„ჩვენი ქვეყანა სამაგალითოდ უმასპინძლებს უეფას 19-წლამდე ევროპის ჩემპიონატს. ეს, რა თქმა უნდა, ძალიან მნიშვნელოვან წვლილს შეიტანს საქართველოში ფეხბურთის განვითარებისთვის“, - ამის შესახებ საქართველოს პარლამენტის თავმჯდომარე ირაკლი კობახიძემ დღეს, ქუთაისის პარლამენტის სასახლეში განაცხადა, სადაც უეფას 19-წლამდე ევროპის ჩემპიონატთან დაკავშირებით, ჩემპიონატის თასი მიიტანეს. 

ირაკლი კობახიძის განცხადებით, უეფას 19-წლამდე ევროპის ჩემპიონატის საქართველოში ჩატარება ჩვენი ქვეყნისთვის საამაყო და მნიშვნელოვანია. პარლამენტის თავმჯდომარე დარწმუნებულია, რომ საქართველო ჩემპიონატს სამაგალითოდ უმასპინძლებს.

„მოხარული ვართ, რომ საქართველო ფეხბურთში ევროპის ჩემპიონატს მასპინძლობს. ჩვენთვის ეს ნამდვილად ძალიან მნიშვნელოვანი და საამაყო ტურნირია და დარწმუნებული ვარ, რომ ჩვენი ქვეყანა სამაგალითოდ უმასპინძლებს მას. ეს რა თქმა უნდა, ძალიან მნიშვნელოვან წვლილს შეიტანს საქართველოში ფეხბურთის განვითარებისთვის“, - განაცხადა საქართველოს პარლამენტის თავმჯდომარემ.
გულშემატკივრებს თამაშებზე დასწრებისკენ მოწოდა საქართველოს ფეხბურთის ფედერაციის პირველმა ვიცეპრეზიდენტმა კახა ჭუმბურიძემ.

„2-დან 15 ივლისამდე, საქართველო მასპინძლობს უპრეცედენტო საფეხბურთო ღონისძიებას. საქართველოს მთავრობის ხელშეწყობით, გორი და თბილისი ემზადებიან ამ ტურნირის ჩასატარებლად. მოვუწოდებ გულშემატკივრებს, რომ მობრძანდნენ თამაშზე. მე ვფიქრობ, რომ საქართველოსთვის ძალიან მნიშვნელოვანი იქნება ამ ტურნირის მაღალ დონეზე ორგანიზება და აგრეთვე, სპორტული წარმატება“, - განაცხადა კახა ჭუმბურიძემ.

ვეტერანი ფეხბურთელის, საქართველოს ფეხბურთის ფედერაციის ვიცეპრეზიდენტის, ალექსანდრე იაშვილის განცხადებით, უეფას 19-წლამდე ევროპის ჩემპიონატი თითოეულ ფეხბურთელს ქვეყნისთვის წარმატების მოტანისა და საკუთარი თავის წარმოჩენის დიდ შანსს აძლევს.

„2 ივლისიდან საქართველოს პორტუგალიის, ჰოლანდიის, გერმანიის, ბულგარეთის, ინგლისის, შვედეთის და ჩეხეთის 19 წლამდე ნაკრები გუნდები ეწვევიან, რომლებიც კონტინენტის ჩემპიონობისთვის იბრძოლებენ. ეს არის უდიდესი შანსი თითოეული ფეხბურთელისთვის, რომ წარმოაჩინოს საკუთარი თავი და პირველ რიგში, წარმატება მოუტანოს თავის ქვეყანას“, - განაცხადა ალექსანდრე იაშვილმა.

2017 წლის 2-15 ივლისს თბილისი და გორი უეფას 19-წლამდე ევროპის ჩემპიონატს უმასპინძლებს. კონტინენტის პირველობაზე მასპინძელი საქართველოს 19-წლამდე ნაკრებთან ერთად, შვედეთის, ჩეხეთის, პორტუგალიის, ინგლისის, გერმანიის, ბულგარეთისა და ჰოლანდიის 19-წლამდე ნაკრები გუნდები მიიღებენ მონაწილეობას.

ევროპის ჩემპიონატის გახსნით შეხვედრაზე, 2 ივლისს, გორის თენგიზ ბურჯანაძის სახელობის სტადიონზე, ერთმანეთს საქართველოსა და პორტუგალიის ნაკრებები დაუპირისპირდებიან. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

პოლონეთი და ბალტიისპირეთის ქვეყნები რუსეთის მიერ კაშხლების, გაზსადენებისა და ელექტროსადგურების საბოტაჟისთვის ემზადებიან

რუსეთის უზენაესმა სასამართლომ ოპოზიციური პარტია იაბლოკო დუმის არჩევნებიდან მოხსნა

ადვოკატმა უარი თქვა თელავის სასტუმროში მომხდარ ინციდენტში ბრალდებულის დაცვაზე

სასამართლომ საქართველოს ყოფილი გენერალური პროკურორი, ოთარ რომანოვ-ფარცხალაძე დაუსწრებლად დაპატიმრება ძალაში დატოვა.