უკრაინა მკაცრად გმობს რუსეთსა და ე.წ. სამხრეთ ოსეთს შორის დადებულ "მოკავშირეობისა და ინტეგრაციის შესახებ შეთანხმებას" და აღნიშნული ნაბიჯი რუსეთის მიერ საერთაშორისო სამართლის უხეშ დარღვევად მიაჩნია.

ამის შესახებ უკრაინის საგარეო საქმეთა სამინისტროს განცხადებაშია აღნიშნული, რომელსაც საქართველოს საგარეო უწყება აქვეყნებს.

„უკრაინა მკაცრად გმობს რუსეთის მრიდან ეგრეთწოდებული შეთანხმების „მოკავშირეობა და ინტეგრაცია“ რატიფიკაციას სამხრეთ ოსეთის თვითაღიარებულ რესპუბლიკასთან და აღნიშნულ ნაბიჯს აფასებს რუსეთის ფედერაციის მხრიდან საერთაშორისო სამართლის მორიგ  უხეშ დარღვევად.

წითელუბანისა და ორჭოსანის დასახლებულ პუნქტებთან მიმდებარე ტერიტორიებზე შეჭრა რაც ამჟამად ხდება, ადასტურებს რუსეთის ფედერაციის მხრიდან რეგიონში მცოცავი ანექსიის  ფაქტს.

საქართველოს ტერიტორიული მთლიანობის და სუვერენიტეტის დარღვევა, ყირიმის ავტონომიური რესპუბლიკის ანექსია და აღმოსავლეთ უკრაინაში მიმდინარე აგრესია ანადგურებენ მსოფლიო უსაფრთხოების თანამედროვე სისტემას.

უკრაინა გმობს რუსეთის მხრიდან ამგვარ მიზანმიმართულ ქმედებებს და მტკიცე მხარდაჭერას უცხადებს საერთაშორისოდ აღიარებულ საზღვრების ფარგლებში  საქართველოს ტერიტორიულ მთლიანობას და სუვერენიტეტს და მოუწოდებს საერთაშორისო საზოგადოებას აფხაზეთისა და ცხინვალის რეგიონის ანექსიის საწინააღმდეგოდ კონსოლიდაციისკენ“, - ნათქვამია უკრაინის საგარეო უწყების განცხადებაში.

ცნობისთვის, 10 ივლისს, რუსეთის საოკუპაციო ძალების მიერ, გორის რაიონის სოფელ წითელუბნისა და ოკუპირებული ახალგორის რაიონის სოფელ ორჭოსანის მიმდებარე ტერიტორიაზე, თბილისი-გორის ცენტრალური ავტომაგისტრალის სიახლოვეს ე.წ. ,,საზღვრის“ აღმნიშვნელი ბანერები უკანონოდ იქნა აღმართული. ორივე ტერიტორიის სიახლოვეს ბაქო-სუფსას მილსადენის გარკვეული სეგმენტები მდებარეობს და განხორციელებული უკანონო ქმედებით სოფელ ორჭოსანის მიმდებარე ტერიტორიაზე ნავთობსადენის გარკვეული ნაწილი ოკუპირებულ ტერიტორიაზე მოექცა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

გამოკითხულ ამერიკელთა აბსოლუტური უმრავლესობა — 66% პირდაპირ თანაუგრძნობს და მხარს უჭერს უკრაინას რუსეთთან ომში ხოლო ამომრჩეველთა 65% უკრაინას აშშ-ის მოკავშირედ ან მეგობრად მიიჩნევს

ილონ მასკმა უკრაინული და ამერიკული ელიტები ომის გზით გამდიდრებაში დაადანაშაულა

საფრანგეთმა ახალი საპროტესტო აქციების წინ 70 000 ძალოვანის მობილიზება განახორციელა

რუსეთის თავდაცვის ინდუსტრიასთან დაკავშირებულმა კომპანიებმა წარმოების ჩინეთში გადატანა დაიწყეს