საგარეო საქმეთა მინისტრის მოადგილე დავით დონდუა, თანმხლებ უწყებათაშორის დელეგაციასთან ერთად ესტონეთს ეწვია. დელეგაციის შემადგენლობაში შედიოდნენ:   საქართველოს საგარეო საქმეთა სამინისტროს, უსაფრთხოების პოლიტიკისა და ევროატლანტიკური ინტეგრაციის დეპარტამენტის დირექტორი, გიორგი დოლიძე; ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის აპარატის ევროატლანტიკური ინტეგრაციის საკითხთა კოორდინაციის დეპარტამენტის დირექტორი, ნატა ქორიძე; თავდაცვის სამინისტროს საერთაშორისო ურთიერთობებისა და ევროატლანტიკური ინტეგრაციის დეპარტამენტის, ნატო-ში ინტეგრაციის სამმართველოს უფროსის მოადგილე, თინათინ მზარელუა და საქართველოს საგანგებო და სრულუფლებიანი ელჩი ესტონეთის რესპუბლიკაში, თეა ახვლედიანი.
 
ვიზიტის ფარგლებში, შეხვედრები გაიმართა ესტონეთის საგარეო საქმეთა მინისტრის მოადგილესთან კიულლიკე სილლასტე-ელლინგთან და თავდაცვის მინისტრის მოადგილესთან მიკო ჰალიასთან; ასევე, შედგა ქართული დელეგაციის შეხვედრები ესტონეთის პარლამენტის ეროვნული თავდაცვის  კომიტეტის თავმჯდომარესთან, მარკო მიჰკელსონთან და საგარეო ურთიერთობათა კომიტეტის თავმჯდომარესთან, სვენ მიკსერთან. 11 მარტს, საელჩოს ორგანიზებით, თავდაცვისა და უსაფრთხოების საერთაშორისო ცენტრში, მრგვალი მაგიდის ფორმატში, გაიმართა დისკუსია თემაზე: „საქართველოს ევრო-ატლანტიკური ინტეგრაციის პრიორიტეტები და რეგიონული უსაფრთხოების საკითხები".
 
გამართული შეხვედრებისას, განსაკუთრებული ყურადღება გამახვილდა საქართველოს ნატო–ში ინტეგრაციის პროცესის განვითარებაზე,  ნატო–საქართველოს არსებითი პაკეტის წარმატებულ იმპლემენტაციასა და  ვარშავის სამიტის მიმართ საქართველოს მოლოდინებზე. საუბარი შეეხო საქართველოს ევროკავშირში ინტეგრაციისა და ნატო-ში გაწევრიანების კუთხით მიღწეულ პროგრესს,  საქართველოსთვის ევროკავშირთან სავიზო რეჟიმის გაუქმებაზე საბოლოო გადაწყვეტილების დროულად მიღების მნიშვნელობას, ქვეყანასა და რეგიონში არსებულ უსაფრთხოების მდგომარეობასა და გამოწვევებს, საქართველოსა და ესტონეთს შორის არსებულ ორმხრივი და მრავალმხრივი თანამშრომლობის საკითხებს. 
 
ესტონელ კოლეგებთან შეხვედრებისას, დავით დონდუამ ფართოდ მიმოიხილა ქვეყანაში განხორციელებული და მიმდინარე დემოკრატიული რეფორმები; რეგიონში უსაფრთხოების კუთხით არსებული ვითარება და გამოწვევები. ამ მხრივ, განსაკუთრებული აქცენტი გაკეთდა საქართველოს აფხაზეთისა და ცხინვალის ოკუპირებულ რეგიონებში, ისევე როგორც ოკუპაციის ხაზის გასწვრივ არსებულ მდგომარეობასა და ბოლოდროინდელ განვითარებებზე; საქართველოს მიერ რუსეთთან ურთიერთობის დეესკალაციის კუთხით გადადგმულ ცალმხრივ ნაბიჯებსა და რუსეთის პროვოკაციულ ქმედებებზე, „მცოცავი ანექსიის", საოკუპაციო რეჟიმებთან გაფორმებული ე.წ. „შეთანხმებების" და უკანონო „ბორდერიზაციის" ჩათვლით. საუბარი შეეხო აღნიშნულ ტერიტორიებზე მცხოვრები მოსახლეობის უფლებების მნიშვნელოვანი დარღვევის ფაქტებს. ამ კონტექსტში, დავით დონდუამ ისაუბრა ჟენევის საერთაშორისო მოლაპარაკებებისა და ადგილზე საერთაშორისო დამკვირვებლების ყოფნის მნიშვნელობაზე. ვიზიტის ფარგლებში გამართული შეხვედრებისას მნიშვნელოვანი ყურადღება დაეთმო საქართველოს ნატო-ში გაწევრიანების პროცესს, ამ კუთხით ქვეყნის მიერ გადადგმულ ნაბიჯებსა და განხორციელებულ რეფორმებს, ხაზი გაესვა საერთაშორისო სამშვიდობო მისიებში საქართველოს წვლილის მნიშვნელობას და ნატო-ს ვარშავის სამიტის მოლოდინებს.
 
ესტონურმა მხარემ  ხაზგასმით აღნიშნა, საქართველოს მიერ ევროპულ და ევროატლანტიკურ სტრუქტურებში ინტეგრაციის კუთხით მიღწეული პროგრესი და კიდევ ერთხელ დაადასტურა თავისი მტკიცე მხარდაჭერა ჩვენი ქვეყნის სუვერენიტეტის, საერთაშორისოდ აღიარებულ საზღვრებში ტერიტორიული მთლიანობის, ევროპული და ევროატლანტიკური ინტეგრაციის მიმართ. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

„თეგეტამ“ რუსთავის ჭალის ტყის აღდგენისთვის გამწვანების აქცია გამართა

საპატრიარქომ იობის განათლება აღიარა და მას შესაბამისი ხარისხი მიანიჭა

აპრილში „ექსპრესნიუსი“ 1.7 მილიონჯერ წაიკითხეს, სოციალურ ქსელებში, ახალ ამბებს 11 მილიონი ადამიანი გაეცნო

რუსეთის ტერიტორიის მეოთხედი და მოსახლეობის 70% უკრაინული დრონების მოქმედების რადიუსში იმყოფება