EPP-ის რეზოლუციის პროექტის სამუშაო ვერსია |  6-პუნქტიანი რეზოლუციის პროექტში აღნიშნულია, რომ ისინი თავს იკავებენ "ქართული ოცნების" თვითგამოცხადებული ხელისუფლების საქართველოს ლეგიტიმურ ხელისუფლებად აღიარებისგან.

გარდა ამისა, რეზოლუციის სამუშაო ვერსიაში 2024 წლის 26 ოქტომბრის არჩევნები გაყალბებულად არის მოხსენიებული და აღნიშნულია, რომ არჩევნები დემოკრატიული ნორმებისა და სტანდარტების სრული დარღვევით ჩატარდა და არ ასახავდა საქართველოს ხალხის ნებას.

EPP რეზოლუციის სამუშაო ვერსიაში საერთაშორისო თანამეგობრობას მოუწოდებს შეუერთდეს საქართველოს თვითგამოცხადებული ხელისუფლებისადმი ბოიკოტს.

"ვცნობთ, საქართველოს სახელმწიფოს ერთადერთ ლეგიტიმურ წარმომადგენლად პრეზიდენტ სალომე ზურაბიშვილს; ვაფასებთ მის ძალისხმევას ევროპული მომავლის გზაზე ქვეყნის მშვიდობიანად წარმართვისკენ. ვითხოვთ საქართველოში ახალი არჩევნების ჩატარებას მომდევნო რამდენიმე თვის განმავლობაში გაუმჯობესებულ საარჩევნო გარემოში, დამოუკიდებელი და მიუკერძოებელი საარჩევნო ადმინისტრაციის ზედამხედველობით და გულმოდგინე საერთაშორისო დაკვირვებით, რათა გარანტირებული იყოს ჭეშმარიტად სამართლიანი, თავისუფალი და გამჭვირვალე პროცესი;

ვიმეორებთ მოწოდებას საბჭოსა და წევრი ქვეყნების მიმართ, დაუყოვნებლივი და მიზანმიმართული პერსონალური სანქციების დაწესებისკენ ბიძინა ივანიშვილის მიმართ და მოვითხოვთ მთელი მისი აქტივების გაყინვას, ევროკავშირის ქვეყნების ფარგლებში.

მოვუწოდებთ საფრანგეთის მთავრობას, ჩამოართვას ბიძინა ივანიშვილს ღირსების ორდენი და დააწესოს ინდივიდუალური სანქციები.

მივესალმებით საბჭოს გადაწყვეტილებას დიპლომატებისა და ოფიციალური პირებისთვის უვიზო მიმოსვლის შეჩერების თაობაზე, მაგრამ მივიჩნევთ, რომ ეს მხოლოდ პირველი ნაბიჯია, რომელსაც უნდა მოჰყვეს მკაცრი სანქციები; მოვუწოდებთ ევროკავშირს და მის წევრ ქვეყნებს, დაუწესონ პერსონალური სანქციები საქართველოში იმ ოფიციალურ პირებსა და პოლიტიკურ ლიდერებს, რომლებიც პასუხისმგებელნი არიან დემოკრატიულ უკუსვლაზე, არჩევნების გაყალბებაზე, ადამიანის უფლებების დარღვევასა და პოლიტიკური ოპონენტების და აქტივისტების დევნაზე, როგორიცაა პრემიერმინისტრი ირაკლი კობახიძე, თბილისის მერი და მმართველი პარტიის გენერალური მდივანი კახა კალაძე, "ქართული ოცნების" პარლამენტის თავმჯდომარე შალვა პაპუაშვილი, პარტია "ქართული ოცნების" თავმჯდომარე ირაკლი ღარიბაშვილი და ეს სანქციები გავრცელდეს მოსამართლეებზე, მათ შორის, საქართველოს საკონსტიტუციო სასამართლოს მოსამართლეებზე, რომლებსაც გამოაქვთ პოლიტიკურად მოტივირებული გადაწყვეტილებები და ასევე სამართალდამცავ უწყებებზე.

EPP კატეგორიულად გმობს საქართველოს მმართველი რეჟიმის მიერ 2024 წლის 28 ნოემბრის შემდეგ მშვიდობიანი მომიტინგეების წინააღმდეგ სასტიკ ძალადობასა და რეპრესიებს; ითხოვს ჟურნალისტ მზია ამაღლობელის გათავისუფლებას, რომელიც უკვე 4 კვირაზე მეტია უსამართლო პატიმრობის გამო შიმშილობს და სიცოცხლისთვის კრიტიკული და შეუქცევადი შედეგების წინაშე დგას; გმობს ყოფილ პრემიერმინისტრზე, გიორგი გახარიაზე თავდასხმას და ცემას, ამას მოჰყვა ისეთი პოლიტიკური ლიდერების დაკავება, როგორებიც არიან ნიკა მელია და გიგი უგულავა, როგორც "ქართული ოცნების" და მისი მოკავშირეების მიერ მშვიდობიანი დემონსტრანტების მიმართ სახელმწიფოს მიერ ორგანიზებული ძალადობის შოკისმომგვრელი ესკალაცია; მოითხოვს თვითგამოცხადებული "პარლამენტის" მიერ ახლახან მიღებული რეპრესიული კანონმდებლობის გაუქმებას, რომელიც ზღუდავს შეკრების თავისუფლებას და თრგუნავს მშვიდობიანი განსხვავებული აზრის არსებობას", - წერია რეზოლუციის დრაფტში.

