სოციალური ქსელის „ფეისბუქის“ ხელმძღვანელი მარკ ცუკერბერგი აშშ-ის სენატის იურიდიული კომიტეტისა და ვაჭრობის საკითხების კომიტეტის წინაშე წარსდგა.

BBC-ის  ცნობით, კონგრესში დაგეგმილი ორი მოსმენიდან ცუკერბერგმა პირველზე ჩვენება ისე მისცა, რომ ახალი რეგულაციების მხარდაჭერის ან სოციალური ქსელის მართვის სტილში რაიმე ცვლილების შესახებ დაპირება არ გაუკეთებია.

ცუკერბერგმა ბრიტანული ანალიტიკური კომპანია „კემბრიჯ ანალიტიკის“ საქმესთან დაკავშირებით კონგრესმენების შეკითხვებს უპასუხა. ბრალდების მიხედვით “ფეისბუქმა” ამ კომპანიას 87 მილიონი მომხმარებლის პირად მონაცემებთან წვდომის საშუალება მისცა.

დაკითხვაში, რომელიც თითქმის ხუთ საათს გაგრძელდა, მონაწილეობას 44 სენატორი იღებდა. ცუკერბერგმა საბოდიშო განცხადებები არაერთხელ გააკეთა და ხაზი გაუსვა, რომ პასუხისმგებლობას სრულად საკუთარ თავზე იღებს.

„ჩვენ ბევრი შეცდომა დავუშვით. ვფიქრობ, წარმოუდგენელია, დააარსო კომპანია სასწავლებლის საერთო საცხოვრებელში, შემდეგ ამ მასშტაბებამდე გაზარდო და ამ პროცესში შეცდომები არ დაუშვა. რადგანაც ჩვენი სერვისი ადამიანების ერთმანეთთან დაკავშირებასა და ინფორმაციის გაცვლას ემსახურება, შეცდომებიც მრავალფეროვანი იყო“, – მიმართა კონგრესმენებს ცუკერბერგმა.

 ცუკერბერგის თქმით, „ფეისბუქის“ თანამშრომლები რუსეთის მიერ დაფინანსებულ ჯგუფებთან „შეიარაღებულ ბრძოლაში“ არიან ჩართული.

„ამ ჯგუფებს სურთ, სოციალური ქსელი საზოგადოებრივ აზრსა და არჩევნების შედეგებზე გავლენის მოხდენის მიზნით გამოიყენონ“, - განაცხადა ცუკერბერგმა.

მისივე თქმით, ბოლო ზომა იყო ხელოვნური ინტელექტის დამკვიდრება, რომელსაც ყალბი პროფილების იდენტიფიცირება შეუძლია.

მოსმენაზე ცუკერბერგმა განაცხადა, რომ ახლა კომპანია უფრო მზადაა არჩევნებში უცხო ქვეყნების ჩარევის თავიდან ასაცილებლად.

მისივე თქმით, 2018 წელს Facebook-ში დაახლოებით 20 ათასი ახალი თანამშრომელი იმუშავებს, რომელიც უსაფრთხოებაზე იქნება პასუხიმგებელი.

11 აპრილს მარკ ცუკერბერგი წარმომადგენელთა პალატის ენერგეტიკისა და ვაჭრობის კომიტეტების წინაშეც წარდგება.

შეგახსენებთ, ბრიტანული კომპანიის „კემბრიჯ ანალიტიკას“ გარშემო სკანდალი მას შემდეგ აგორდა, რაც ცნობილი გახდა, რომ მისი მომსახურებით დონალდ ტრამპის საარჩევნო შტაბი სარგებლობდა.

ავტორი: ,

სოციალური ქსელები

ტრამპი: რუსეთი დათანხმდა დაპატიმრებული ამერიკელი საზღვაო ქვეითის გაცვლის გარეშე გათავისუფლებას

გერმანია განიხილავს რუსეთში დრონების მწარმოებლების წინააღმდეგ კიბერშეტევების განხორციელების ნებართვის მინიჭებას

ნასვამი და ნარკოტიკული თრობის ქვეშ მყოფი მძღოლების წინააღმდეგ ბრძოლა მკაცრდება - სტრატეგია

უკანა სავარძელზე ღვედი და სკოლამდელი ბავშვებისთვის სპეცსავარძლების გამოყენება სავალდებულო გახდება