04:23 - 19 Mar, 2025
ჩვენ შესახებ რეკლამა/ხელმოწერა
2025-03-18 17:30:17, 432 ნახვა

სამართალი
21 წლის ბიჭის განზრახ მკვლელობაში ბრალდებულს აღკვეთის ღონისძიების სახით პატიმრობა შეეფარდა

თბილისის საქალაქო სასამართლომ 21 წლის გიორგი ახალაიას განზრახ მკვლელობაში ბრალდებულს, ლუკა შენგელიას აღკვეთის ღონისძიების სახით პატიმრობა შეუფარდა. სასამართლომ არ გაიზიარა დაცვის მხარის შუამდგომლობა 10 000 ლარის ოდენობით გირაოს შეფარდების თაობაზე.

პროცესზე ბრალდების მხარემ აღნიშნულ სისხლის სამართლის საქმეზე ბრალდებულისთვის პატიმრობის შეფარდების შუამდგომლობით მიმართა სასამართლოს, რაც მოსამართლემ დააკმაყოფილა.

როგორც სასამართლო სხდომაზე პროკურორმა გრიგოლ ბიბილაშვილმა აღნიშნა, 16 მარტს, ლუკა შენგელიამ ჩაიდინა განსაკუთრებით მძიმე დანაშაული, რაც უალტერნატივოდ იმსახურებს აღკვეთის ღონისძიების სახით პატიმრობას, ასევე, არსებობს ვარაუდი მტკიცებულების განადგურების, მიმალვის ან შემდეგში კვლავ ახალი დანაშაულის ჩადენის საფრთხეები. პროკურორის განმარტებით, გიორგი ახალაიასა და ლუკა შენგელიას შორის თავდაპირველად მოხდა სიტყვიერი შელაპარაკება, რაც შემდგომში გადაიზარდა ფიზიკურ დაპირისპირებაში. მისი თქმით, ამ დროს შენგელიამ ამოიღო დანა, რომელიც გიორგი ახალაიას მუცლის არეში ჩაარტყა, შედეგად ახალაია კლინიკაში მიყვანამდე გარდაიცვალა.

პროკურორის განმარტებით, სამედიცინო დოკუმენტაციის თანახმად, მიყენებული ჭრილობით დაზიანდა ღვიძლი, რის შედეგადაც გიორგი ახალაიას გარდაცვალება დადგა. პროკურორის თქმით, ამოღებულია დანაშაულის ჩადენის იარაღი - დანა.

“თვითმხილველებმა დაინახეს, თუ როგორ დაარტყა ლუკა შენგელიამ გიორგი ახალაიას დანა…

ბრალდებულმა გამოავლინა უკიდურესად დაუნდობელი, აგრესიული ხასიათი, როდესაც ჭრილობა მიაყენა მუცლის არეში გარდაცვლილს. ეს მიანიშნებს შემდეგს - საშიშროებაა იმისა, რომ გაგრძელდება მისი დანაშაულებრივი საქმიანობა. ამის აღსაკვეთად კი საჭიროა მისი უპირობო იზოლაცია- პატიმრობა” , - განაცხადა პროკურორმა გრიგოლ ბიბილაშვილმა.

რაც შეეხება დაცვის მხარის პოზიციას, როგორც ადვოკატმა შალვა ხაჭაპურიძემ აღნიშნა, მისი დაცვის ქვეშ მყოფი ჩადენილ დანაშაულს აღიარებს და ინანიებს. მისი თქმით, ბრალდების მხარე ვერ ასაბუთებს, რომ ბრალდებული პირი ხელს შეუშლის გამოძიებას ან მიიმალება. ადვოკატის თქმით, არ არსებობს ბრალდებულის მხრიდან, ახალი დანაშაულის ჩადენისა და მიმალვის საფრთხე, ამიტომ სასამართლოს 10 000 ლარის ოდენობით გირაოს გამოყენებით მიმართა.

“ის თავად გამოცხადდა პოლიციაში, დაუკავშირდა ისნის პოლუციის უფროსს და თავად ჩაბარდა პოლიციას. ის აღიარებს და ინანიებს დანაშაულს. ამბობს, რომ კონფლიქტი მას არ დაუწყია. ის ზრდის თავის ორ მცირეწლოვან ძმას, შესაბამისად დადებითად ხასიათდება ეს ადამიანი. ემზადებოდა მისაღები გამოცდების ჩასაბარებლად, მაგრამ სამწუხაროდ, ამაში ამოყო თავი”, - განაცხადა შალვა ხაჭაპურიძემ.

სასამართლო სხდომაზე სიტყვით ისარგებლა ბრალდებულმა ლუკა შენგელიამ.

“ინციდენტი რაც მოხდა, მე იქიდან გავიქეცი იმ მიზნით, რომ დავმალულიყავი. უბრალოდ შეშინებული და აფორიაქებული ვიყავი… მე გაქცევა არ მინდოდა, არც დამალვა არ მინდოდა. ვაღიარებ ყველაფერს”, - განაცხადა ბრალდებულმა ლუკა შენგელიამ სხდომაზე.

შეგახსენებთ, მკვლელობა თბილისში 15 მარტს მოხდა. გამოძიების ინფორმაციით, ბრალდებულმა თბილისში, ერთ-ერთი ბარის მიმდებარე ტერიტორიაზე, ცივი იარაღით 21 წლის ბიჭი დაჭრა და შემთხვევის ადგილიდან მიიმალა. დაჭრილი ახალგაზრდა სამედიცინო დაწესებულებაში გადაიყვანეს, თუმცა მისი გადარჩენა ვერ მოხერხდა.

გამოძიებით დადგინდა, რომ ბრალდებულმა თბილისში, ერთ-ერთი ბარის მიმდებარე ტერიტორიაზე, ცივი იარაღით 2004 წელს დაბადებული გიორგი ახალაია დაჭრა და შემთხვევის ადგილიდან მიიმალა.

დაჭრილი ახალგაზრდა სამედიცინო დაწესებულებაში გადაიყვანეს, თუმცა მისი გადარჩენა ვერ მოხერხდა.

ბრალდებულ ლუკა შენგელიას 10-დან 15 წლამდე პატიმრობა ემუქრება.




ავტორი: ექსპრესნიუსი,


სოციალური ქსელები
ზელენსკი - პუტინს სურს განახორციელოს რამდენიმე შეტევითი მოქმედება ზაპოროჟიას მიმართულებით, აღმოსავლეთში, ხარკოვისა და სუმის მიმართულებით
ტრამპი - პუტინთან შევთანხმდით, რომ ჩვენ სწრაფად ვიმუშავებთ ცეცხლის სრულ შეწყვეტაზე
თეთრი სახლი მშვიდობის დამყარების შემდეგ რუსეთთან უზარმაზარ ეკონომიკურ გარიგებებს აცხადებს
თეთრი სახლი ტრამპ-პუტინის საუბრის შემდეგ განცხადებას ავრცელებს
რედაქტორის რჩევით

ომი უკრაინაში

ვიდეო/LIVE

საზოგადოებრივი მაუწყებლის სამეურვეო საბჭოს სხდომა - 3 თებერვალი, 2025












არქივი 2009 წლიდან

303,563
უნიკალური
ვიზიტორი დღეს 27,104
Powered By Google Analytics