The Washington Post-თან სამი ოფიციალური პირი ამბობს, რომ რუსეთი ირანს აწვდის სადაზვერვო მონაცემებს ახლო აღმოსავლეთში ამერიკულ ძალებზე თავდასხმისთვის. 

The Washington Post წერს, რომ ეს დახმარება, რომლის შესახებაც მანამდე ინფორმაცია არ გავრცელებულა, მიუთითებს, რომ მიმდინარე კონფლიქტში ამერიკის შეერთებული შტატების ერთ-ერთი მთავარი ბირთვული მოწინააღმდეგე - რუსეთიც მონაწილეობს. 

სადაზვერვო ინფორმაციაზე ინფორმირებული 3 ოფიციალური პირი, ანონიმურობის პირობით, მედიასთან ამბობს, რომ ომის დაწყების შემდეგ, შაბათიდან, რუსეთმა ირანს გადასცა ინფორმაცია ამერიკული სამხედრო ობიექტების მდებარეობის შესახებ, მათ შორის საბრძოლო ხომალდებისა და სამხედრო ავიაციის პოზიციები. 

ვაშინგტონში რუსეთის საელჩომ ამ ინფორმაციაზე The Washington Post-თან კომენტარი არ გააკეთა. 

The Washington Post ასევე აღნიშნავს, რომ რუსეთის მიერ ირანისთვის მიწოდებული ინფორმაცია სამიზნეებთან დაკავშირებით ბოლომდე ნათელი არ არის. ოფიციალური პირები ამბობენ, რომ ბრძოლის დაწყებიდან 1 კვირაზე ნაკლებ დროში ირანის სამხედროების შესაძლებლობა - დამოუკიდებლად აღმოაჩინონ ამერიკული ძალების მდებარეობა - მნიშვნელოვნად შემცირდა. 

კვირას ქუვეითში ირანული დრონის თავდასხმას 6 ამერიკელი სამხედრო ემსხვერპლა, ხოლო რამდენიმე დაიჭრა. ირანმა ათასობით ერთჯერადი თავდასხმის დრონი და ასობით რაკეტა გაუშვა ამერიკულ სამხედრო პოზიციებზე, საელჩოებსა და სამოქალაქო ობიექტებზე. ამავდროულად, აშშ-მა და ისრაელმა ერთობლივად იერიში მიიტანეს 2 000-ზე მეტ ირანულ სამიზნეზე, მათ შორის ბალისტიკური რაკეტების პოზიციებზე, საზღვაო ძალების ობიექტებზე და ქვეყნის ხელმძღვანელ პირებზე. 

თეთრი სახლის პრესსპიკერმა ანა კელიმ განაცხადა, რომ "ირანის რეჟიმი სრულად ნადგურდება", თუმცა მას რუსეთის მიერ ირანისთვის დახმარების მიწოდებაზე კომენტარი არ გაუკეთებია. 

ამავე თემაზე კომენტარის გაკეთებაზე უარი თქვეს პენტაგონსა და CIA-შიც. 

რუსეთის მიერ ირანისთვის გაწეული მხარდაჭერის შესახებ ინფორმირებულმა ორმა ოფიციალურმა პირმა ჩინეთზეც გაამახვილა ყურადღება, თუმცა მათ თქვეს, რომ ის ამაში, დიდი ალბათობით, არ მონაწილეობს, მიუხედავად რუსეთ-ჩინეთს შორის კავშირისა. 

The Washington Post-თან ამ თემაზე კომენტარის გაკეთებაზე ვაშინგტონში ჩინეთის საელჩომაც თქვა უარი. 

ავტორი: ექსპრესნიუსი,

სოციალური ქსელები

მოსკოვის სასამართლომ კენედების ოჯახის წევრს დაუსწრებლად პატიმრობა მიუსაჯა

კოლუმბიის პრეზიდენტი - მიწისძვრის შემდეგ 265 ადამიანი დაიღუპა და 3 494 დაშავდა, უგზო-უკვლოდ დაკარგულად ითვლება 496

ნარკოდანაშაულის ბრალდებით 135 პირი დააკავეს, მათ შორის ნარკორეალიზაციაში სხვადასხვა ფორმით ჩართული 55 პირია

ივანიშვილის წარმომადგენელი იონათამიშვილი აფხაზეთში ბენზინის მიწოდებაზე კითხვების გამო ოპოზიციის აკრძალვას ითხოვს