ქალთა მიმართ ძალადობის აღმოფხვრის საერთაშორისო დღესთან დაკავშირებით საინფორმაციო შეხვედრა შრომის, ჯანმრთელობისა და სოციალური დაცვის მინისტრის მოადგილემ, ვალერი კვარაცხელიამ გახსნა.

მინისტრის მოადგილემ სახელმწიფო სერვისების შესახებ ისაუბრა და ყურადღება პრევენციული ღონისძიებების მნიშვნელობაზე გაამახვილა.

შეხვედრაზე ადამიანით ვაჭრობის (ტრეფიკინგის) მსხვერპლთა დაზარალებულთა დაცვისა და დახმარების სახელმწიფო ფონდის დირექტორმა, თამარ ბარკალაიამ ფონდის წლიური ანგარიში წარმოადგინა. უწყების ხელმძღვანელმა ყურადღება ძალადობის აღკვეთის მიმართულებით საზოგადოების ჩართულობის როლზე გაამახვილა.

„25 ნოემბერი არის ქალთა მიმართ ძალადობის აღმოფხვრის საერთაშორისო დღე, ასევე იწყება 16 დღიანი კამპანია, რომელიც გენდერული ძალადობის წინააღმდეგ ბრძოლას გაუსვამს ხაზს. სახელმწიფო ფონდის ბაზაზე, 16 დღის განმავლობაში, სხვადასხვა ქალაქში ქუჩის აქციები გაიმართება, სადაც ხალხს მიეწოდება ინფორმაცია ცხელი ხაზის - 116 006-ის შესახებ, იმ სახელმწიფო სერვისების შესახებ, რომელიც ძალადობის მსხვერპლს მიეწოდება“, - აღნიშნა თამარ ბარკალაიამ.

საინფორმაციო შეხვედრის მონაწილეებმა ოჯახში ძალადობის კუთხით საერთაშორისო განვითარების პარტნიორების დახმარებაზე, სოციალური მუშაობის საკითხებზე, მისი წარმოშობის მიზეზებსა და სოციალურ შედეგებზე იმსჯელეს. შეხვედრის დასკვნით ნაწილში, სახელმწიფო ფონდის განახლებული ვებგვერდის პრეზენტაცია და ქალთა მიმართ ძალადობის წინააღმდეგ შექმნილი სოციალური  ვიდეორგოლის ჩვენება გაიმართა. მონაწილეებმა სიტყვით გამოსვლის შემდეგ ბანერზე ნარინჯისფერი ანაბეჭდი დატოვეს.

შეხვედრა ადამიანით ვაჭრობის (ტრეფიკინგის) მსხვერპლთა დაზარალებულთა დაცვისა და დახმარების სახელმწიფო ფონდის ინიციატივით, ილიას სახელმწიფო უნივერსიტეტის წიგნის სახლ „ლიგამუსში“ გაიმართა.

ძალადობის წინააღმდეგ მიმართული კამპანია დღეს დაიწყო და 10 დეკემბრამდე გაგრძელდება. თქვი არა, არა ძალადობას! - ქალთა მიმართ ძალადობის თემების აქტუალიზაციასა და ამ მიმართულებით მოსახლეობის ცნობიერების ამაღლებას ემსახურება.  

(NS)

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ჟურნალისტი გელა მთივლიშვილი წერს, რომ თავს დაესხნენ

ორბანმა უნგრეთის პრემიერ-მინისტრის თანამდებობა დატოვა

ზვიად მაისაშვილი: ორივე სპეცრაზმელმა აღიარა დანაშაული, ბოდიში მოიხადეს

ზურაბიშვილმა ევროკავშირის ელჩს დიუშენის მქონე ბავშვების დახმარების თხოვნით მიმართა