„დაუყოვნებლივ უნდა დაუწესდეთ სანქციები ივანიშვილს, კობახიძეს“ - 17 ამერიკელი ყოფილი დიპლომატი ერთობლივ განცხადებას ავრცელებს

2024-12-04 12:50:09, 474 ნახვა

პოლიტიკა

დაუყოვნებლივ და საჯაროდ უნდა დაუწესდეთ სანქციები ბიძინა ივანიშვილს, პრემიერ-მინისტრ ირაკლი კობახიძესა და მთავრობის სხვა წევრებს, რომლებიც ავტორიტარულ ქცევაში არიან ჩართულები,- ამის შესახებ ნათქვამია ერთობლივ განცხადებაში, რომელსაც ხელს 17 ამერიკელი ყოფილი დიპლომატი და ექსპერტი აწერს.

როგორც ერთობლივ განცხადებაშია აღნიშნული, სანქციები უნდა შეეხოთ პოლიციელებს და სამხედრო ოფიცრებს, რომლებიც „მონაწილეობდნენ მშვიდობიანი მომიტინგეების დარბევაში და საპარლამენტო არჩევნების ჩატარებისას ხრიკების მოწყობაში“.

"ჩვენ, საქართველოს მეგობრები, მათ შორის, ყოფილი ამერიკელი დიპლომატები, რომლებიც მსახურობდნენ საქართველოში ან/და მუშაობდნენ ქართულ-ამერიკულ ურთიერთობებზე, საქართველოს მთავრობის მიერ თბილისში მშვიდობიანი დემონსტრანტების წინააღმდეგ განხორციელებულ ძალადობას მკაცრად ვგმობთ. ჩვენ ასევე გვიჭირს საქართველოს ხელისუფლების გადაწყვეტილების გაგება, შეაჩერონ ევროკავშირთან მოლაპარაკებები ქვეყნის გაწევრიანებასთან დაკავშირებით, რომელსაც ხელმძღვანელობენ „ქართული ოცნების“ დე ფაქტო ლიდერი ბიძინა ივანიშვილი და პრემიერ-მინისტრი ირაკლი კობახიძე. სწორედ ამ გადაწყვეტილებამ, რომელიც რუსეთის ლიდერმა, ვლადიმერ პუტინმა გამოცხადებიდან რამდენიმე წუთში შეაქო, ათიათასობით ქართველის დემონსტრაციები გამოიწვია.

მას შემდეგ, რაც ევროკავშირმა გასული წლის დეკემბერში გადაწყვიტა, შესთავაზოს საქართველოს კანდიდატის სტატუსი, „ქართული ოცნების“ მთავრობამ და პარლამენტმა გადადგა მნიშვნელოვანი ნაბიჯები არასწორი მიმართულებით...

ბოლო სამი ათწლეულის განმავლობაში შეერთებულმა შტატებმა 6,5 მილიარდ დოლარზე მეტი დახმარება გაუწია საქართველოს. შეერთებული შტატები დამოუკიდებლობის დღიდან მხარს უჭერს საქართველოში დემოკრატიისა და საბაზრო ეკონომიკის განვითარებას. საქართველო გახდა რეფორმების ერთ-ერთი ლიდერი ფართო რეგიონის ქვეყნებს შორის, რაც ასახავს ქართველი ხალხის ნებას. ქართველების აბსოლუტური უმრავლესობა არის ძალიან პროამერიკელი და პროევროპელი და მათ სურთ ევროკავშირსა და ნატოში გაწევრიანება.

ეს აშკარად კრიტიკული მომენტია საქართველოს ისტორიაში, რომელიც გავლენას ახდენს სამხრეთ კავკასიაზე და მის ფარგლებს გარეთაც. საქართველო, როგორც თავისუფლების შუქურა, სასწორზე დევს. იმის გათვალისწინებით, რომ აშშ-ს ქართველი ხალხის მხარდაჭერის მრავალწლიანი ისტორია აქვს, როდესაც ისინი დემოკრატიისკენ მიიწევდნენ, მოქმედების დროა...

შეერთებულ შტატებს აქვს შესაძლებლობა, მხარი დაუჭიროს ქართველ ხალხს. ჩვენ ვხედავთ, რომ აშშ-ის სახელმწიფო დეპარტამენტმა დაგმო ბოლო ძალადობა; ჩვენ ახლა მოვუწოდებთ შეერთებულ შტატებს, პასუხისმგებელ პირებს პასუხისმგებლობა დაეკისროს“,- აღნიშნულია განცხადებაში.

