„პატრიოტთა ალიანსის“ აქციას ემზარ კვიციანი შეუერთდა

2015-01-31 15:46:56, 780 ნახვა

საზოგადოება

„საქართველოს პატრიოტთა ალიანსის“ აქციას, რომელიც რუსთაველის მეტროს მიმდებარე ტერიტორიაზე იმართება, კოდორის ხეობაში პრეზიდენტის ყოფილი რწმუნებული ემზარ კვიციანი შეუერთდა.

ამის შესახებ ადგილიდან „ექსპრესნიუსის“ კორესპონდენტი იუწყება.

კვიციანმა აქციის მონაწილეებს სიტყვით მიმართა და ხელისუფლებას გამოფხიზლებისკენ მოუწოდა.

როგორც მან ჟურნალისტებთან საუბრისას განაცხადა, მისი მოთხოვნა, რის გამოც აქციაზე მივიდა არის ის, რომ ვაზაგაშვილების საქმეები დროულად გაიხსნას.

„მე სიტყვით გამოსვლის დროსაც ვთქვი და საზოგადოებას მოვუწოდე, რომ ჩემი აქ მოსვლის მიზეზი არის სამართლიანობის აღდგენა და იური ვაზაგაშვილისა და ზურაბ ვაზაგაშვილის მკვლელობის საქმეების დროული გახსნა. მე ასევე მოვუწოდებ ხელისუფლებას გამოფხიზლდნენ და ხალხისკენ გამოიხედონ“, - განაცხადა ემზარ კვიციანმა.

აქციაზე ათასობით ადამიანია შეკრებილი. ადგილზე მობილიზებულია საპატრულო პოლიცია.

აქციაზე ასევე იმყოფებიან იური ვაზაგაშვილის ახლობლები, ბუტა რობაქიძის მშობლები - ია მეტრეველი და სოსო რობაქიძე.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან