აშშ რუსეთში მშვიდობიანი დემონსტრანტების დაკავებას გმობს და მათ გათავისუფლებას ითხოვს

2018-05-06 12:05:38, 2069 ნახვა

მსოფლიო

ამერიკის შეერთებული შტატები რუსეთში მშვიდობიანი მოქალაქეების დაკავებას გმობს და მათ გათავისუფლებას ითხოვს. ამის შესახებ აშშ-ის სახელმწიფო დეპარტამენტის პრესსპიკერ ჰიზერ ნაუერტის მიერ Twitter-ით გავრცელებულ განცხადებაშია ნათქვამი.

„ის პოლიტიკური ლიდერები, რომლებიც საკუთარ ლეგიტიმურობაში დარწმუნებულები არიან, არ აპატიმრებენ მშვიდობიან მოქალაქეებს აქციაში მონაწილეობის გამო“, – წერია ნაუერტის განცხადებაში.

მანამდე რუსეთში გუშინ გამართული აქციების მონაწილეთა დაკავება ევროკავშირშიც დაგმეს. ბრიუსელში მიიჩნევენ, რომ ეს ქმედება გამოხატვის და შეკრების თავისუფლებას საფრთხეს უქმნის.

შეგახსენებთ, რომ აქციები "ის ჩვენი მეფე არ არის" რუსეთის ათობით ქალაქში პუტინის მორიგ ინაუგურაციამდე ორი დღით ადრე, 5 მაისს გაიმართა. ოფიციალური მონაცემებით, პოლიციამ 1 597 ადამიანი დააკავა. აქტივისტების უმეტესობა მოსკოვში დააპატიმრეს.

The United States condemns #Russia’s detention of hundreds of peaceful protestors and calls for their immediate release. Leaders who are secure in their own legitimacy don't arrest their peaceful opponents for protesting.
— Heather Nauert (@statedeptspox) 5 мая 2018 г.