავდაცვის მინისტრმა თინა ხიდაშელმა ქართველ ხალხს დამოუკიდებლობის დღე ავღანეთიდან მიულოცა. 

„პრეზიდენტო, თქვენო უწმინდესობავ, პრემიერო, პარლამენტის თავჯდომარევ, გენერალო, ოფიცრებო, სერჟანტებო, კაპრალებო , მოწვეულო სტუმრებო, ყველა სამოქალაქო და სამხედრო პირს გილოცავთ საქართველოს დამოუკიდებლობის დღეს, 26 მაისს.  ზუსტად 1 საუკუნის წინ, საქართველოს დამოუკიდებლობის აქტში ჩაიწერა შემდეგი სიტყვები, „ამიერიდან საქართველოს ხალხი სუვერენულ უფლებათა მატარებელია და საქართველო სრულუფლებიანი, დამოუკიდებელი სახელმწიფოა“.  ეს არ არის უბრალოდ სიტყვები, ეს არის იდეა, რომელიც გაცილებით უფრო მეტია, ვიდრე ერთ კონკრეტულ დოკუმენტში ჩაწერილი რომელიმე ფრაზა, ეს არის იდეა სუვერენიტეტის, დამოუკიდებლობის, ჩვენი თავისუფლების იდეა, რომლის გამოც იბრძოდნენ თაობები, რომელსაც ეწირებოდნენ თაობები, რომლისთვისაც ქართველები შრომობდნენ და იმარჯვებდნენ  მრავალი საუკუნის განმავლობაში.  სწორედ ჩვენი ქვეყნის სუვერენიტეტის და თავისუფლების სურვილი ერთ მუშტად კრავს ქართველ ხალხს, ქართულ სახელმწიფოს. საქართველოს დღევანდელი თაობა ღირსეული შვილია იმ წინაპრის, რომელიც საუკუნეების მანძილზე იბრძოდა სახელმწიფოებრიობის შენარჩუნების და თავისუფლების განმტკიცებისთვის“, – განაცხადა თინა ხიდაშელმა. 

მისნისტრის მტკიცებით, საქართველოს დღევანდელი ხელისუფლება ყველაფერს აკეთებს იმისთვის, რომ მომავალი თაობის ღირსეული წინაპარი გახდეს.

ამასთან, მისივე თქმით, საქართველოს ხელისუფლების ვალდებულებაა, ახსოვდეს გმირები, რომლებმაც საქართველოს თავისუფლებას თავი შესწირეს.    

„ პირადად ჩემი და სრულიად საქართველოს ხელისუფლების ვალდებულებაა, გვახსოვდეს ჩვენი გმირები, რომლებმაც თავი შესწირეს ჩვენი ქვეყნის თავისუფლებას, მსოფლიო უსაფრთხოებას და ჩვენი ქვეყნის ეროვნულ ინტერესებს.  ჩვენი თაობის ვალია ყველაფერი გავაკეთოთ მათი ხსოვნის უკვდავსაყოფად.  საქართველოს ღირსება, ერთგულება, ეს არის ყველა  ჩვენგანის ვალი, ყველა  ჩვენგანის ყოველდღიურობა, ცხოვრების შემადგენელი ნაწილი“, – აღნიშნა თავდაცვის მინისტრმა. 

ხიდაშელის განცხადებით, ის ქართველ ჯარისკაცებს ავღანეთიდან, ანუ იმ ადგილიდან ულოცავს 26 მაისს, სადაც საქართველო ცივილიზებულ სამყაროსთან ერთად მსოფლიო უსაფრთხოებისა და დამოუკიდებლობისთვის იბრძვის. 

„განსაკუთრებით დღეს მინდა მივულოცო ქართველ ჯარისკაცებს ავღანეთიდან საქართველოს დამოუკიდებლობის დღე, იმ წერტილიდან სადაც ყველაზე უფრო მეტად უჭირს მსოფლიოს და სადაც უფრო კარგად ვამტკიცებთ, რომ ჩვენ ყველანი ერთად, მთელი საქართველო  ცივილიზებულ სამყაროსთან ერთად ვიბრძვით მსოფლიო უსაფრთხოების და დამოუკიდებლობისთვის.  კიდევ ერთხელ გილოცავთ დამოუკიდებლობის დღეს და ყველა ერთად ვემსახუროთ საქართველოს“, – განაცხადა თინა ხიდაშელმა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

იტალიის პრემიერ-მინისტრი პუტინის G20-ის სამიტზე მიწვევას ეწინააღმდეგება

მედია: ტრამპმა პაკისტანში ირანთან მოსალაპარაკებლად აშშ-ს დელეგაცია არ გაგზავნა

სუს: დავაკავეთ სუს-ის ყოფილი და შსს-ს მოქმედი თანამშრომელი, ბრალი ედება სუს-დან საიდუმლო ინფორმაციის გატანაში

ირაკლი [დაჩი] ბერაია აუდიტის სამსახურის უფროსის პირველ მოადგილედ დაინიშნა