საბანაძე: შეიძლება ითქვას, რომ საქართველოს ვიზალიბერალიზაციაზე შეთანხმება მიღწეულია

2016-12-13 21:34:00, 1108 ნახვა

პოლიტიკა

შეიძლება ითქვას, რომ საქართველოს ვიზალიბერალიზაციაზე შეთანხმება მიღწეულია, - ამის შესახებ ევროკავშირში საქართველოს ელჩმა ნატალია საბანაძემ საზოგადოებრივი მაუწყებლის ეთერში განაცხადა.

მისი განცხადებით, დღევანდელი შეხვედრა ძალიან მნიშვნელოვანი იყო, როგორც მან აღნიშნა, შეთანხმების ტექსტში ცვლილებებიც შევიდა, რომლის მიხედვითაც ვიზალიბერალიზაცია ძალაში, ე.წ. შეჩერების მექანიზმთან ერთად უნდა შევიდეს.

„საბჭოს ტექსტი მიიღო პარლამენტმა. ძალიან მიხარია, რომ ერთი შეხვედრით დასრულდა და შეთანხმება უკვე გვაქვს. ახლა ბევრი პროცედურაა გასავლელი. ამის შემდეგ კენჭისყრა იქნება ლიბეს კომიტეტში და მერე გადავა პლენარულ სხდომაზე", - განაცხადა ნატალია საბანაძემ.

საბანაძემ აქვე აღნიშნა, რომ ჯერჯერობით ვიზალიბერალიზაციის მიღების ზუსტი დრო არ არის ცნობილი, თუცა, ამ შეხვედრის შემდეგ შეიძლება ითქვას, რომ საქართველოს ვიზალიბერალიზაციაზე შეთანხმება მიღწეულია

"განრიგი ჯერ არ ვიცით. ეს ყველაფერი თანდათან დგება. ამ შეხვედრის შემდეგ შეიძლება ითქვას, რომ საქართველოს ვიზალიბერალიზაციაზე შეთანხმება მიღწეულია", - განაცხადა ნატალია საბანაძემ.

ცნობისთვის, დღევანდელ შეხვედრაზე, ევროპარლამენტმა და ევროკავშირის საბჭომ საქართველოს ვიზალიბერალიზაციაზე პოლიტიკურ შეთანხმებას მიაღწიეს.

ინფორმაციითვის, როგორც სლოვაკეთის საგარეო საქმეთა მინისტრმა მიროსლავ ლაიჩაკმა ევროკავშირის საგარეო საქმეთა მინისტრების შეხვედრის დაწყებამდე ჟურნალისტებს განუცხადა, 20 დეკემბერს აღნიშნულ საკითხს ევროკავშირის მუდმივ წარმომადგენელთა კომიტეტი (COREPER) განიხილავს.