ევროპის სახალხო პარტია თავის რეზოლუციის პროექტში "ქართულ ოცნებას" მოუწოდებს "დაუყოვნებლივ და უპირობოდ გაათავისუფლოს ყველა პირი, რომლებიც დააკავეს გამოხატვის თავისუფლებისა და მშვიდობიანი შეკრების ფუნდამენტური უფლებების მშვიდობიანად გამოყენების გამო, და უზრუნველყოს სწრაფი, საფუძვლიანი და მიუკერძოებელი გამოძიება სამართალდამცავი ორგანოების მიერ ძალის უკანონო და არაპროპორციული გამოყენების შესახებ ყველა ბრალდებაზე".

EPP მიიჩნევს, რომ საქართველოს მართლმსაჯულების სისტემა გამოიყენეს სხვადასხვა აზრის ჩასახშობად, შიშის დასანერგად და სიტყვის თავისუფლების გასაჩუმებლად.

ამასთან, რეზოლუციის სამუშაო ვერსიაში, EPP მოუწოდებს ოლიგარქის პარტიას "დაუყოვნებლივ მიიღოს ზომები ჟურნალისტების უსაფრთხოებისა და თავისუფლების უზრუნველსაყოფად და სამართალდამცავი ორგანოების მხრიდან ძალადობისა და გადაცდომის ყველა შემთხვევის გამოძიებისთვის".

"EPP მოუწოდებს კომისიას განიხილოს ევროკავშირი-საქართველოს ასოცირების შეთანხმება საქართველოს თვითგამოცხადებული ხელისუფლების მიერ მე-2 მუხლში გათვალისწინებული ზოგადი პრინციპების დარღვევის გათვალისწინებით; გარდა ამისა, ამტკიცებს, რომ ზოგადი პრინციპების შეუსრულებლობამ უნდა გამოიწვიოს ეკონომიკური თანამშრომლობისა და შეთანხმებით მინიჭებული პრივილეგიების პირობითი შეჩერება;

მოუწოდებს ევროკავშირს და წევრ სახელმწიფოებს შეწყვიტონ ყველა მაღალი დონის კონტაქტი საქართველოს არალეგიტიმური ხელისუფლების ინსტიტუტებთან, როგორიცაა ევროკავშირი-საქართველოს ასოცირების საბჭო, სანამ არ ჩატარდება თავისუფალი და სამართლიანი არჩევნები; შეახსენებს, რომ მსგავსი შეხვედრები ბოროტად იქნება გამოყენებული, რათა შეიქმნას ცრუ შთაბეჭდილება ჩვეულებისამებრ ბიზნესისა და ევროკავშირის ლეგიტიმაციის მიზნით;

მოუწოდებს კომისიას გამოიყენოს გაყინული 120 მილიონი ევრო, რომელიც თავდაპირველად იყო განკუთვნილი საქართველოს ხელისუფლების მხარდასაჭერად, რათა გააძლიეროს ევროკავშირის მხარდაჭერა საქართველოს სამოქალაქო საზოგადოებისთვის, განსაკუთრებით არასამთავრობო სექტორისა და დამოუკიდებელი მედიისთვის, რომლებიც სულ უფრო მეტად ექცევიან მმართველი პოლიტიკური პარტიისა და ხელისუფლების მხრიდან არასათანადო ზეწოლის ქვეშ, ასევე დემოკრატიული მდგრადობისა და ელასტიურობის მხარდამჭერი პროგრამების მხარდასაჭერად; მოუწოდებს ევროკავშირის დაფინანსების მექანიზმების კორექტირებას იმ საჭიროებების გათვალისწინებით, რომლებიც წარმოიქმნება უფრო მტრულ და ანტიდემოკრატიულ გარემოში", - წერია სამუშაო ვერსიაში. 

ავტორი: ექსპრესნიუსი,

სოციალური ქსელები

ვოლოდიმირ ზელენსკი - ამბობენ, რომ ევროპას შეუძლია უსაფრთხოების გარანტიების გაცემა ამერიკელების გარეშე

ისრაელსა და ჰამასს შორის დადებული ცეცხლის შეწყვეტის შეთანხმება შესაძლოა გაუქმდეს

პროტესტის 76-ე დღე რუსთაველის გამზირი აქციის მონაწილეებმა გადაკეტეს - ვიდეო

თბილისის პარალელურად აქციაა ბათუმშიც