საგანგებო სიტუაციების კოორდინაციისა და გადაუდებელი დახმარების ცენტრის დირექტორმა, ავთანდილ თალაკვაძემ უწყების საქმიანობის შესახებ ანგარიში წარადგინა.

მან რეგიონებში გადაუდებელი სამედიცინო დახმარების მიმართულებით განხორციელებული პროექტები გამოჰყო.

უწყების ხელმძღვანელის განცხადებით, რეგიონებში სასწრაფო სამედიცინო დახმარების ავტოპარკი სრულად - ევროკავშირის სტანდარტების შესაბამისი, სამედიცინო ინვენტარით აღჭურვილი, 220 სპეცმანქანით განახლდა. ამ ცვლილებისა და ეკიპაჟების ოპტიმიზაციის შედეგად კი, გამოძახებებზე რეაგირების დრო მნიშვნელოვნად შემცირდა. სტატისტიკური მონაცემების მიხედვით, გამოძახებათა 68%-ზე სასწრაფო სამედიცინო დახმარების ეკიპაჟი ადგილზე 15 წუთზე ნაკლებ დროში მიდის. მანვე ყურადღება პერსონალისთვის სამუშაო პირობების გაუმჯობესების მიმართულებით განხორციელებულ და დაგეგმილ ღონისძიებებზე გაამახვილა. ავთანდილ თალაკვაძის თქმით, წინა წლებთან შედარებით გაუმჯობესებულია პერსონალის შრომითი ანაზღაურება, სამუშაო პირობები და გადაუდებელი სამედიცინო დახმარების ხარისხის ზრდის პარალელურად, მნიშვნელოვანია, მათი ანაზღაურება კიდევ გაიზარდოს. ამასთანავე, ადგილობრივი მუნიციპალიტეტების, რეგიონული განვითარებისა და ინფრასტრუქტურის სამინისტროს ჩართულობით, სასწრაფოს რაიონული ცენტრებისთვის 40 ახალი ნაგებობა აშენდება. ამათგან 17 ცენტრის სამშენებლო სამუშაოები უკვე მიმდინარეობს და ამავე წლის მაისში დასრულდება.

ავთანდილ თალაკვაძემ მოხსენების დასკვნით ნაწილში სასწრაფო სამედიცინო დახმარების პერსონალს მადლობა გადაუხადა. „მინდა მივმართო საგანგებო სიტუაციების კოორდინაციისა და გადაუდებელი დახმარების ცენტრის თითოეულ თანამშრომელს. ადამიანებს, ვინც უწყვეტ რეჟიმში ზრუნავენ თითოეული ჩვენგანის ჯანმრთელობასა და კეთილდღეობაზე. თქვენ მუდმივად ხართ ჩვენი მოქალაქეების სიცოცხლის სადარაჯოზე და ამ თავდადებისთვის გიხდით გულითად მადლობას!“, - აღნიშნა მან.

რეგიონებში სასწრაფო დახმარების სისტემა სახელმწიფო აუდიტის სამსახურის წარმომადგენელმაც შეაფასა. გენერალური აუდიტორის მოადგილის, დავით გოგიჩაიშვილის განმარტებით, გადაუდებელი სამედიცინო დახმარების მიწოდება გაუმჯობესებული, ხოლო უწყების მიერ ცენტრის მიმართ გაცემული ყველა რეკომენდაცია - შესრულებულია.

მონაცემების პრეზენტაცია ჯანდაცვისა და საფინანსო-საბიუჯეტო კომიტეტების სახელმწიფო აუდიტის სამსახურის ანგარიშების განმხილველი სამუშაო ჯგუფის ერთობლივ შეხვედრაზე შედგა. განხილვის პროცესს შრომის, ჯანმრთელობისა და სოციალური დაცვის მინისტრის მოადგილე ზაზა სოფრომაძე, საგანგებო სიტუაციების კოორდინაციისა და გადაუდებელი დახმარების ცენტრის დირექტორის მოადგილე დავით ტორუა და სხვა ოფიციალური პირები ესწრებოდნენ.

(NS)

ავტორი: ,

სოციალური ქსელები

გერმანია ევროკავშირში რუსებისთვის შესვლის ახალი შეზღუდვების დაწესებას ითხოვს

მიიღეთ 30%-იანი ქეშბექი მეტრომარტში საქართველოს ბანკის ნაწილ-ნაწილ გადახდისას

გიორგი პატარიძე: ღარიბაშვილთან მიმართებით დამატებითი პაემნით წახალისების შესახებ სამართლებრივი აქტი არ გამოუცია, შესაბამისად, პაემანი ვერც ჩაინიშნებოდა და ვერც გაუქმდებოდა

ლევან ხაბეიშვილი - სულაც არ გამიკვირდება, კობახიძემ სცადოს ბიძინას განეიტრალება