გურიის რეგიონში „პაციენტის უფლებების კვირეული“ გაიმართა. საინფორმაციო შეხვედრები  ოზურგეთის და ჩოხატაურის მუნიციპალიტეტების მოსახლეობასთან ჩატარდა. მათ დეტალური ინფორმაცია მიეწოდათ  ჯანდაცვისა და სოციალურ  სერვისებთან დაკავშირებულ საკითხებზე.  

ოზურგეთის დემოკრატიული ჩართულობის ცენტრში გამართულ შეხვედრაზე „პაციენტის უფლებების ცხელი ხაზის“ წარმომადგენლებმა აუდიტორიას ცხელი ხაზის ( 2 103 003 )  სერვისების შესახებ დეტალური ინფორმაცია მიაწოდეს. ადგილობრივებს ასევე შეეძლოთ მოესმინათ  ინფორმაცია მათი, როგორც პაციენტის უფლებების შესახებ. მათ საშუალება ჰქონდათ გაცნობოდნენ   იმ წესებსაც, რომელთა მიხედვითაც უნდა იმოქმედონ სამედიცინო დაწესებულებებში არასათანადო მოპყრობის ან არადამაკმაყოფილებელი მომსახურების მიღების შემთხვევაში.

ანალოგიური ტიპის შეხვედრა 7 ივნისს ჩოხატაურის მუნიციპალიტეტის  მაცხოვრებლებთანაც გაიმართა.  როგორც ცხელი ხაზის წარმომადგენლებმა განაცხადეს,  მსგავსი შეხვედრების მიზანი მოსახლეობაში ინფორმირებულობის დონის გაზრდა და სამედიცინო სერვისების გაუმჯობესების ხელშეწყობაა. მათივე თქმით, კლინიკებში ნებისმიერი დარღვევის შემთხვევაში მოქალაქეებს  შეუძლიათ დარეკონ ნომერზე 2 103 003 და მოითხოვონ სავარაუდო გადაცდომაზე სწრაფი რეაგირება. ამასთან, ცხელი ხაზის ოპერატორები ნებისმიერ დაინერესებულ პირს  ამომწურავ კონსულტაციას უწევენ ჯანდაცვის საკითხებთან დაკავშირებულ ნებისმიერ თემაზე. 

„ცხელი ხაზი უკვე რამდენიმე წელია უწყვეტად მუშაობს და მთელი ამ დროის განმავლობაში ათასობით მოქალაქეს გაეწია კვალიფიციური მომსახურება. პრაქტიკამ აჩვენა, რომ მიუხედავად არაერთი საინფორმაციო რესურსისა, მოსახლეობაში პაციენტის უფლებების კუთხით ინფორმირებულობის დონე ძალიან დაბალია. ამის გამო,  ხშირია გადაცდომები ამათუიმ სერვისის მიღებისას. მოქალაქეებმა კი არ იციან როგორ დაიცვან თავიანთი უფლებები და რომელ უწყებას მიმართონ რეაგირებისთვის. სწორედ ამიტომ, ფონდ „ღია საზოგადოება - საქართველოს“ ფინანსური მხარდაჭერით, გადავწყვიტეთ,  საინფორმაციო კამპანია ჩაგვეტარებინა საქართველოს 5 რეგიონის 10 ქალაქში. „პაციენტის უფლებების კვირეული“ სამეგრელოს რეგიონიდან დავიწყეთ, შემდეგ იყო კახეთი და ამჯერად გურიაში ვიმყოფებოდით. კამპანია  მთელი წლის განმავლობაში გაგრძელდება. წლის ბოლოს კი, ეს ყველაფერი  დაგვირგვინდება „პაციენტისა და ექიმის დღის“ აღნიშვნით, რომელიც საქართველოში პირველად ჩატარდება „პაციენტის უფლებების ცხელი ხაზის ინიციატივით. გასვლითი შეხვედრების მონაწილეთა განსაკუთრებული ინტერესი გამოიწვია საყოველთაო ჯანდაცვის პროგრამით სარგებლობის დეტალებმა - რა შეღავათები ეკუთვნით, როგორ უნდა მიიღონ თანადაფინანსება და ა.შ. ასევე აინტერესებდათ როგორ ხდება სხვადასხვა სამედიცინო პროგრამაში ჩართვა (ც ჰეპატიტი, ძუძუს კიბოს სკრინინგი და ა.შ).“,- განაცხადა „პაციენტის უფლებების ცხელი ხაზის“ საზოგადოებასთან ურთიერთობის მენეჯერმა გიორგი ხუხიამ. 

ოზურგეთსა და ჩოხატაურში გამართული შეხვედრების ბოლოს ადგილობრივი მოხალისეების დახმარებით ქუჩებში მსვლელობა მოეწყო. „პაციენტის უფლებების ცხელი ხაზის“ მაისურებით ახალგაზრდებმა საინფორმაციო ბუკლეტები ქუჩებში მყოფ მოქალაქეებს დაურიგეს. ასევე, საზოგადოებრივი თავშეყრის ადგილებში საინფორმაციო პლაკატებიც განთავსდა. 

პროექტის ფინანსურ მხარდაჭერას ფონდი "ღია საზოგადოება - საქართველო" უზრუნველყოფს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

„როსსტატის“ მონაცემებით, ბენზინის ფასების ყოველკვირეული ზრდა ბოლო 20 წლის განმავლობაში ყველაზე დიდია

ზელენსკი: ბელარუსის საზღვარზე აპარატურამ, რომელიც რუსულ დრონებს აკორექტირებდა, მუშაობა შეწყვიტა

დროა: პენიტენციურმა პირობა დაარღვია და ხოშტარიასთან მისი მკურნალი ექიმი არ შეუშვა

ევროსაბჭოს საპარლამენტო ასამბლეამ საქართველოზე კრიტიკული რეზოლუცია მიიღო