2024-12-06 20:48:58, 444 ნახვა

---

ხაზარაძე - ელისაშვილი უკრაინაში იბრძოდა რუსეთის წინააღმდეგ - რუსთაველზეც რუსეთის წინააღმდეგ იბრძოდა და ამიტომ ისჯება

ეს არის პოლიტიკური დევნა! ეს არის რუსული დავალების შესრულება! - ასე ეხმაურება კოალიცია “ძლიერი საქართველოს“ ლიდერი მამუკა ხაზარაძე ამავე კოალიციის წევრის, ალეკო ელისაშვილის სასამართლო პროცესს.

ხაზარაძის განცხადებით, „ელისაშვილი უკრაინაში იბრძოდა რუსეთის წინააღმდეგ - ელისაშვილი რუსთაველზეც რუსეთის წინააღმდეგ იბრძოდა და ზუსტად ამიტომ ისჯება“.

„დღეს კიდევ ერთხელ ვნახეთ ბიძინა ივანიშვილის და მურუსიძის სამარცხვინო, მონური სასამართლო, რომელიც არ ემსახურება არც კანონს და არც სამართალს!

ეს არის პოლიტიკური დევნა! ეს არის რუსული დავალების შესრულება!

ალეკო ელისაშვილი უკრაინაში იბრძოდა რუსეთის წინააღმდეგ - ალეკო ელისაშვილი რუსთაველზეც რუსეთის წინააღმდეგ იბრძოდა და ზუსტად ამიტომ ისჯება ის! 

პირადად ბიძინა ივანიშვილს მინდა ვუთხრა, დადგება დრო და თავისუფალი სასამართლოს პირობებში, ის რუსული მენტალობის, კრიმინალური რეჟიმი, რომელიც ჩამოაყალიბე, კრიმინალებს ფორმა ჩააცვი და მონა მოსამართლეებს მანტიები მოასხი, ყველა აგებს პასუხს სამართლიანი სასამრთლოს პირობებში. 

ვერანაირი დაკავებები, შეთითხნილი ბრალდებები და დაშინება ქართველ საზოგადოებას ვერ გატეხს, რადგან საქმე ეხება ჩვენი ქვეყნის ხვალინდელ დღეს.

მინდა სამართალდამცველებს მივმართო - კარგად დაფიქრდით, რას და ვის ემსახურებით, თქვენ ემსახურებით რუსეთის ხელისუფლებას საქართველოში. ეს არის რუსეთის სასამართლო და ქვეყნის მიტაცება და შეთრევა ხდება რუსეთში“,- აცხადებს ხაზარაძე.

შეგახსენებთ, კოალიცია „ძლიერი საქართველოს“ ერთ-ერთი ლიდერი ალეკო ელისაშვილი 4 დეკემბერს დააკავეს, 5 დეკემბერს, მას პროკურატურამ ბრალი წარუდგინა, დღეს, 6 დეკემბერს კი, თბილისის საქალაქო სასამართლომ აღკვეთის ღონისძიების სახით პატიმრობა შეუფარდა.

შინაგან საქმეთა სამინისტროს ოფიციალური ინფორმაციით, მას ბრალი ედება სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით გათვალისწინებული დანაშაულისთვის, რაც გულისხმობს ძალადობის გამოყენებით ჩადენილ დევნას.

უწყების ცნობით, „გამოძიებით დადგინდა, რომ მიმდინარე წლის 2 დეკემბერს, თბილისში, კოსტავას ქუჩაზე მდებარე ერთ-ერთ აფთიაქთან, ელისაშვილი პოლიტიკური პარტია „ქართული ოცნების“ წევრს, 1954 წელს დაბადებულ ა.ბ.-ს თავს დაესხა და ფიზიკური შეურაცხყოფა მიაყენა პარტიული შეხედულების გამო“.

მომხდარ ფაქტზე გამოძიება სისხლის სამართლის კოდექსის 156-ე მუხლის მეორე ნაწილის „ა“ ქვეპუნქტით მიმდინარეობს.

დანაშაული 3 წლამდე ვადით თავისუფლების აღკვეთას ითვალისწინებს.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი