თბილისის, ქუთაისისა და თელავის მუნიციპალიტეტებს შორის მემორანდუმი გაფორმდა

2016-04-11 13:28:29, 567 ნახვა

საზოგადოება

თბილისის, ქუთაისისა და თელავის მუნიციპალიტეტებს შორის ურთიერთთანამშრომლობის მემორანდუმი გაფორმდა.

როგორც „ექსპრესნიუსს“ თბილისის მერიიდან აცნობეს, შეთანხმება ერთიანი ელექტრონული სერვისების მიმართულებით გამოცდილების გაზიარებას ისახავს მიზნად.

დოკუმენტს ხელი თბილისის მერმა დავით ნარმანიამ, ქუთაისის მერმა შოთა მურღულიამ და თელავის მერმა პლატონ კალმახელიძემ მოაწერეს.

მემორანდუმის თანახმად, დედაქალაქის მერია ქუთაისისა და თელავის მუნიციპალიტეტებს გამოცდილებას ერთიანი ელექტრონული სერვისების განვითარებისა და ხელმისაწვდომობის, ერთიანი გეოსივრცითი მონაცემების ელექტრონული სისტემის დანერგვისა და ერთიანი ელექტრონული საქმისწარმოების მიმართულებით გაუზიარებს.

„თვითმმართველობების ეროვნული ასოციაციის ფორმატში, წევრ მუნიციპალიტეტებს ვეხმარებით, რომ სივრცითი ტერიტორიული განვითარების თვალსაზრისით მოხდეს ელექტრონული სერვისების დანერგვა. ჩვენთან აპრობირებული და პრაქტიკაში დანერგილი მექანიზმები დაეხმარება მათ, რომ ადგილობრივ მოსახლეობას უკეთ მოემსახურონ, ხელმისაწვდომი იყოს ის სერვისები, რომელსაც ადგილობრივები მუნიციპალიტეტისგან იღებენ“,- განაცხადა დავით ნარმანიამ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან