პროკურატურა ფარული ჩანაწერების საქმეზე კიდევ ერთ ყოფილ მაღალჩინოსანს ეძებს

2016-04-08 14:34:56, 856 ნახვა

სამართალი

საქართველოს მთავარი პროკურატურა პირადი ცხოვრების ამსახველ ჩანაწერებთან დაკავშირებულ საქმეზე კიდევ ერთ ყოფილ მაღალჩინოსანს ეძებს.

როგორც უწყებაში გამართულ პრესკონფერენციაზე პროკურორმა კოკა კაციტაძემ განაცხადა, პირადი ცხოვრების ამსახველი ჩანაწერების უკანონოდ მოპოვების ფაქტზე დაკავებული 5 პირის გარდა, შს სამინისტროს ქ.თბილისის მთავარი სამმართველოს ძველი თბილისის სამმართველოს მე-7 განყოფილების უფროსის ყოფილი მოადგილის, გიგლა შიოშვილის სამძებრო მოქმედებები მიმდინარეობს.

”გიგლა შიოშვილის დაკავება ვერ მოხერხდა, რადგან ის გამოძიებას მიემალა”, - აღნიშნა კაციტაძემ.

გარდა ამისა, უწყებაში აცხადებენ, რომ კონსტიტუციური უსაფრთხოების დაცვის დეპარტამენტის მე-6 სამმართველოს ყოფილ უფროსს გივი კაციტაძეს ბრალი დაუსწრებლად წარედგინა, რადგან მას საქართველოს საზღვრები დატოვებული აქვს და საგამოძიებო ორგანოში გამოცხადებას თავს არიდებს.

ცნობისთვის პროკურატურამ პირადი ცხოვრების ამსახველი ჩანაწერების უკანონოდ მოპოვების ფაქტზე 5 პირი დააკავა.

კერძოდ, პროკურატურის მიერ დაკავებულნი არიან შს სამინისტროს კონსტიტუციური უსაფრთხოების დაცვის დეპარტამენტის დირექტორის ყოფილი მოადგილე ვასილ ლელუაშვილი; ამავე დეპარტამენტის ქ.თბილისის მთავარი სამმართველოს ყოფილი უფროსი რევაზ შიუკაშვილი; ამავე დეპარტამენტის ქ.თბილისის მთავარი სამმართველოს მე-3 სამმართველოს ყოფილი უფროსი რომან ზაალიშვილი; შს სამინისტროს ქ.თბილისის მთავარი სამმართველოს ძველი თბილისის სამმართველოს ყოფილი უფროსი ირაკლი ყიფშიძე; შს სამინისტროს ქ.თბილისის მთავარი სამმართველოს ძველი თბილისის სამმართველოს მე-7 განყოფილების ყოფილი უფროსი ზურაბ პავლიაშვილი.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან