ე.წ. ქოლ-ცენტრების საქმეზე ბრალდებული 6 პირის, მათ შორის ჟურნალისტ ელისო კილაძის და ყოფილი გენერალური პროკურორის ოთარ ფარცხალაძის საქმეზე თბილისის საქალაქო სასამართლოში სხდომა დახურულ რეჟიმში მიმდინარეობს.

სხდომის დახურვის შუამდგომლობა ბრალდების მხარემ დააყენა. დღვანდელ პროცეზე ბრალდებულების მიმართ შეფარდებული აღკვეთის ღონისძიება - პატიმრობა გადაისინჯება.

პროკურატურა ბრალდებულების მიმართ პატიმრობის ძალაში დატოვებას მოითხოვს, დაცვის მხარე კი - გირაოს გამოყენებას.

Interpressnews.ge-ის თანახმად, სხდომაზე სიტყვით ისარგებლა ბრალდებულმა ელისო კილაძემ და თქვა, რომ "სრულ იზოლაშია", კერძოდ, მან აღნიშნა, რომ "მიმოწერები, პაემნების და ზარების უფლება აკრძალული აქვს".

"მე არ ვეთანხმები ბრალდების მხარის ამ პოზიციას. ჟურნალისტი ვარ და საჯაროობა მნიშვნელოვანია. თვე და 2 დღეა სრულ იზოლაციაში ვარ, მიმოწერები, პაემნის და ზარების უფლება აკრძალული მაქვს. რა თქმა უნდა, ჩემს ბრალს არ ვეთანხმები, მთლიანად ჯგუფის შემადგენლობაში ერთხელ ვარ ნახსენები, არავის ვიცნობ იქიდან ორის გარდა.

არავითარი მტკიცებულება არ არსებობს, რომ რომელიმე „ქოლცენტრს“ გავუწიე რეკომენდაცია.

დიახ, მე „ქოლცენტრებს“ ვამხელდი და ეს „ქოლცენტრები“ დავით კეზერაშვილის საკუთრებაში იყო... სპეცრაზმის დანიშნულების თანხლებით დამაკავეს, კორუფციაში მხილებული თანამდებობის არც ერთი პირი ასე არ დაუკავებიათ. მე უნდა მომეცეს საშუალება, ბრალდებებს ვუპასუხო, ერთადერთი ადგილი, სადაც შემიძლია ვისაუბრო, სასამართლო სხდომაა. 37 წელში ხომ არ ვარ? პროცესი იყოს საჯარო მედიის წარმომადგენლებისთვის. თუ ამის საშუალება არ მომეცა, ჩემი უდანაშაულობა როგორ უნდა ვამტკიცო?

ასე თუ აპირებენ, პირდაპირ დახვრეტა მომისაჯონ, რა საჭიროა ეს 9 თვე?

გთხოვთ, გაითვალისწინოთ ჩემი პოზიცია და სასამართლო პროცესი არ დახუროთ...

ძალიან გული მწყდება, რომ ჯანგველაძის პროცესებს ვერ ვესწრებოდი და რამდენიმე მნიშვნელოვანი მოწმის დაკითხვას ვერ დავესწარი", - თქვა ელისო კილაძემ.

პროცესს ბრალდებულებიდან მხოლოდ ელისო კილაძე ესწრება.

ბრალდებული 6 პირიდან რამდენიმე, მათ შორის ყოფილი გენერალური პროკურორი ოთარ ფარცხალაძე ქვეყანაში არ იმყოფება, მათზე ძებნაა გამოცხადებული და შესაბამისად, მათ პატიმრობა დაუსწრებლად აქვთ შეფარდებული.

ელისო კილაძე 18 თებერვალს დააკავეს.

პროკურატურის თანახმად, "ქოლცენტრის საქმიანობის გამოაშკარავების ან ასეთის რისკის არსებობის შემთხვევაში სათანადო ინფორმაციის სხვადასხვა მედიაპლატფორმაზე გავრცელებით ელისო კილაძე უზრუნველყოფდა დანაშაულებრივი საქმიანობის კანონიერად წარმოჩენას. ამავდროულად, იმ კონკურენტი ქოლცენტრების მხილების მიზნით, რომლებიც არ იყვნენ მათი გავლენის ქვეშ მოქცეულები ელისო კილაძის მიერ ხდებოდა მათი ადგილმდებარეობის და თანამშრომლების თაობაზე ინფორმაციის საჯაროდ გავრცელების დაგეგმვა, გავრცელების მუქარა თუ გავრცელება და შემდგომში მათი შანტაჟი გზით გადმობირებისათვის სათანადო პირობების შექმნა".

პროკურატურის განცხადებით, ამავზე საქმეზე ბრალდება დაუსწრებლად წარედგინებათ მიმალვაში მყოფ საქართველოს ყოფილ გენერალურ პროკურორს ოთარ ფარცხალაძეს და მისი ჯგუფის წევრებს – დავით მიქაძეს, ირაკლი სეხნიაშვილს და მიხეილ ჩოხელს, ხოლო ბრალდების დადგენილება პირადად გაეცნობა, სხვა სისხლის სამართლის საქმეზე სასჯელაღსრულების დაწესებულებაში მოთავსებულ გიორგი მიქაძეს.

ავტორი: ექსპრესნიუსი,

სოციალური ქსელები

კახი კალაძემ 2025 წელს $294,900 და €135,313 ღირებულების 4 ავტომანქანა იყიდა და გაყიდა

რუსეთის ნავთობის ექსპორტი 43%-ით შემცირდა უკრაინის მიერ ბალტიისპირეთის პორტებზე თავდასხმის შემდეგ

ზელენსკიმ განაცხადა, რომ კრემლმა უკრაინას დონბასიდან გასასვლელად „ორი თვე“ მისცა

ოცნება აჭარის უმაღლესი საბჭოს თავმჯდომარის თანამდებობაზე ცოტნე ანანიძეს წარადგენს