კინემატოგრაფისტები - ქვეყანაში არსებული მდგომარეობა გასულია ყოველგვარი სამართლებრივი ჩარჩოდან და სულ უფრო საშიშ და სასტიკ ფორმებს იძენს

2024-12-12 21:28:34, 426 ნახვა

პოლიტიკა

ქვეყანაში არსებული მდგომარეობა გასულია ყოველგვარი სამართლებრივი ჩარჩოდან და ის ყოველდღიურად სულ უფრო და უფრო საშიშ და სასტიკ ფორმებს იძენს. ამის შესახებ ერთობლივ განცხადებას კინოაკადემიის წევრები ავრცელებენ.

როგორც გავრცელებულ განცხადებაშია აღნიშნული, კინემატოგრაფისტები გმობენ სამართალდამცავების მხრიდან ძალადობასა და რიგ შემთხვევაში ადამიანის დაცვაზე უარის თქმას, რაც, მათი შეფასებით, ხელს უწყობს კრიმინალური დაჯგუფებების წახალისებას.

„ჩვენ, საქართველოს კინოაკადემიის წევრები და კინემატოგრაფისტები, ვეფუძნებით რა საქართველოს კონსტიტუციით გამყარებულ დემოკრატიულ ღირებულებებს, ვაცხადებთ, რომ ქვეყანაში არსებული მდგომარეობა გასულია ყოველგვარი სამართლებრივი ჩარჩოდან და ის ყოველდღიურად სულ უფრო და უფრო საშიშ და სასტიკ ფორმებს იძენს.

„ქართული ოცნება“ არ აღიარებს შექმნილ კრიზისს და მისი ქმედება, პირიქით, ესკალაციისკენ არის მიმართული.

მიგვაჩნია, რომ ამ სიტუაციაში მნიშვნელოვანია თითოეული ადამიანისა თუ ორგანიზაციის მკაფიო პოზიციის დაფიქსირება, ამიტომ:

ვგმობთ „ქართული ოცნების“ მიერ ქვეყნის კონსტიტუციურად განსაზღვრული კურსიდან გადახვევას და ხალხის ნების უგულებელყოფას.

ვემიჯნებით მშვიდობიანი აქციის მონაწილეების მიმართ ძალადობრივ ქმედებას, უკანონო დაკავებასა და წამებას.

ვგმობთ სამართალდამცავების მხრიდან ძალადობას და რიგ შემთხვევაში სამსახურებრივ მოვალეობაზე - ადამიანის დაცვაზე - უარის თქმას, რაც ხელს უწყობს კრიმინალური დაჯგუფებების წახალისებას.

ამის გათვალისწინებით, ვგრძნობთ მოქალაქეობრივ პასუხისმგებლობასა და აუცილებლობას გამოვუცხადოთ სოლიდარობა:

ყველა უკანონოდ დაკავებულს.

იმ ადამიანებს, ვისაც ფიზიკურად უსწორდებიან, სახლში უვარდებიან, ქუჩაში აკავებენ და სამსახურიდან გაშვებით ემუქრებიან.

ყველა ჟურნალისტს, რომელიც პროფესიული საქმიანობის შესრულების დროს იქცა ძალადობის მსხვერპლად.

ყველა ჩვენს კოლეგას, რომელიც ძალადობისა და დევნის ობიექტი გახდა.

ვითხოვთ:

ყველა უკანონოდ დაკავებულის უპირობოდ და დაუყოვნებლივ განთავისუფლებას.

ხელახალ საპარლამენტო არჩევნებს“, - ნათქვამია განცხადებაში, რომელსაც ხელს 500-ზე მეტი კინემატოგრაფისტი აწერს.