აჭარის მთავრობის თავმჯდომარე კავკასიის უნივერსიტეტის ბათუმის კამპუსის მშენებლობის პრეზენტაციას ესწრება

2019-07-10 11:00:21, 726 ნახვა

რეგიონი

ბათუმში, კავკასიის უნივერსიტეტის ახალი კამპუსისა და სკოლის მშენებლობის პრეზენტაცია მიმდინარეობს. პრეზენტაცია საქართველოს პრეზიდენტმა სალომე ზურაბიშვილმა გახსნა.

აჭარის ავტონომიური რესპუბლიკის მთავრობის თავმჯდომარემ თორნიკე რიჟვაძემ დამსწრე საზოგადოებას სიტყვით მიმართა.

ახალი კამპუსის მშენებლობა აჭარის მთავრობის ხელშეწყობით ხორციელდება. კამპუსი აღჭურვილი იქნება თანამედროვე ინფრასტრუქტურით, ბიბლიოთეკით, ლაბორატორიებით, სპორტული მოედნებით, საცურაო აუზით და სტუდენტური საერთო საცხოვრებლით. 1 500 ადგილობრივ და საერთაშორისო სტუდენტზე, ასევე 500 მოსწავლეზე გათვლილი სივრცის მშენებლობა სამ წელიწადში დასრულდება.

კავკასიის უნივერსიტეტს მსოფლიოს 70 ქვეყნის 130-მდე პარტნიორი უნივერსიტეტი ჰყავს, რაც საშუალებას აძლევს მიიღოს უცხოელი სტუდენტები და ლექტორები, ჰქონდეს ორმაგი ხარისხის პროგრამები, ასევე გაცვლითი პროგრამები სტუდენტებისთვის, აკადემიური და ადმინისტრაციული პერსონალისთვის.

პრეზენტაციას საქართველოს განათლების, მეცნიერების, კულტურისა და სპორტის მინისტრის მოადგილე ირინე აბულაძე, კავკასიის უნივერსიტეტის პრეზიდენტი კახა შენგელია, აჭარის მთავრობის და კავკასიის უნივერსიტეტის წარმომადგენლები, სტუდენტები და სხვა მოწვეული სტუმრები ესწრებიან.

(NS)

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,