2015-01-15 15:38:23, 357 ნახვა

---

არასამთავრობოებმა პრეზიდენტს უზენაესი სასამართლოს თავმჯდომარეობის კანდიდატთან დაკავშირებით საკონსულტაციო ორგანოს შექმნა შესთავაზეს

საქართველოს  პრეზიდენტ გიორგი მარგველაშვილსა და არასამთავრობო ორგანიზაციების წარმომადგენლებს შორის  შეხვედრა დასრულდა.

არასამთავრობო ორგანიზაციებმა  პრეზიდენტს უზენაესი  სასამართლოს კანდიდატთან დაკავშირებით, საკონსულტაციო  ორგანოს, მრჩეველთა საბჭოს შექმნა შესთავაზეს.

როგორც ახალგაზრდა იურისტთა ასოციაციის თავმჯდომარემ ანა ნაცვლიშვილმა ჟურნალისტებს განუცხადა, საკონსულტაციო ორგანო უზენაესი  სასამართლოს თავმჯდომარეობის  კანდიდატების  გასულ საქმიანობას შეისწავლის და მათ კრიტერიუმებთან  შესაბამისობას  შეაფასებს.

მისივე განმარტებით, პრეზიდენტთან  დღევანდელ შეხვედრაზე უზენაესი  სასამართლოს თავმჯდომარეობის  პოტენციურ კანდიდატებზე  არ უსაუბრიათ. არასამთავრობო ორგანიზაციებმა პრეზიდენტს საკუთარი ხედვა წარუდგინეს, თუ რა კრიტერიუმებს  უნდა აკმაყოფილებდეს უზენაესი სასამართლოს თავმჯდომარე.

„დღევანდელი შეხვედრა არ იყო კონკრეტულ სახელებთან და გვარებთან დაკავშირებული, არ გვისაუბრია პოტენციურ კანდიდატებზე.  ჩვენი ხედვა წარვუდგინეთ  პრეზიდენტს, თუ რა კრიტერიუმებს უნდა აკმაყოფილებდეს უზენაესი სასამართლოს თავმჯდომარე და რა პროცედურის მეშვეობით უნდა მოხდეს ამ კანდიდატის გამოვლენა და პარლამეტისთვის წარდგენა. ჩვენ პრეზიდენტს კონკრეტული მოდელი შევთავაზეთ. უნდა შეიქმნას საკონსულტაციო ორგანო, მრჩეველთა საბჭო, რომელიც კანდიდატების გასულ საქმიანობას შეისწავლის და ამ კანდიდატების კრიტერიუმებთან  შესაბამისობას  შეაფასებს. ასევე, პრეზიდენტს მიმართავს  კონკრეტულ კანდიდატებზე,  თავისი რეკომენდაციებით.  თუ კი პრეზიდენტი მიზანშეწონილად  მიიჩნევს ასეთი ორგანოს შექმნას, კონკრეტული კრიტერიუმების ჩამოყალიბებაა საჭირო, რადგან დღევანდელ კანონმდებლობაში ძალიან ცოტა კრიტერიუმია დადგენილი და უზენაესი სასამართლოს თავმჯდომარე ძალიან მაღალი პოზიციაა“,-განაცხადა ანა ნაცვლიშვილმა.

ამასთან, „საერთაშორო გამჭვირვალობა-საქართველოს“ აღმასრულებელი დირექტორის ეკა გიგაურის განცხდებით, ისინი  უზენაესი სასამართლოს თავმჯდომარეობის კონკრეტულ კანდიდატზე ჩამოყალიბებული არ არიან.

გიგაურის განმარტებით, კანდიდატის წარდგენა კონსენსუსის  შედეგად უნდა მოხდეს.
ამასთან, გიგაურის თქმით, იკვეთება  ინტერესთა კონფლიქტიც, რადგან მათ პროცესის მონიტორინგის განხორციელებაც სურთ.

შესაბამისად, გიგაურის განცხადებით,თუკი ისინი კანდიდატს წარადგენენ, მაშინ შეიძლება მიკერძოებულები იყვნენ იმ საკითხში, რასაც პროცესის მონიტორინგი ჰქვია.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი