აშშ-ში ვიზიტის ფარგლებში საქართველოს საგარეო საქმეთა მინისტრი მიხეილ ჯანელიძე  ატლანტიკურ საბჭოში სიტყვით გამოვიდა.

საგარეო უწყების ინფორმაციით, სიტყვით გამოსვლისას მინისტრმა საქართველოს ევრო-ატლანტიკური ინტეგრაციის აუცილებლობაზე, რუსეთის აგრესიულ პოლიტიკაზე, საქართველოში მიმდინარე რეფორმებსა და ეკონომიკის განვითარების შესაძლებლობებზე ისაუბრა.

„ჩვენ მივისწრაფვით ნატოსა და ევროკავშირისკენ და უკვე  მნიშვნელოვანი წარმატებები გვაქვს ამ გზაზე. საქართველო თავს იმკვიდრებს რეგიონში, როგორც ძალზედ მნიშვნელოვანი მოთამაშე“, - განაცხადა  მიხეილ ჯანელიძემ.

 მისი თქმით, ყველაზე დიდი ემოციური გამოხმაურება ქართველ ხალხში ევროკავშირთან ასოცირების შესახებ შეთანხმების ხელმოწერას მოჰყვა, რადგან ეს შეთანხმება მათ დიდი ხნის ოცნების ახდენის, კერძოდ, ევროპის სრულუფლებიან წევრებად გახდომის შესაძლებლობას აძლევს.  ამ კონტექსტში, მიხეილ ჯანელიძემ ვიზა ლიბერალიზაციის კუთხით მიღწეულ წარმატებაზეც ისაუბრა და აღნიშნა, რომ საქართველომ სრულად შეასრულა სავიზო რეჟიმის ლიბერალიზაციის სამოქმედო გეგმით განსაზღვრული ყველა მოთხოვნა და რეკომენდაცია, რაც ნიშნავს, რომ  „საქართველო არის სანდო და საიმედო პარტნიორი,  რომელსაც შესაძლებელია ევროკავშირმა თავისი საზღვრები გაუხსნას“.

თავის გამოსვლაში მინისტრმა კიდევ ერთხელ გაამახვილა ყურადღება საქართველოსთვის ნატოში ინტეგრაციის პროცესის შეუქცევადობაზე და ვრცლად ისაუბრა  იმ ძალისხმევაზე, რომელსაც მთავრობა  საქართველოს თავდაცვისუნარიანობისა და ნატოსთან თავსებადობის გაძლიერების თვალსაზრისით ახორციელებს.

„ჩვენ თავდაუზოგავად ვმუშაობთ ჩვენს პარტნიორებთან, ალიანსის წევრებთან იმისთვის, რომ ვარშავის სამიტზე საქართველოს მიერ მიღწეული პროგრესი დაფიქსირდეს“,  - განაცხადა მინისტრმა.

წარმატებებთან ერთად,  მინისტრმა საქართველოს წინაშე მდგარ ყველაზე მნიშვნელოვან გამოწვევაზე, კერძოდ, რუსეთის მიერ საქართველოს ტერიტორიების ოკუპაციაზე ისაუბრა.

მიხეილ ჯანელიძის თქმით, საქართველო, მიუხედავად პროვოკაციებისა, ცდილობს სიფრთხილე გამოიჩინოს, შეინარჩუნოს პრაგმატული პოზიცია და იმუშაოს საერთაშორისო თანამეგობრობასთან ერთად კონფლიქტის მშვიდობიანი გზით მოგვარების მიზნით.

„ჩვენ ვცდილობთ გავაძლიეროთ ჩართულობა ოკუპირებულ ტერიტორიებზე მცხოვრებ მოსახლეობასთან, რათა მათთვისაც ხელმისაწვდომი გავხადოთ ევროპასთან ინტეგრაციის ის სიკეთეები, რითაც საქართველოს დანარჩენი მოსახლეობა სარგებლობს“, - აღნიშნა მიხეილ ჯანელიძემ.  

 საქართველოს საგარეო საქმეთა მინისტრი თავის გამოსვლაში საქართველოს მთავრობის მიერ გატარებულ  რეფორმებსაც შეეხო, კერძოდ, მან საქართველოს პრემიერ მინისტრის გიორგი კვირიკაშვილის მიერ ინიცირებულ რეფორმების პროგრამაზე და ამ პროგრამის ფარგლებში  კანონის უზენაესობის განმტკიცების, ინკლუზიური მმართველობის განვითარების, ძირითადი უფლებებისა და თავისუფლებების დაცვისა და სამოქალაქო საზოგადოების გაძლიერების მიმართულებით გადადგმული ნაბიჯების შესახებ ისაუბრა.

გამოსვლაში ვრცელი ადგილი დაეთმო საქართველოს ეკონომიკური განვითარების თემატიკას, კერძოდ საინვესტიციო გარემოს გაუმჯობესების, ინვესტიციების მოზიდვის,  საგადასახადო სისტემის ლიბერალიზაციის, ეკონომიკური ზრდის ხელშეწყობისა და უმუშევრობის აღმოფხვრის საკითხებს. მინისტრმა საქართველოში მიმდინარე ისეთ მნიშვნელოვან პროექტებზეც ისაუბრა, როგორიცაა ახალი აბრეშუმის გზის, ანაკლიის ღრმაწყლოვანი პორტის,  ბაქო-თბილისი-ყარსი რკინიგზისა და სამხრეთის გაზის დერეფნის განვითარების პერსპექტივები.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ევროპარლამენტის ანგარიშში ირაკლი ღარიბაშვილის გვარიც მოხვდა - რა წერია მასზე

თიბისი ტექსკლა - მოსწავლეებისთვის ხელოვნური ინტელექტის შესწავლის ახალი შესაძლებლობები

რუსთავი 2: ევროპული სახელმწიფოს სასარგებლოდ ჯაშუშობისთვის გიორგი უძილაური დააკავეს

პაპუაშვილი: პრეზიდენტ ზელენსკის მოუწია ირაკლი კობახიძესთან მისვლა და საუბარი