ალიევი - აზერბაიჯანის მოქალაქეების დაღუპვაზე პასუხისმგებლობა რუსეთის ფედერაციის წარმომადგენლებს ეკისრებათ

2025-01-06 15:47:10, 310 ნახვა

მსოფლიო

აზერბაიჯანის ავიახაზების თვითმფრინავის ჩამოვარდნაზე პასუხისმგებლობა რუსეთის ფედერაციის წარმომადგენლებს ეკისრებათ - ამის შესახებ აზერბაიჯანის პრეზიდენტმა ილჰამ ალიევმა 6 იანვარს, ავიაკატასტროფის დროს დაღუპულთა და დაშავებულთა ოჯახის წევრებთან შეხვედრისას განაცხადა.

მისივე განცხადებით, რუსულმა მხარემ არ შეატყობინა თვითმფრინავის კაპიტანს საჰაერო სივრცის დაკეტვისა და გროზნოსთან მიახლოების საფრთხის შესახებ.

"სრული რწმუნებით შემიძლია ვთქვა, რომ ამ კატასტროფაში აზერბაიჯანის მოქალაქეების დაღუპვაზე პასუხისმგებლობა რუსეთის ფედერაციის წარმომადგენლებს ეკისრებათ. ჩვენ ვითხოვთ სამართლიანობას, ვითხოვთ დამნაშავეთა დასჯას, ვითხოვთ სრულ გამჭვირვალობას და ადამიანურ ქცევას

გროზნოს რომ დროულად მიეღო ზომები საჰაერო სივრცის ჩაკეტვისთვის, დაცული ყოფილიყო სახმელეთო მომსახურების ყველა წესი და კოორდინაცია შეიარაღებულ ძალებსა და რუსეთის ფედერაციის სამოქალაქო სამსახურებს შორის, მაშინ ეს ტრაგედია არ მოხდებოდა." - აღნიშნა ალიევმა.

აზერბაიჯანის პრეზიდენტმა ალიევმა ასევე ისაუბრა კითხვაზე, თუ რატომ გაიგზავნა თვითმფრინავი ყაზახეთის ქალაქ აქტაუში, რომელიც კასპიის ზღვის მოპირდაპირე სანაპიროზე მდებარეობს.

"რატომ არ გააფრთხილეს ამჯერად ფრენის ეკიპაჟი, ბუნებრივია, ამას გამოძიება დაადგენს? დღისავით ნათელია, რომ თვითმფრინავი ელექტრონული კონტრზომებით იქნა გამოყვანილი კონტროლიდან... მაგრამ რატომ გაგზავნეს თვითმფრინავი აქტაუში? ამის შესახებ ინფორმაცია ჯერ არ გვაქვს. ეს მოხდა ადგილობრივი ავიამეთვალყურეების გადაწყვეტილების საფუძველზე, თუ თავად მფრინავებს ესმოდათ, რომ რუსეთის საჰაერო სივრცეში რადიოელექტრონული საბრძოლო ტექნიკა არ დაუშვებდა მათ დაშვებას და თავად გააკეთეს ეს არჩევანი?" - განაცხადა ალიევმა და აღნიშნა, რომ ამის შესახებ ცნობილი გახდება "შავი ყუთების" მონაცემების გაშიფვრის შემდეგ, რომელიც აზერბაიჯანის დაჟინებული მოთხოვნით ბრაზილიაში გაიგზავნა.

შეგახსენებთ, აზერბაიჯანული ავიაკომპანია AZAL-ის თვითმფრინავი Embraer-ი 25 დეკემბერს ჩამოვარდა ყაზახეთის ქალაქ აქტაუსთან.თვითმფრინავი ბაქოდან გროზნოში მიფრინავდა, მაგრამ კურსიდან გადაუხვია მას შემდეგ, რაც ის, ძირითადი ვერსიით, რუსეთის საჰაერო თავდაცვის ცეცხლში მოხვდა.

თვითმფრინავში 67 ადამიანი იმყოფებოდა, მათ შორის ეკიპაჟის ხუთი წევრი. დაიღუპა 38 ადამიანი, გადარჩა 29. თვითმფრინავში მყოფთა უმრავლესობა, 42 ადამიანი იყო აზერბაიჯანის, 16 - რუსეთის, 6 - ყაზახეთის, 3 - ყირგიზეთის მოქალაქე.

ავტორი: ექსპრესნიუსი,