ირაკლი ალასანია პეტრიაშვილის დაჭრაზე: ეს პარტიის მიმართ დიდი თავდასხმაა

2016-02-26 18:21:00, 399 ნახვა

პოლიტიკა

ალექსი პეტრიაშვილზე თავდასხმა ქვეყანაში განუკითხაობაზე მიუთითებს, - ამის შესახებ "თავისუფალი დემოკრატების" ლიდერმა, ირაკლი ალასანიამ "TV პირველის" ეთერში განაცხადა.

"თავისუფალი დემოკრატების" ლიდერი იმედოვნებს, რომ სამართალდამცავი ორგანოები ამ საქმეს სწრაფად გამოიძიებენ.

”ეს არის პარტიის მიმართ დიდი თავდასხმა და ეს არის ჩვენი საზოგადოებრივი უსაფრთხოებისთვის დიდი გამოწვევა. როდესაც თავდასხმა ხორციელდება ერთ-ერთი პოლიტიკური ძალის გენერალურ მდივანზე, რომელსაც ასეთი ლაჩრული ჩასაფრებით, მეგობრის საფლავზე მისულ ადამიანს 3 ცეცხლსასროლი ჭრილობა მიაყენეს, ეს მეტყველებს იმაზე, რომ ქვეყანაში პრაქტიკულად ყველა მოქალაქე არის დაუცველი. მე არანაირ წინასწარ შეფასებებს არ გავაკეთებ, რადგან იმედი მაქვს, რომ გამოძიებას ესმის, რამდენად სერიოზულად დგას საკითხი და იმედი მაქვს ძალიან სწრაფად დაადგენს ამ ლაჩრული მკვლელობის მცდელობის შემსრულებლებს.

ასევე ჩვენ უნდა დავფიქრდეთ უბრალოდ იმაზე, რა ქვეყანას ვაშენებთ, სად არიან ის ორგანოები, რომლებმაც თითოეული ჩვენი მოქალაქის უსაფრთხოება უნდა უზრუნველყონ. როდესაც ქვეყანაში პოლიტიკური პარტიის ერთ-ერთ ლიდერს ასე ლაჩრულად უსწორდებიან, ჩვენს ქვეყანას სჭირდება, საზოგადოებრივი წესრიგი იყოს დაცული, რათა ყველა მოქალაქემ საკუთარ ქვეყანაში თავი დაცულად იგრძნოს", - განაცხადა ირაკლი ალასანიამ.

როგორც ალასანიამ განმარტა, დღეს ლევან მიქალაძე პრაქტიკულად მეორედ გარდაიცვალა, როდესაც მის მეგობარს მის საფლავზე ასე გაუსწორდნენ.

პარტიის ლიდერმა მადლობა გადაუხადა ყველა პოლიტიკურ ძალას, რომელმაც ალექსი პეტრიაშვილის საქმესთან დაკავშირებით სოლიდარობა გამოხატა.

"მე ვხვდები, რომ როდესაც ასეთი სოლიდარობის განცდა აქვს ჩვენს საზოგადოებას, ჩვენ ამ უიმედობას, რომელიც სუფევს ქვეყანაში, ერთად დავძლევთ. დარწმუნებული ვარ, რომ ალექსი პეტრიაშვილი ძალიან მალე გამოჯანმრთელდება და დაუბრუნდება პარტიას", - განაცხადა ალასანიამ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან