ჩინეთმა კომპანიებისთვის აშშ-ში ინვესტიციების ჩადება შეზღუდა

2025-04-02 17:56:04, 597 ნახვა

მსოფლიო

გამოცემა Bloomberg-ის საკითხზე ინფორმირებული წყაროების ინფორმაციით, ჩინეთმა ზომები მიიღო, რათა ადგილობრივ კომპანიებს აშშ-ში ინვესტიციების ჩადება შეუზღუდოს, რამაც შესაძლოა, პეკინს უფრო მეტი ბერკეტი მისცეს ტრამპის ადმინისტრაციასთან პოტენციურ მოლაპარაკებებში.

წყაროების თქმით, ჩინეთის ეკონომიკური დაგეგმარების სააგენტოს რამდენიმე განყოფილებას ბოლო კვირების განმავლობაში დაავალეს, რომ შეაჩერონ რეგისტრაცია და ნებართვები იმ ფირმებისთვის, რომლებსაც აშშ-ში ინვესტიციების ჩადება სურთ.

Bloomberg წერს, რომ აქამდე ჩინეთს ზოგიერთ შემთხვევაში უცხოეთში ინვესტიციების ჩადებაზე შეზღუდვები ეროვნული უსაფრთხოების საბაბით ჰქონდა დაწესებული, თუმცა, ჩინეთის მიერ მიღებული ახალი ზომები ორ ქვეყანას შორის ბოლო პერიოდში გამწვავებულ დაძაბულობას ასახავს.

გამოცემის მიხედვით, ჯერჯერობით არაფერი მიანიშნებს იმაზე, რომ აღნიშნული ზომები ჩინური კომპანიების მიერ უკვე აღებულ ვალდებულებებზე გავლენას მოახდენს. ამასთანავე, უცნობია, თუ რამ უბიძგა ჩინეთს ეროვნული განვითარებისა და რეფორმების კომისიას განცხადებების მიღების პროცესის შეჩერებისკენ ან რამდენ ხანს გაგრძელდება ეს პაუზა.

ცნობისთვის, 2 აპრილს აშშ-ს პრეზიდენტი დონალდ ტრამპი აპირებს, აშშ-ს სავაჭრო პარტნიორების წინააღმდეგ ე.წ. "საპასუხო ტარიფები" გამოაცხადოს, რაც, დიდი ალბათობით, ჩინეთსაც შეეხება. თებერვალში აშშ-ს პრეზიდენტის მიერ გამოქვეყნებული წერილი შესაბამის სამთავრობო კომიტეტს ავალებდა, რომ ტექნოლოგიის, ენერგეტიკისა და სხვა სტრატეგიული მნიშვნელობის ამერიკულ სექტორებში ჩინეთის მიერ გაწეული ხარჯის რაოდენობა შეეზღუდა.

ამას გარდა, Bloomberg News თებერვლის თვეში წერდა, რომ ჩინეთი შიდა კომპანიების მხრიდან ქვეყნიდან გამავალ ინვესტიციებზე კონტროლი გაზარდა მას შემდეგ, რაც ქვეყნიდან კაპიტალის გადინების რეკორდულმა წელმა ჩინურ იუანზე წნეხი გაზარდა.

ავტორი: ექსპრესნიუსი,