მანანა კობახიძე: საქართველოში ასეთი ინციდენტების დრო უნდა დამთავრდეს

2015-03-16 12:03:20, 575 ნახვა

პოლიტიკა

„სამწუხაროა დასისხლიანებული, თავგატეხილი ადამიანების ხილვა. პოლიტიკურ ნიადაგზე ასეთი ტიპის დაპირისპირება არ უნდა ხდებოდეს“, – ასე გამოეხმაურა პარლამენტის ვიცე–სპიკერი მანანა კობახიძე ზუგდიდში გუშინ მომხდარ ინციდენტს.
კობახიძის შეფასებით, ადამიანმა პროტესტი მშვიდობიანად უნდა გამოხატოს.
ვიცე–სპიკერი ძალადობას გმობს და აცხადებს, რომ ინციდენტი სასწრაფოდ უნდა გამოიძიონ.
„ნებისმიერი ფორმის ძალადობა მიუღებელია. ძალადობა, ცემა, ხულიგნობა სისხლის სამართლის დანაშაულია, ვინც არ უნდა ჩადიოდეს მას, მან უნდა აგოს პასუხი კანონის წინაშე. სამართალდამცავ ორგანოებს მოვუწოდებთ, აღნიშნული ინციდენტი გამოიკვლიონ. საქართველოში ასეთი ინციდენტების დრო უნდა დამთავრდეს. ძალიან სამწუხაროა დასისხლიანებული, თავგატეხილი ადამიანების ხილვა პოლიტიკურ ნიადაგზე, ასეთი ტიპის და არც ერთი ტიპის დაპირისპირება არ უნდა ხდებოდეს. თუ ვინმეს პროტესტი აქვს, მშვიდობიანად უნდა გამოხატოს და ხელისუფლება მსგავს ძალადობას გმობს“, – განაცხადა კობახიძემ.
ცნობისთვის, გუშინ ანი ნადარეიშვილმა „ფეისბუქის“ საკუთარ გვერდზე ინფორმაცია გაავრცელა, თანახმადაც ზუგდიდში მის ოფისში ზუგდიდის საკრებულოს წევრები და მერიის თანამშრომლები შეიჭრნენ. ნადარეიშვილის თქმით, დამსხვრეულია შუშები და ნაცემი არიან თანამშრომლები. ნადარეიშვილმა ზუგდიდის საკრებულოს ერთ-ერთ წევრსა და მას შორის გამართული დიალოგის შინაარსიც გაახმაურა: "ბოლო გაფართხალება სკამების გადასარჩენად! როგორც კი მოვარდნენ ჩავედი მათთან, საკრებულოს წევრები და მერიის თანამშრომლები იყვნენ, როგორც ჩავედი ერთ-ერათი ყველაზე აგრესიული საკრებულოს წევრი გოგა ღადუა მომვარდა და ვკითხე ჩემს ოფისში რა გინდათ, აგერ ვარ და გისმენთთქო, ბოლო ხმაზე მიყვიროდა - 21 მარტს რატომ მიგყავთ ხალხი თბილისშიო. პ.ს. ძალიან შეშინებულები არიან, ძალიააააან! 21 მარტს მთელი საქართველო გამოვა, ბოლო დღეებს ითვლიან!",-წერს ანი ნადარეიშვილი. მანამდე კი, ნადარეიშვილი წერდა, რომ ზუგდიდის საკრებულოს თავმჯდომარე და საკრებულოს წევრები, „ნაციონალური მოძრაობის“ ოფისთან მივიდნენ. "ამ წუთებში ზუგდიდში ისევ და ისევ საკრებულოს თავმჯდომარე, წევრები და თანამშრომლები მივიდნენ ნაციონალური მოძრაობის ოფისთან, ხაზი მინდა გავუსვა იმ ფაქტსაც, რომ ოფისი ცარიელია, კვირაა და იციან, რომ დღეს შტაბი დაკეტილია. და რაც ყველაზე მთავარია ისევ სკოლის მოსწავლეები მიიყვანეს აქაც. აღარავინ არ ყავს ქართულ ოცნებას სამეგრელოში",-დაწერა ანი ნადარეიშვილმა "ფაისბუქის" საკუთარ გვერდზე.