„საქართველო ევროპის განუყოფელი ნაწილია, რომლისთვისაც ევროკავშირს გასაოცარი მიზიდულობის ძალა გააჩნია" - ამის შესახებ საქართველოს ვიცე-პრემიერმა, საგარეო საქმეთა მინისტრმა მიხეილ ჯანელიძემ საერთაშორისო კონფერენციაში - „საქართველოს ევროპულ გზა - რეგიონული სტაბილურობის უზრუნველყოფა" გამოსვლისას განაცხადა.

მისი თქმით, საქართველოს ევროკავშირთან დემოკრატიის, კანონის უზენაესობისა და ადმიანის უფლებათა ღირებულებებთან ერთად, საერთო გამოწვევები და რისკებიც აერთიანებს, რომლებიც უპირველესად უსაფრთხოებას უკავშირდება. როგორც მიხეილ ჯანელიძემ აღნიშნა, საქართველო არა მხოლოდ მიესალმება ევროკავშირის უსაფრთხოების განმტკიცების  სტრატეგიას, არამედ მზადაა თავისი წვლილი შეიტანოს ამ მიმართულებით. კერძოდ, საქართველო აქტიურად თანამშრომლობს როგორც ევროკავშირთან, ისე ნატოსთან შავი ზღვის რეგიონის უსაფრთხოების გაძლიერების  მიზნით. 

„მინდა სიამაყით აღვნიშნო საქართველოს ღირსეული გამოცდილება, რომელიც მან, როგორც საერთაშორისო უსაფრთხოების პროვაიდერმა, ავღანეთში ნატოს სამშვიდობო ოპერაციებსა და აფრიკის ქვეყნებში ევროკავშირის მისიებში ჩართულობით დააგროვა" - განაცხადა მიხეილ ჯანელიძემ. 

თავის გამოსვლაში, ვიცე-პრემიერმა განსაკუთრებული ყურადღება საქართველოს  გეოგრაფიულ მდებარეობასა და სატრანზიტო პოტენციალზე გაამახვილა. მინისტრის თქმით,  საქართველო მნიშვნელოვან სტრატეგიულ როლს ასრულებს, რადგან სწორედ საქართველოს გავლით უნდა მოხდეს ბუნებრივი რესურსების ევროპაში ტრანსპორტირება. როგორც მიხეილ ჯანელიძემ განაცხადა, საქართველო უკვე წლებია აქტიურადაა ჩართული ბაქო-თბილისი-ჯეიჰანის , სამხრეთ-კავკასიური გაზსადენისა და ბაქო-თბილისი-სუფსის ნავთობსადენის საერთაშორისო პროექტებში, რომელთა მეშვეობითაც კასპიის ზღვიდან ევროპულ ბაზარზე ნახშირწყალბადის რესურსების  მიწოდება შეუფერხებლად ხორციელდება.

მინისტრმა სამხრეთ გაზის დერეფნის პროექტის განსაკუთრებულ მნიშვნელობაზეც ისაუბრა, რომლის ერთ-ერთი მოთამაშე საქართველოა. ეს პროექტი, რომელშიც საქართველო ტრანზიტული ქვეყნის როლს ასრულებს, ევროკავშირის ენერგეტიკულ უსაფრთხოებას ემსახურება და აზერბაიჯანის ბუნებრივი აირის ევროპის ბაზარზე მიწოდებას ითვალისწინებს. კერძოდ, ბუნებრივი აირი, ტრანს–ანატოლიის გაზსადენის გავლით, ტრანს–ადრიატიკულ გაზსადენს შეუერთდება, ეს უკანასკნელი კი საბერძნეთსა და იტალიაში ბუნებრივი აირის ტრანსპორტირებას მოახდენს.

მიხეილ ჯანელიძის თქმით, აღნიშნულ პროექტებში მონაწილეობით, საქართველო, როგორც სატრანზიტო ქვეყანა, კიდევ ერთხელ ადასტურებს, რომ ის „საიმედო პარტნიორი და ევროპის ენერგოუსაფრთხოების სისტემის მნიშვნელოვანი რგოლია".

ქ. ბათუმი 13-14 ივლისს რიგით მე-14 საერთაშორისო კონფერენციას - „საქართველოს ევროპულ გზა - რეგიონული სტაბილურობის უზრუნველყოფა" მასპინძლობს. კონფერენცია ფოკუსირებულია ევროპული დღის წესრიგის მთავარ საკითხებზე, მათ შორის, ევროპის უსაფრთხოების თანამედროვე არქიტექტურაზე, ასევე, ევროკავშირსა და მის ასოცირებულ პარტნიორ ქვეყნებს შორის თანამშრომლობის ახალ ფორმებზე და საქართველოს როლის მნიშვნელობაზე რეგიონალური სტაბილურობის უზრუნველყოფაში.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

მოსკოვის ნავთობგადამამუშავებელი ქარხანა კიდევ უფრო დაზიანდა ერთი კვირის განმავლობაში მეორეჯერ თავდასხმის შედეგად.

დიდმა ბრიტანეთმა, გერმანიამ და ნატოს კიდევ ხუთმა ქვეყანამ უკრაინას ასობით მილიონი დოლარის ღირებულების დრონებისა და რაკეტების ახალი მიწოდება დაჰპირდნენ

ცოლის ინფორმაციით, ბაქოს სააპელაციო სასამართლომ აფგან სადიგოვი პატიმრობაში დატოვა

ურეკში 4 ადამიანი ზღვის დინებამ წაიღო, მაშველებმა 4-ვე გამოიყვანეს, თუმცა 1 დაიღუპა