მოსამართლეობის კანდიდატებთან დაკავშირებით, ევროსაბჭოში დოკუმენტაციის გაგზავნა, სავარაუდოდ, კვირის ბოლომდე დასრულდება

2017-06-07 12:39:59, 2210 ნახვა

სამართალი

საქართველოს იუსტიციის მინისტრის თეა წულუკიანის განცხადებით, სტრასბურგის სასამართლოში საქართველოდან ასარჩევი მოსამართლეობის კანდიდატებთან დაკავშირებით საბუთები მზადდება.

როგორც წულუკიანმა ჟურნალისტებს განუცხადა, მთავრობის მიერ შერჩეულ სამ კანდიდატთან დაკავშირებით ევროსაბჭოში შესაბამისი დოკუმენტაციის გაგზავნა, სავარაუდოდ, ამ კვირის ბოლომდე დასრულდება.

„მთავრობამ დაამტკიცა სამი კანდიდატი, ბატონი ლადო ჭანტურია, ქალბატონი სოფიო ჯაფარიძე და ბატონი შოთა გეწაძე. მზადდება თითოეულ მათგანთან დაკავშირებით შესაბამისი დოკუმენტაცია, რომელსაც მათგან ითხოვს ევროპის საბჭო. მზადდება სახელმწიფოს მხრიდან საბუთები გასაგზავნად. ალბათ, ამ კვირის ბოლომდე დასრულდება გადაგზავნის პროცესი. შემდეგ გველის წინ სამეტაპიანი პროცედურა, პირველი არის ძირითადად სტრასბურგის ყოფილი მოსამართლეებისგან შემდგარი ფილტრაციის კომიტეტი, რომელმაც საბუთების მიხედვით უნდა დაახასიათოს და შეაფასოს თითოეული მათგანი. შემდეგ თვითონ საპარლამენტთაშორისო ასამბლეის კომიტეტი, სადაც გვყავს ქალბატონი ეკა ბესელია წევრად. იქ მოხდება სიის დასაშვებობაზე მსჯელობა, დასაშვებობის შემთხვევაში, კანდიდატებთან გასაუბრება და ერთი, ან მეტი კანდიდატისთვის რეკომენდაციის მიცემა, კენჭი ეყაროს შემოდგომაზე ასამბლეაზე ამ სამ კანდიდატურას“,-განაცხადა თეა წულუკიანმა.

ცნობისთვის, მთავრობამ სტრასბურგის მოსამართლეობისთვის ლადო ჭანტურიას, სოფიო ჯაფარიძის და სოსო გეწაძის კანდიდატურები შეარჩია.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან