კალაძე ოპოზიციაზე - როდესაც გარედან იმართები, ხარ მოღალატე, აგენტი, ქართველი კაცი ხმას არავითარ შემთხვევაში არ მოგცემს

2024-10-28 15:30:44, 345 ნახვა

პოლიტიკა

თბილისის მერი კახა კალაძე აცხადებს, რომ საქართველოში 26 ოქტომბერს ჩატარებული საპარლამენტო არჩევნები ეუთო/ოდირის წინასწარ დასკვნებში პოზიტიურად არის შეფასებული.

როგორც მან შესაბამისი შეკითხვის საპასუხოდ აღნიშნა, წინასაარჩევნოდ ქვეყანაში მშვიდი ვითარება არსებობდა და ყველა პარტიას ჰქონდა კამპანიის წარმართვის შესაძლებლობა.

"ეუთო/ოდირი ის ორგანიზაციებია, რომლებიც აფასებენ და ასე ვთქვათ, ბოლო ბეჭედს არტყამენ არჩევნებთან დაკავშირებით. ცოტა უკან დავბრუნდეთ და გავიხსენოთ შუალედური დასკვნა როგორი პოზიტიური და კარგი იყო. რეალურად, 2012 წლიდან მოყოლებული ვარ საარჩევნო პროცესებში ჩართული და ასეთი მშვიდი არჩევნები, სადაც ყველა პოლიტიკურ პარტიას ჰქონდა შესაძლებლობა, ეწარმოებინა თავისი საარჩევნო კამპანია, არ მახსოვს. იყო მშვიდი გარემო, ყველას ჰქონდა თანაბარი პირობები და დასკვნაც იყო შესაბამისი. ასევე, ბოლო დასკვნაში, რომელიც მოვისმინეთ, რა თქმა უნდა, პირდაპირ ითქვა, რომ არჩევნები იყო კონკურენტული, მრავალპარტიული, საზოგადოებას კი ჰქონდა არჩევანის გაკეთების შესაძლებლობა",- განაცხადა კახა კალაძემ.

რაც შეეხება ეუთო/ოდირის მიერ გამოქვეყნებულ დასკვნასთან დაკავშირებით ოპოზიციის წარმომადგენლების მხრიდან გამოთქმულ ბრალდებებს, თბილისის მერი მიიჩნევს, რომ ისინი მარცხს ყველას და ყველაფერს აბრალებენ, საკუთარი თავის გარდა.

"ხომ გესმით, დამარცხებული, წყალწაღებული ოპოზიცია ყველას და ყველაფერს აბრალებს. აბრალებს სადამკვირვებლო ორგანიზაციებს; ხალხს, თავიანთ ამომრჩეველს აბრალებენ, რაც პირდაპირ უპატივცემულობაა. იმის უნარიც არ გააჩნიათ, რომ მსგავსი სისულელეები არ ილაპარაკონ; ყველას და ყველაფერს აბრალებენ, საკუთარი თავის გარდა. ეს ადამიანები ვერ აანალიზებენ თუ რატომ არ აქვთ მხარდაჭერა. ვინ არიან ესენი? - თავიანთი წარსულით ყველაზე ბოროტი, ყველაფრის მკადრებლები არიან და, რა თქმა უნდა, ქართველი ხალხი ასეთ ადამიანებს მხარს არასდროს დაუჭერს. როდესაც გარედან იმართები, ხარ მოღალატე, ხარ აგენტი, ქართველი კაცი ხმას არავითარ შემთხვევაში არ მოგცემს. ეს მოხდა ახლაც",- აღნიშნა დედაქალაქის მერმა.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),