2019-12-18 15:18:08, 1615 ნახვა

---

თურნავა - ყოველთვის ხელს შევუწყობთ მცირე და საშუალო ბიზნესის განვითარებას, რათა გავამყაროთ ეკონომიკური ზრდის ტენდენცია და სიღარიბე დავძლიოთ

„ჩვენი მცირე და საშუალო ბიზნესი ვითარდება სტაბილურად, წელიწადში საშუალოდ 13.5%-ით იზრდება გამოშვება ამ სექტორიდან, არის ერთ-ერთი ყველაზე დიდი დამსაქმებელი - 450 000-ზე მეტი სამუშაო ადგილი სწორედ მცირე და საშუალო ბიზნესშია შექმნილი. ამდენად, ყოველთვის ხელს შევუწყობთ მის განვითარებას, რათა  გავამყაროთ ეკონომიკური ზრდის ტენდენცია და სიღარიბე დავძლიოთ", - განაცხადა ეკონომიკისა და მდგრადი განვითარების მინისტრმა ევროპის საინვესტიციო ბანკის (EIB) მიერ ორგანიზებულ ღონისძიებაზე „ევროკავშირი ბიზნესისთვის საქართველოში: EIB ჯგუფი - ფინანსებზე წვდომიდან ინკლუზიურ ზრდამდე".

ნათია თურნავამ შეხვედრაზე საქართველოში მცირე და საშუალო ბიზნესის განვითარების კუთხით არსებულ მდგომარეობასა და დინამიკაზე, ასევე ეკონომიკის სამინისტროს ქოლგის ქვეშ მიმდინარე იმ პროგრამებზე ისაუბრა, რომელთაც სახელმწიფო სწორედ ამ სექტორის მხარდასაჭერად და მისი კონკურენტუნარიანობის ზრდის მიზნით ახორციელებს. „ეს არის პირველ რიგში ფინანსური დახმარების პროგრამები, მათ შორის ბანკების სესხების პროცენტის სუბსიდირება, რომლის წყალობითაც უკანასკნელ 5 წელიწადში 464 ახალი საწარმო ამოქმედდა, შეიქმნა ახალი 15 600 სამუშაო ადგილი და ამ სექტორში მილიარდ ლარამდე ინვესტიცია განხორციელდა; ეს არის მიკროგრანტების პროგრამა, რომელიც მომავალ წელს განახლდება და ამ ეტაპზე 6000-ზე მეტმა ოჯახმა უკვე მიიღო მასში მონაწილეობა და ძალიან მცირე, მაგრამ მათთვის მნიშვნელოვანი ბიზნესი შექმნა", - აღნიშნა ეკონომიკის მინისტრმა. 

მინისტრის ინფორმაციით, შეხვედრაზე ასევე საუბარი იყო ახალ პროგრამებზე, რომლებიც შეიძლება განხორციელდეს, რათა მცირე ბიზნესი უფრო კონკურენტუნარიანი გახდეს არამარტო საქართველოს შიგნით, არამედ ქვეყნის გარეთ. ამასთან, ნათია თურნავას თქმით, უწყება ამუშავებს ერთიანი ფრონტოფისის, იგივე ერთიანი ბიზნესსახლის კონცეფციას, რომელიც მთავრობის სხდომაზე ძალიან მალე დამტკიცდება და რომელშიც ძირითადი აქცენტი იქნება იმაზე, რომ მცირე მეწარმეებს მათთვის სასურველი სერვისები მიღება თავის საცხოვრებელ ადგილზე შეეძლოთ - სოფლებში, დაბებში თუ მაღალმთიან რეგიონებში.
„ჩვენ ასევე ყველგან გამოვყოფთ და უკვე გამოვყავით მცირე ბიზნესის პრიორიტეტს, იქნება ეს პრივატიზაციის პოლიტიკა თუ წიაღისეულის ლიცენზირების პოლიტიკა - ჩვენ მასობრივ პრივატიზაციას ვაწარმოებთ და იქ საუბარი არაა მხოლოდ მსხვილ ბიზნესებზე, მთელი რიგი სახელმწიფო საკუთრება, რაც საპრივატიზაციოდ გამოდის, სწორედ მცირე და საშუალო ბიზნესისთვის ქმნის ახალ შესაძლებლობებს, იქნება ეს მცირე საოჯახო სასტუმრო, მცირე ფერმა თუ რომელიმე პატარა სერვის-ინდუსტრია", - აღნიშნა ნათია თურნავამ.  მისი ინფორმაციით, ასევე გაგრძელდება სესხის პროცენტის სუბსიდირება, რომლითაც უკვე ისარგებლა 62-მა მცირე მეწარმემ.

საკრედიტო-საგარანტიო სქემა კიდევ ერთი მიმართულებაა, რომელზეც, მინისტრის ინფორმაციით, ასევე აქტიურად გაგრძელდება მუშაობა, საჭიროების შემთხვევაში კი ბიზნესის ინტერესების შესაბამისად გადაკეთდება.  „მიუხედავად ჩვენი ძალიან მაღალი დონის ძალისხმევისა, ეს სქემა ჯერჯერობით სრულფასოვნად ვერ ამოქმედდა. ჩვენ ყოველდღიურ რეჟიმში ვხვდებით ბანკებს, რათა გავიგოთ, მათი მხრიდან რატომაა ინტერესი ჯერ კიდევ დაბალი. და იმედი გავქვს, რომ განვაახლებთ ამ პროგრამას, თუ საჭიროა, გადავაკეთებთ მას და მეტად მოვარგებთ ბიზნესის საჭიროებებს - გაისად ჩვენ პორტფელში არცერთი უმოქმედო პროგრამა არ უნდა გვქონდეს", - განაცხადა ეკონომიკის მინისტრმა.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი