პროკურატურამ სამსახურებრივი მდგომარეობის გამოყენებით დიდი ოდენობით თანხების თაღლითურად დაუფლების ფაქტზე ერთ პირს ბრალდება წარუდგინა

2023-07-03 00:43:34, 1152 ნახვა

სამართალი

საქართველოს პროკურატურამ, სამსახურეობრივი მდგომარეობის გამოყენებით, მოქალაქეთა კუთვნილი დიდი ოდენობით თანხების თაღლითურად დაუფლების ფაქტზე, ერთ პირს ბრალდება წარუდგინა.

საქართველოს შინაგან საქმეთა სამინისტროში ჩატარებული გამოძიებით დადგინდა, რომ დაკავებული მის მიერ დაარსებული უძრავი ქონების სააგენტოს გამოყენებით, თბილისში ბინის დაგირავების მსურველებს საპროცენტო სარგებლის პირობით სესხებას სთავაზობდა, რის სანაცვლოდაც სასურველი ბინების დაქირავებას და ნასესხები თანხის სარგებლით ბინის ქირის გადახდას ჰპირდებოდა, ხოლო ხელშეკრულების ვადის გასვლის შემდეგ, დაზარალებულებს თითქოსდა ნასესხებ თანხას დაუბრუნებდა. მეტი დამაჯერებლობისთვის, ბრალდებული მოძიებული ბინების მეპატრონეებთან ქირავნობის ხელშეკრულებებს წერილობით აფორმებდა და მოქალაქეებს არწმუნებდა, რომ ხელშეკრულებით განსაზღვრულ ვადებში, ბინაში უპრობლემოდ იცხოვრებდნენ.

გამოძიებით ასევე დადგინდა, რომ ბრალდებული დაზარალებულებს სესხის სანაცვლოდ, უძრავი ქონებით უზრუნველყოფას სთავაზობდა, რა დროსაც ნასესხები თანხით შეძენილი ნაკლები ღირებულების მიწის ნაკვეთებს იყენებდა. დაკავებული მოქალაქეებთან აფორმებდა სესხის, სესხის და იპოთეკის, გამოსყიდვის უფლებით უძრავი ნივთის ნასყიდობის ხელშეკრულებებს და ამ გზით დაზარალებულების კუთვნილ თანხებს მოტყუებით ეუფლებოდა. აღნიშნული ქმედებით, ბრალდებული მოქალაქეთა კუთვნილ, დიდი ოდენობით 962 574 ლარს დაეუფლა.

დაკავებულს ბრალდება საქართველოს სისხლის სამართლის კოდექსის 180-ე მუხლის მესამე ნაწილის "ა"და "ბ" ქვეპუნქტებით ( თაღლითობა, ჩადენილი სამსახურეობრივი მდგომარეობის გამოყენებით, დიდი ოდენობით, 30 ეპიზოდი) წარედგინა, რაც სასჯელის სახედ და ზომად 6-დან 9 წლამდე თავისუფლების აღკვეთას ითვალისწინებს.

პროკურატურის შუამდგომლობის საფუძველზე, თბილისის საქალაქო სასამართლომ ბრალდებულს აღკვეთის ღონისძიების სახით პატიმრობა შეუფარდა.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),