2018-11-30 12:12:08, 823 ნახვა

---

პედიატრიული მიმართულების გაფართოებასთან დაკავშირებით „ნიუ ჰოსპიტალსს“, „მეიოს კლინიკის“ და „არპაჟონის საავადმყოფოს“ დელეგაციები ეწვივნენ

27-30 ნოემბერს, „ნიუ ჰოსპიტალსს“ ბავშვთა ჯანმრთელობის ცენტრის გახსნასთან დაკავშირებით, ამერიკის საუკეთესო ჰოსპიტალის - „მეიოს კლინიკის“ დელეგაცია და „არპაჟონის ცენტრალური ჰოსპიტალის“ გენერალური დირექტორი, სედრიქ ლუსიე ეწვივნენ. ვიზიტის მიზანია მსოფლიოს წამყვანი კლინიკების ექიმებმა მონაწილეობა მიიღონ „ნიუ ჰოსპიტალსის“ მულტიდისციპლინური პედიატრიული სამსახურის ჩამოყალიბებაში და სამედიცინო პერსონალს გაუზიარონ მნიშვნელოვანი გამოცდილება.

„ნიუ ჰოსპიტალსში“ „მეიოს კლინიკის” წარმომადგენლებმა ბავშვთა კრიტიკული და გადაუდებელი დახმარების თემებზე სემინარი გამართეს, რომელსაც უძღვებოდნენ „მეიოს კლინიკის“ ტოპ-სპიკერები და რეანიმატოლოგები, ზოგადი და ტრავმა ქირურგი - ბეთსი ბელინჯერი, კარდიოანესთეზიოლოგი - მეთიუს რიტერი, ანესთეზიოლოგი - ბრენდონ ვანთა და ქირურგი - მარიელა რივერა. სემინარი „ნიუ ჰოსპიტალსის“ ბავშვთა კრიტიკული მედიცინის განყოფილების ექიმებისა და ანესთეზიოლოგების ჩატარდება და მასზე წარმოდგენილი იყო ისეთი მნიშვნელოვანი საკითხები, როგორიც არის ანესთეზია და პოსტოპერაციული მკურნალობა ჰეპატო-ბილიარული და თორაკალური ოპერაციების დროს, ჰიპოვოლემიის შეფასების რადიოლოგიური და სხვა თანამედროვე მეთოდები და ძვლისშიდა ინფუზიები ბავშვებში; სემინარი ასევე მოიცავდა PFCCS & FCCS კურსების განახლებულ ვერსიას.  
29 ნოემბერს, „ნიუ ჰოსპიტალსს“ და „არპაჟონის ცენტრალურ ჰოსპიტალს“ შორის ურთიერთთანამშრომლობის მემორანდუმს საზეიმოდ მოეწერა ხელი, „ნიუ ჰოსპიტალსის“ დირექტორის, გიორგი რამიშვილისა და „არპაჟონის ჰოსპიტალის“ დირექტორის, ღონისძიების საპატიო სტუმრის, სედრიქ ლუსიეს მიერ. მემორანდუმის თანახმად, „ნიუ ჰოსპიტალსის“ პედიატრიული მიმართულების ექიმები კვალიფიკაციის ასამაღლებლად საფრანგეთში გაემგზავრებიან, ხოლო ფრანგი სპეციალისტები „ნიუ ჰოსპიტალს“ ეწვევიან. 

ამავე ვიზიტის ფარგლებში, გაიმართა კონფერენცია, რომელიც პედიატრიის აქტუალური საკითხების განხილვას მიეძღვნა და „ნიუ ჰოსპიტალსის“ პედიატრიული მიმართულების და სხვადასხვა დარგის მოწვეული პედიატრებისთვის ლექციების ჩატარებას გულისხმობდა. კონფერენცია მოიცავდა ისეთ მნიშვნელოვან თემებს, როგორიცაა უცნობი ეტიოლოგიის ცხელება, სეფსისი და  გასტროენტერიტი ბავშვებში. 

„ნიუ ჰოსპიტალსის“ ბავშვთა ჯანმრთელობის ცენტრი ახალი, გაზრდილი ფორმატით, პაციენტებს 2019 წლის იანვრიდან მიიღებს და მასში ფუნქციონირებას დაიწყებს ბავშვთა კრიტიკული და გადაუდებელი მედიცინის ცენტრი. ასევე, ამოქმედდება ბავშვთა ორთოპედიული, კარდიოლოგიური, ნეიროქირურგიული, ჰემატოლოგიური და ლაპარასკოპიული ქირურგიის მიმართულებები; გაიხსნება ძვლის ტვინის ტრანსპლანტაციის ცენტრი და ახალშობილთა ქირურგიის განყოფილება. „ნიუ ჰოსპიტალსის“ ბავშვთა ჯანმრთელობის ცენტრის გუნდი დარგის საუკეთესო სპეციალისტებით იქნება დაკომპლექტებული და პაციენტებს 24 საათის მანძილზე გაუწევს ქვეყნის მასშტაბით საუკეთესო პედიატრიულ მომსახურებას. 

 

(R)

---

ავტორი: ,

---

დღის თემა

მთავარი თემა

ინტერვიუ - ექსკლუზივი