მესტიისა და ზემო სვანეთის მიტროპოლიტი ილარიონი ქვეყანაში არსებულ სოციალურ, დემოგრაფიულ და ზნეობრივ გამოწვევებზე საუბრობს და ხელისუფლებას მოქალაქეებისა და სასულიერო პირების უკანონო თვალთვალის შეწყვეტისკენ მოუწოდებს.

მიტროპოლიტი განცხადებაში მროველ-ურბნელი მიტროპოლიტის, მეუფე იობის 10 ნოემბრის ქადაგებას ეხმაურება და აღნიშნავს, რომ ეკლესიის დანიშნულება მხოლოდ ლოცვითი მსახურებით არ შემოიფარგლება. მისი თქმით, როდესაც ქვეყნისა და მომავალი თაობის წინაშე მნიშვნელოვანი საფრთხეები დგას, სასულიერო პირებს საკუთარი პოზიციის საჯაროდ გამოხატვის პასუხისმგებლობა ეკისრებათ.

„არსებობს დრო, როდესაც დუმილი არა თავმდაბლობა, არამედ პასუხისმგებლობისგან თავის არიდებაა“, — აცხადებს მეუფე ილარიონი.

მიტროპოლიტი ისტორიულ მაგალითებსაც იხსენებს და ხაზს უსვამს, რომ ეკლესიის მოღვაწეები ყოველთვის ამხელდნენ უსამართლობას, მიუხედავად იმისა, თუ ვისგან მოდიოდა ზეწოლა.

„სწორედ ამ მემკვიდრეობის ერთგულება გვავალდებულებს დღესაც, ხმამაღლა და შეულამაზებლად ვთქვათ სიმართლე მაშინ, როდესაც საფრთხე ემუქრება ერის ზნეობრივ საფუძვლებსა და მომავალი თაობის გადარჩენას“, — აღნიშნავს იგი.

განცხადების ერთ-ერთი მთავარი საკითხი სათამაშო ბიზნესისა და ნარკოტიკული საშუალებების გავრცელებაა. მეუფე ილარიონის შეფასებით, ამ მიმართულებით არსებული პრობლემები განსაკუთრებით მძიმე გავლენას ახდენს ახალგაზრდებზე, ანგრევს ოჯახებს და საფრთხეს უქმნის ქვეყნის მომავალს.

„ლუდომანია და ნარკომანია ანადგურებს ოჯახებს და ართმევს ქვეყანას მომავალს“, — წერს მიტროპოლიტი და ხელისუფლებას შესაბამისი პოლიტიკის გამკაცრებისკენ მოუწოდებს.

მეუფე ილარიონი ყურადღებას ამახვილებს საქართველოს დემოგრაფიულ მდგომარეობაზეც. მისი განცხადებით, ადგილობრივი მოსახლეობის უცხოეთში ემიგრაციის პარალელურად, ქვეყანაში უცხო ქვეყნის მოქალაქეების მასობრივი შემოდინება და უძრავი ქონების გასხვისება დამატებით კითხვებს აჩენს სახელმწიფოს საემიგრაციო პოლიტიკასთან დაკავშირებით.

მიტროპოლიტის შეფასებით, აღნიშნული პროცესები საჭიროებს განსაკუთრებულ სახელმწიფოებრივ ყურადღებას, რადგან საკითხი ქვეყნის ეროვნულ ინტერესებს, კულტურულ თვითმყოფადობასა და დემოგრაფიულ მდგომარეობას უკავშირდება.

განსაკუთრებული სიმწვავით არის დასმული პირადი ცხოვრების ხელშეუხებლობის საკითხიც. მეუფე ილარიონი მიუღებლად მიიჩნევს მოქალაქეებისა და სასულიერო პირების უკანონო მიყურადებასა და თვალთვალს და აცხადებს, რომ ადამიანის ღირსებისა და თავისუფლების დაცვა სახელმწიფოს ერთ-ერთი უმთავრესი ვალდებულებაა.

„ადამიანის თავისუფლება და ღირსება ღვთისგან ბოძებული უზენაესი ნიჭია, ხოლო პირად ცხოვრებაში უხეში ჩარევა ეწინააღმდეგება როგორც ქრისტიანულ მორალს, ისე სამართლებრივი სახელმწიფოს პრინციპებს“, — აღნიშნავს მიტროპოლიტი.

ამასთან, მეუფე ილარიონი საუბრობს ეკლესიისა და სახელმწიფოს ურთიერთობის პრინციპებზე და ხაზგასმით აცხადებს, რომ ეკლესიის დამოუკიდებლობა ფინანსური მხარდაჭერითა თუ სხვა ბერკეტებით არ უნდა შეიზღუდოს.

„ეკლესიის ხმა ვერ იქნება დადუმებული მატერიალური კეთილდღეობით, სახელმწიფო დაფინანსებითა თუ ფარული ზეწოლის მექანიზმებით, რადგან ჩვენი მთავარი ანგარიშვალდებულება უფლისა და ჩვენი მრევლის წინაშეა“, — ნათქვამია განცხადებაში.

მიტროპოლიტი ხელისუფლებას მოუწოდებს, შეწყვიტოს მოქალაქეებისა და სასულიერო პირების უკანონო თვალთვალი, გადადგას კონკრეტული ნაბიჯები ნარკოპოლიტიკისა და სათამაშო ბიზნესის მიმართულებით, ასევე შეიმუშაოს ეროვნულ ინტერესებზე ორიენტირებული დემოგრაფიული და საემიგრაციო პოლიტიკა.

„მოვუწოდებთ ხელისუფლებას, გააცნობიეროს საკუთარი ისტორიული პასუხისმგებლობა ერისა და ღვთის წინაშე […] და დაიცვას ჩვენი ქვეყნის მომავალი“, — აცხადებს მეუფე ილარიონი.

მიტროპოლიტის განცხადება კიდევ ერთხელ აყენებს დღის წესრიგში ეკლესიის დამოუკიდებლობის, სახელმწიფოს პასუხისმგებლობისა და ქვეყნის წინაშე არსებული მნიშვნელოვანი გამოწვევების საკითხებს.

განცხადებას მეუფე ილარიონი საქართველოს დალოცვით ასრულებს: „ღმერთმა დალოცოს და გააძლიეროს სრულიად საქართველო“.

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან

სოციალური ქსელები

მრგვალი ბაღის მიმდებარედ მომხდარი დაპირისპირების საქმეზე 7 პირი დააკავეს

ბაზისბანკი ლეჩხუმში "ქორენიშული ვერანდის" მხარდამჭერია

23 წლის სტიქაროსნის გარდაცვალების საქმეზე პოლიციელები დააკავეს

მეუფე ილარიონი - ეკლესიის ხმას მატერიალური კეთილდღეობით ვერ დაადუმებენ