გენპროკურორის მოადგილე ბელთაძე, საეჭვო ვითარებაში გარდაცვლილ თემურ ხადურის დედას ნინო გვიშიანს შეხვდა

2026-10-02 15:57:27, 343 ნახვა

სამართალი

საქართველოს გენერალური პროკურორის მოადგილე ზურაბ ბელთაძე თემურ ხადურის გარდაცვალების სისხლის სამართლის საქმესთან დაკავშირებით გარდაცვლილის დედას ნინო გვიშიანს შეხვდა. - ამის შესახებ პროკურატურის განცხადებაშია ნათქვამი.

პროკურატურის ინფორმაციით, შეხვედრას ესწრებოდა სიცოცხლის ხელყოფის საქმეებზე დაზარალებულთა საჩივრების განმხილველი საბჭოს თავმჯდომარე თამარ ბეჟუაშვილი.

"საქართველოს გენერალური პროკურორის მოადგილე ზურაბ ბელთაძე თემურ ხადურის გარდაცვალების სისხლის სამართლის საქმესთან დაკავშირებით გარდაცვლილის დედას ნინო გვიშიანს შეხვდა. შეხვედრას ესწრებოდა სიცოცხლის ხელყოფის საქმეებზე დაზარალებულთა საჩივრების განმხილველი საბჭოს თავმჯდომარე თამარ ბეჟუაშვილი. შეხვედრაზე ნინო გვიშიანს მიეწოდა ინფორმაცია სისხლის სამართლის საქმის დეტალების, გამოძიების მიმდინარეობის და ჩატარებული საგამოძიებო და საპროცესო ღონისძიებების შესახებ.

თემურ ხადურის გარდაცვალების სისხლის სამართლის საქმეს სიცოცხლის ხელყოფის საქმეებზე დაზარალებულთა საჩივრების განმხილველი საბჭო შეისწავლის, რომლის ფარგლებშიც საბჭოს მჭიდრო კომუნიკაცია ექნება ნინო გვიშიანთან. ასევე, საქმის შესწავლის შედეგების და შემდგომი ღონისძიებების შესახებ დეტალურად ეცნობება საზოგადოებას." - წერია პროკურატურის განცხადებაში.

თემო ხადურის საქმე ეხება 23 წლის სტიქაროსნის ბურუსით მოცულ და ტრაგიკულ გარდაცვალებას, რომელიც 2024 წლის აგვისტოში მოხდა და საზოგადოებაში დღემდე დიდ რეზონანსს იწვევს.

ქუთაისელი თემო ხადური 2024 წლის 25 აგვისტოს თბილისიდან მგზავრობისას გაუჩინარდა. 4-დღიანი ძებნის შემდეგ, მისი ცხედარი თერჯოლის რაიონის სოფელ სიმონეთთან, მდინარის კალაპოტთან იპოვეს.

გარდაცვლილის დედა, ნინო გვიშიანი, და ოჯახის წევრები კატეგორიულად გამორიცხავენ უბედურ შემთხვევას ან თვითმკვლელობას. დედის მტკიცებით, მის შვილს სიკვდილამდე ფიზიკურად გაუსწორდნენ. ოჯახი პირდაპირ სამართალდამცველებს (პოლიციელებს) ადანაშაულებს და აცხადებს, რომ ბიჭი დევნის ოპერაციის დროს პოლიციამ ცემით მოკლა, საქმის მიჩუმათებას კი თვითმკვლელობის ვერსიით ცდილობენ.

ფოტო ნანუკა ჟორჟოლიანის იუთუბ არხიდან.