დიპლომატების აზრით, ეს ნიშნავს, რომ შეერთებულმა შტატებმა:

„უნდა შეაჩეროს 26 ოქტომბრის საპარლამენტო არჩევნების შედეგების აღიარება იმის გამო, რომ მათ ლეგიტიმურობასთან დაკავშირებით წამოჭრილია სერიოზული კითხვები და ანალოგიურად უნდა შეაჩერონ ახალი პარლამენტის აღიარება და „ქართული ოცნების“ მთავრობის აღდგენა.

მხარი უნდა დაუჭიროს პრეზიდენტ სალომე ზურაბიშვილის ძალისხმევას, ახალი, თავისუფალი და სამართლიანი არჩევნების ჩატარების შესახებ, ახალი ცენტრალური საარჩევნო კომისიის ქვეშ, რაც დემოკრატიული განახლების გზას შექმნის.

მოვუწოდოთ საქართველოს სამხედრო და უშიშროების სამსახურებს, დაიცვან საქართველოს კონსტიტუცია, ქართული დემოკრატიის საფუძველი, უარი თქვან ამ დოკუმენტთან შეუსაბამო ბრძანებებზე, მაგალითად, მშვიდობიანი დემონსტრანტების რეპრესიებზე.

დაუყოვნებლივ და საჯაროდ უნდა დაუწესდეთ სანქციები ბიძინა ივანიშვილს, პრემიერ-მინისტრ ირაკლი კობახიძესა და მთავრობის სხვა წევრებს, რომლებიც ავტორიტარულ ქცევაში არიან ჩართულები. სანქციები უნდა შეეხოთ პოლიციელებს და სამხედრო ოფიცრებს, რომლებიც მონაწილეობდნენ მშვიდობიანი მომიტინგეების დარბევაში და საპარლამენტო არჩევნების ჩატარებისას ხრიკების მოწყობაში.

ყველა ეს ღონისძიება უფრო ეფექტური იქნება, თუკი ევროკავშირთან ერთად იქნება მიღებული. მარტო თუ ევროკავშირთან ერთად, ეს ნაბიჯები ეჭვს არ დატოვებს, რომ აშშ ცალსახად დგას საქართველოს ხალხის აბსოლუტური უმრავლესობის გვერდით“,- აღნიშნულია 17 დიპლომატის ერთობლივ განცხადებაში.

განცხადებას ხელს აწერენ: აზერბაიჯანში აშშ-ის ყოფილი ელჩი რობერტ სეკუტა; ჰადსონის უნივერსიტეტის უფროსი მკვლევარი ლუკ კოფი; გლობალურ საკითხებში აშშ-ის სახელმწიფო მდივნის ყოფილი მოადგილე პაულა დობრიანსკი; რუსეთის, უკრაინის, ევრაზიის საკითხებში აშშ-ის თავდაცვის მდივნის თანაშემწის ყოფილი მოადგილე ეველინ ფარკასი; აშშ-ის სახელმწიფო მდივნის ყოფილი თანაშემწე ევროპისა და ევრაზიის საკითხებში დანიელ ფრიდი; აშშ-ის ყოფილი ელჩი უკრაინასა და უზბეკეთში ჯონ ჰერბსტი; ევროპაში აშშ-ის არმიის ყოფილი მთავარსარდალი ბენ ჰოჯესი; აშშ-ის ყოფილი ელჩი აზერბაიჯანში რიჩარდ კაუზლარიჩი; საქართელოში აშშ-ის ყოფილი ელჩი იან კელი; აშშ-ის სახელმწიფო მდივნის ყოფილი თანაშემწე დემოკრატიის, ადამიანის უფლებებისა და შრომის საკითხებში დევიდ კრამერი; ამერიკის საგარეო პოლიტიკის საბჭოს უფროსი მკვლევარი ლორა ლინდერმანი; აშშ-ის ყოფილი ელჩი აზერბაიჯანსა და ევროკავშირში რიჩარდ მორნინგსტარი; საგარეო ურთიერთობათა საბჭოს უფრო მკვლევარი სტივენ სესტანოვიჩი; აშშ-ის ყოფილი ელჩი უკრაინაში უილიამ ტეილორი; მაკკეინის ინსტიტუტის გლობალური დემოკრატიის პროგრამების უფროსი დირექტორი ლორა თორნტონი; აშშ-ის ყოფილი ელჩი ნატოსა და რუსეთში ალექსანდრ ვერშბოუ; აშშ-ის ყოფილი ელჩი ნატოში კურტ ვოლკერი; აშშ-ის ყოფილი ელჩი საქართველოსა და ბელარუსში კენეტ იელოვიცი; აშშ-ის ყოფილი ელჩი უკრაინაში, სომხეთსა და ყირგიზეთში მერი იოვანოვიჩი.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,