რუსეთის საგარეო საქმეთა მინისტრის სერგეი ლავროვის განცხადებით, რუსეთი დასავლეთის უტიფრობას არ მოითმენს და დიპლომატების გაძევებას უპასუხებს, - ამის შესახებ BBC იუწყება.

როგორც ლავროვმა აღნიშნა, როდესაც დიპლომატებს ქვეყანას ატოვებინებენ, ეს კოლოსალური ზეწოლის შედეგია.

„ვუპასუხებთ, ეჭვი არ შეგეპაროთ. ვინაიდან, ასეთი უტიფრობის მოთმენა არავის სურს, არც ჩვენ ვაპირებთ ამის მოთმენას. სხვადასხვა ქვეყნიდან ელჩების გაძევება ხდება, ეს იმაზე მეტყველებს, რომ ჩვენ მართლები ვიყავით, როდესაც რამდენჯერმე განვაცხადეთ - თანამედროვე ევროპაში ძალიან ცოტა დამოუკიდებელი ქვეყანა დარჩა. როდესაც დიპლომატებს ქვეყანას ატოვებინებენ, ნათელია, რომ ეს კოლოსალური ზეწოლის და კოლოსალური შანტაჟის შედეგია, რომელიც ვაშინგტონის მთავარი იარაღიაა საერთაშორისო არენაზე“, - განაცხადა ლავროვმა.

ცნობისთვის, 20-მა ქვეყანამ რუსი დიპლომატების გაძევების გადაწყვეტილება მიიღო.

საფრანგეთი 4 რუს დიპლომატს გააძევებს, გერმანია 4-ს, უკრაინა 13-ს, ჩეხეთი 3-ს, ლატვია 1-ს, ლიტვა 3-ს, იტალია 2-ს, ფინეთი 1-ს, რუმინეთი 1-ს, დანია  2-ს, ესტონეთი 1-ს, ნიდერლანდები 2-ს, პოლონეთი 4-ს, ხორვატია 1-ს. ასევე, დიპლომატის გაძევების გადაწყვეტილება კანადამაც მიიღო. ქვეყანა 4 რუს დიპლომატს აძევებს. რაც შეეხება ამერიკის შეერთებულ შტატებს, ტრამპის გადაწყვეტილებით ქვეყნიდან 60 რუსი დიპლომატი იქნება გაძევებული და სიეტლში მდებარე რუსეთის გენერალური საკონსულო დაიხურება.

 შეგახსენებთ, 12 მარტს, ბრიტანეთის პრემიერმა ტერეზა მეიმ განაცხადა, რომ სერგეი სკრიპალის მოწამვლის უკან დიდი ალბათობით რუსეთი დგას. როგორც მან განმარტა, სკრიპალი და მისი ქალიშვილი მოწამლეს ნივთიერებით, რომელიც რუსეთში დამზადდა. აღნიშნულის გამო, ბრიტანეთი ქვეყნიდან 23 რუსი დიპლომატის გაძევებას გეგმავს. მოგვიანებით ბრალდებებს რუსეთის საგარეო საქმეთა სამინისტრო გამოეხმაურა. უწყების პრესსპიკერმა მარია ზახაროვამ ტერეზა მეის გამოსვლას "საცირკო შოუ" უწოდა. განცხადება ასევე საგარო უწყების ხელმძღვანელმა სერგეი ლავროვმაც გააკეთა და აღნიშნა, რომ საპასუხოდ რუსეთიდან ბრიტანელ დიპლომატებს გააძევებენ.

სერგეი სკრიპალი და მისი შვილი იულია 4 მარტს დიდი ბრიტანეთის ქალაქ სოლსბერის სავაჭრო ცენტრში უგონო მდგომარეობაში იპოვეს და საავადმყოფოში გადაიყვანეს. პოლკოვნიკი სერგეი სკრიპალი 1999 წლამდე რუსეთის გენერალური შტაბის დაზვერვის მთავარ განყოფილებაში მუშაობდა. 2006 წელს მას ბრიტანეთის დაზვერვის სასარგებლოდ ჯაშუშობისთვის 13 წლით თავისუფლების აღკვეთა მიუსაჯეს. 2010 წელს ის რუსულ, ამერიკულ და ბრიტანულ სპეცსამსახურებს შორის გაცვლის ოპერაციის ფარგლებში შეიწყალეს.

ავტორი: ,

სოციალური ქსელები

„თეგეტამ“ რუსთავის ჭალის ტყის აღდგენისთვის გამწვანების აქცია გამართა

საპატრიარქომ იობის განათლება აღიარა და მას შესაბამისი ხარისხი მიანიჭა

აპრილში „ექსპრესნიუსი“ 1.7 მილიონჯერ წაიკითხეს, სოციალურ ქსელებში, ახალ ამბებს 11 მილიონი ადამიანი გაეცნო

რუსეთის ტერიტორიის მეოთხედი და მოსახლეობის 70% უკრაინული დრონების მოქმედების რადიუსში იმყოფება