სანიკიძე: თუ დღის წესრიგში დგება რექტორის მუშაობის თუ არმუშაობის საკითხი, ჩვენი პასუხიც შესაბამისია

2016-03-16 22:10:26, 660 ნახვა

სამართალი

"თუ დღის წესრიგში დგება რექტორის მუშაობის თუ არმუშაობის საკითხი, ჩვენი პასუხიც შესაბამისია" - ამის შესახებ საქართველოს განათლებისა და მეცნიერების მინისტრმა თამარ სანიკიძემ თსუ-ს აკადემიური საბჭოს წევრებთან შეხვედრის დასრულების შემდეგ ჟურნალისტებს განუცხადა.

სანიკიძე აცხადებს, რომ ის არ აპირებს, უნივერსიტეტში რექტორის ყოფნა-არყოფნის საკითხის გადაწყვეტაში ჩართვას. მისი თქმით, საჭიროა შეიქმნას სამუშაო გარემო, რათა ყველა იმ პრობლემაზე წარიმართოს საუბარი, რომელიც უნივერსიტეტის კედლებში ხდება.

"არის რიგი საკითხები, რომლებიც უპრიანია გადაწყდეს იმ ლეგიტიმურ ორგანოებში, რომელიც უნივერსიტეტს წარმოადგენს - ამ შემთხვევაში აკადემიური საბჭო. თუ დღის წესრიგში დგება რექტორის მუშაობის თუ არმუშაობის საკითხი, რომელსაც თვითმმართველობის წარმომადგენლები აყენებენ, ჩვენი პასუხიც შესაბამისია. ძალიან მნიშვნელოვანია რექტორის თემის განხილვა. აქედან გამომდინარე, კონკრეტული შეთავაზება აქვს აკადემიურ საბჭოს სტუდენტებისთვის, რომლის ფარგლებში ისინი მოითხოვენ გონივრულ ვადას, რათა იმსჯელონ რექტორის საკითხზე, მიიღონ გადაწყვეტილება და აცნობონ სტუდენტებს. გონივრული ვადა შეიძლება იყოს ერთი კვირა, ორი კვირა, ან ერთი თვე. ამაზე დაილაპარაკებენ უშუალოდ სტუდენტებთან ერთად და დარწმუნებული ვარ, შეთანხმდებიან", - განაცხადა თამარ სანიკიძემ.