მერაბ ჭიქაშვილი გორგასლის ქუჩაზე მიწისძვრით დაზარალებული მოსახლეობის დახმარებას ითხოვს

2016-09-13 13:36:06, 675 ნახვა

პოლიტიკა

„ირმა ინაშვილი, დავით თარხან-მოურავი - საქართველოს პატრიოტთა ალიანსი, გაერთიანებული ოპოზიციის“ წევრი, კრწანისის მაჟორიტარი დეპუტატობის კანდიდატი მერაბ ჭიქაშვილი დედაქალაქის მერიას და მთაწმინდის გამგეობას მიმართავს.

მაჟორიტარი დეპუტატობის კანდიდატი გორგასლის ქუჩის 13 ნომერში მცხოვრები მოსახლეობის დახმარებას ითხოვს.

ჭიქაშვილის თქმით, მერია და მთაწმინდის გამგეობა დაზარალებულებს მხოლოდ მინიმალურ ქირას უხდის.

„ჩემს უკან გაჭირვებული ადამიანები დგანან, რომლებსაც 10 წლის წინ მიწისძვრის შედეგად საცხოვრებელი სახლები დაენგრათ. ჩვენ ახლა ვიმყოფებით ორთაჭალაში, გორგასლის ქუჩის 13 ნომერში, მეორე შესახვევში. აქ მცხოვრები 16 ოჯახის სახლი მიწისძვრამ პრაქტიკულად მიწასთან გაასწორა. ამ ადამიანების პრობლემა ვერც მაშინდელმა და ვერც მოქმედმა მთავრობამ არ და ვერ მოაგვარა. ეს ადამიანები ამ უბანში გაიზარდნენ, აქ ცხოვრობენ , მათი შვილები და შვილიშვილები აქ დადიან სკოლებში. მაშინდელი მერია მხოლოდ ქირის გადახდით შემოიფარგლა, რაც მოქმედმა მთავრობამ გააგრძელა. ქირის თანხმები არის ძალიან მინიმალური. ისმის კითხვა? რა ეშველება ამ ხალხს? როგორ შეიძლება ამ ადამიანების პრობლემა მოგვარდეს? აუშენდებათ თუ არა ამ ადამიანებს სახლი? კონკრეტული პასუხი არავისგან არ ისმის. მთაწმინდის არაკვალიფიციური და არაკომპეტენტური გამგეობის მხრიდან ხშირ შემთხვევაში ამ ადამიანების მისამართით ხმამაღალი საუბარი ისმის, კითხვებს სვამენ, რაღა გავაკეთოთ? რაღა გინდათ? ინვესტორი თქვენ მოიყვანეთ. დააკვირდით დაზარალებული მოსახლეობის სახეებს, ამათგან რომელი ერთი მოუყვანს მათ ინვესტორს, ან რომელი ინვესტორი მოვა, სადაც გვერდით, 5 მეტრში სააკაშვილის მამის ე.წ. ბალნეოლოგიური კურორტია. ქალაქის მერია და გამგეობა თუ კარგად არ გაიაზრებს რას აკეთებენ, ეს არა დახმარება, არამედ დანაშაული იქნება“,-განაცხადა მერაბ ჭიქაშვილმა.