2024-11-28 15:54:47, 787 ნახვა

---

„არჩევნები საერთაშორისო ზედამხედველობის ქვეშ ხელახლა უნდა ჩატარდეს“ - ევროპარლამენტმა საქართველოს შესახებ რეზოლუცია მიიღო

ევროპარლამენტმა მიიღო რეზოლუცია, რომელიც საქართველოს 26 ოქტომბრის საპარლამენტო არჩევნებს გმობს.

ევროპარლამენტის რეზოლუციას მხარი 444-მა დეპუტატმა დაუჭირა, ხოლო წინააღმდეგ 72 დეპუტატი წავიდა.

ევროპარლამენტის რეზოლუციაში აღნიშნულია, რომ:

• საქართველოს საპარლამენტო არჩევნები ხელახლა უნდა ჩატარდეს საერთაშორისო ზედამხედველობის ქვეშ;
• პარლამენტი ითხოვს ევროკავშირის სანქციების დაწესებას საქართველოს პრემიერ-მინისტრისა და მაღალი დონის ოფიციალური პირების წინააღმდეგ;
• საქართველოს ხელისუფლების მიერ გატარებული პოლიტიკა შეუთავსებელია ქვეყნის ევროატლანტიკური ინტეგრაციის პერსპექტივასთან.

როგორც რეზოლუციაშია აღნიშნული, ევროკავშირმა უნდა დააწესოს სანქციები და შეზღუდოს ოფიციალური კონტაქტები საქართველოს მთავრობასთან.

"მოვუწოდებთ ევროკავშირს და მის წევრ ქვეყნებს, დააწესონ პერსონალური სანქციები საქართველოში იმ ოფიციალურ პირებსა და პოლიტიკურ ლიდერებზე, რომლებიც პასუხისმგებელნი არიან დემოკრატიულ უკუსვლაზე, საარჩევნო დარღვევებზე, ადმინისტრაციულ ძალადობასა და სახელმწიფო ინსტიტუტების ბოროტად გამოყენებაზე, როგორიცაა პრემიერ-მინისტრი ირაკლი კობახიძე, თბილისის მერი და მმართველი პარტია „ქართული ოცნების“ გენერალური მდივანი კახა კალაძე, ასევე პარლამენტის თავმჯდომარე შალვა პაპუაშვილი და "ქართული ოცნების" თავმჯდომარე ირაკლი ღარიბაშვილი, რაც ასევე გავრცელდება პოლიტიკურად მოტივირებული გადაწყვეტილებების გამომტან მოსამართლეებზე",- ნათქვამია რეზოლუციაში.

ამასთან, რეზოლუციაში ხაზგასმით არის ნათქვამი, რომ საქართველოს მთავრობის პოლიტიკა შეუთავსებელია ევროატლანტიკურ ინტეგრაციასთან.

"ევროპარლამენტი ასევე კატეგორიულად გმობს რუსეთის სისტემატურ ჩარევას საქართველოს დემოკრატიულ პროცესებში დეზინფორმაციის საშუალებით, როგორიცაა "გლობალური ომის პარტიის" შეთქმულება, რომელიც აცხადებს, რომ ქვეყნის ოპოზიცია დასავლეთის ბრძანებით ქვეყანას რუსეთთან ომში ჩაითრევს",- ვკითხულობთ რეზოლუციაში.

ევროპარლამენტარებმა 13-14 ნოემბრის პლენარულ სესიაზე განიხილეს საქართველოს ბოლო საპარლამენტო არჩევნების შედეგები ევროკომისიის ვიცე-პრეზიდენტ მარგარიტ შინასთან ერთად, დებატები შეგიძლიათ იხილოთ ბმულზე. ამასთან, ევროპარლამენტის სრული რეზოლუციის გასაცნობად ეწვიეთ ბმულს.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი