ოკუპირებულ სამხრეთ ოსეთში ე.წ საპრეზიდენტო არჩევნებში გამარჯვებულ ანატოლი ბიბილოვს საქართველოს კიდევ ერთი ოკუპირებული რეგიონის, აფხაზეთის დე-ფაქტო პრეზიდენტმა რაულ ხაჯიმბამ და რუსეთის ფედერაციის პრეზიდენტმა ვლადიმერ პუტინმა უკვე მიულოცეს, - ამის შესახებ "სპუტნიკ-ოსეტია" იუწყება.

მედია საშუალების ინფორმაციით, ხაჯიმბამ გამოთქვა სურვილი, რომ სამხრეთ ოსეთთან ურთიერთობები კიდევ უფრო გაძლიერდეს.

"აფხაზეთის მოსახლეობა დიდ სითბოს ავლენს ოსეთის რესპუბლიკის მიმართ. დარწმუნებული ვარ, რომ მომავალში ჩვენ შევძლებთ ნაყოფიერად ვიმუშაოთ იმაზე, რომ ჩვენი სახელმწიფოები წინ წავიდნენ და მოსახლეობამ თავი კარგად იგრძნოს, მათ შორის შევძლებთ სხვადასხვა სფეროების განვითარებას. აუცილებლად უნდა ვითანამშრომლოთ ჩვენი ქვეყნების რეგიონული სტაბილურობისა და უსაფრთხოების სფეროებშიც", - ნათქვამია აფხაზეთის დე-ფაქტო პრეზიდენტის განცხადებაში.

რაც შეეხება ვლადიმერ პუტინს, მან ოკუპირებული ცხინვალის ახლადარჩეულ ე.წ პრეზიდენტს წარმატებები უსურვა და დასძინა, რომ რუსეთი მომავალშიც დაეხმარება სამხრეთ ოსეთს თავდაცვის სფეროში.

"გილოცავთ ამ წარმატებას და საპრეზიდენტო არჩევნებში დამარწმუნებელ გამარჯვებას. სიამოვნებით აღვნიშნავ, რუსულ-სამხრეთ ოსურ ტრადიციულ მეგობრობას. დარწმუნებული ვარ, რომ თქვენი ინაუგურაციის შემდეგ, რუსეთსა და სამხრეთ ოსეთს შორის ურთიერთობები, რომლებიც დაფუძნებულია თანამშრომლობისა და ინტეგრაციის პრინციპებზე, კიდევ უფრო გაუმჯობესდება და განვითარდება", - ნათქვამია ვლადიმერ პუტინის განცხადებაში.

ცნობისთვის, დე-ფაქტო საპრეზიდენტო არჩევნებში ე.წ პარლამენტის სპიკერმა ანატოლი ბიბილოვმა გაიმარჯვა. ბიბილოვის გარდა, კენჭს მოქმედი ე.წ პრეზიდენტი ლეონიდ თიბილოვი და "კე-გე-ბე"-ს თანამშრომელი ალან გაგლოევი იყრიდნენ.

შეგახსენებთ, რომ 9 აპრილს ოკუპირებულ რეგიონში დე-ფაქტო საპრეზიდენტო არჩევნები გაიმართა. "არჩევნების" გარდა, ოკუპირებულ სამხრეთ ოსეთში ე.წ რეფერენდუმიც ჩატარდა, სახელის შეცვლასთან დაკავშირებით.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ვენესუელაში მიწისძვრის შედეგად დაღუპულთა რიცხვი 235-მდე გაიზარდა, 50 000 დაკარგულად ითვლება

კობახიძე: კორუფცია ხელისუფლების ზედა ეშელონებში პრინციპულად აღმოფხვრილი, დამარცხებულია

ე.წ. სააფთიაქო ნარკომანიის საქმეზე ჯანდაცვის მინისტრის ყოფილი მოადგილე დააკავეს

NGO-ები: წლებია, წამებას და არასათანადო მოპყრობას სახელმწიფო პოლიტიკურ იარაღად იყენებს