პარლამენტის ბიუროს საკონსტიტუციო სასამართლოს მოსამართლის თანამდებობაზე კობახიძის კანდიდატურა ოფიციალურად წარედგინა
ფრაქცია "ქართული ოცნების" სახელით პარლამენტის ბიუროს საკონსტიტუციო სასამართლოს მოსამართლის თანამდებობაზე მანანა კობახიძის კანდიდატურა ოფიციალურად წარედგინა.
პარლამენტის საპროცედურო საკითხთა და წესების კომიტეტის თავმჯდომარის, გიორგი კახიანის განმარტებით, მანანა კობახიძეს მოსამართლის თანამდებობაზე არჩევამდე იურიდიულ საკითხთა კომიტეტში მოუსმენენ. მისივე განმარტებით, სურვილის შემთხვევაში მასთან შეხვედრის შესაძლებლობა ექნებათ ფრაქციებს.
საკონსტიტუციო სასამართლოს მოსამართლეს პარლამენტი პლენარულ სხდომაზე ხმათა უმრავლესობით ირჩევს. მანანა კობახიძესთან დაკავშირებით დეპუტატები გადაწყვეტილებას საგაზაფხულო სესიის დაწყებისას მიიღებენ.
ავტორი: ირაკლი მანაგაძე , ექსპრესნიუსის რეპორტიორი 2009 წლიდან
epn.ge (@expressnews.ge)
