ბაქრაძე ე.წ. საზღვრის სამი დღით ჩაკეტვაზე: ეს ადასტურებს, რომ ჩვენს ტერიტორიაზე ადამიანის უფლებები სისტემატიურ რეჟიმში ირღვევა

2015-09-15 17:19:49, 491 ნახვა

პოლიტიკა

ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე სამხრეთ ოსეთის საოკუპაციო რეჟიმის მიერ ე.წ. საზღვარს სამი დღით ჩაკეტვის გადაწყვეტილებას გამოეხმაურა.
ბაქრაძის განცხადებით, ეს ფაქტი კიდევ ერთხელ ადასტურებს, რომ ამ მონაკვეთზე ადამიანის უფლებები სისტემატიურად ირღვევა.
სახელმწიფო მინისტრის თქმით, ოკუპირებულ რეგიონში პროვოკაციულ ქმედებებთან დაკავშირებით საერთაშორისო პარტნიორები ინფორმირებულები არიან.
"ეს კიდევ ერთხელ ადასტურებს იმას, რომ ჩვენს ტერიტორიაზე, ამ მონაკვეთზე, ყოველდღიურად, სამწუხაროდ სისტემატიურ რეჟიმში ირღვევა ადამიანის უფლებები, მათი გადაადგილების უფლება. იმ პროვოკაციულ ქმედებებთან დაკავშირებით, რასაც სისტემატურად აქვს ადგილი ოკუპირებულ რეგიონში, ჩვენი საერთაშორისო პარტნიორები ინფორმირებული არიან",-განაცხადა დავით ბაქრაძემ.
შეგახსენებთ, დე ფაქტო სამხრეთ ოსეთის ე.წ. სახელმწიფო უსაფრთხოების კომიტეტის ინფორმაციით, 19, 20 და 21 სექტემბერს საქართველოსთან ე.წ. ადმინისტრაციულ საზღვარზე გადასასვლელი პუნქტები დაიკეტება.
ოსური მედიის ცნობით, შეზღუდვა ოკუპირებული ცხინვალის რეგიონის ე.წ. დამოუკიდებლობის 25 წლისთავს უკავშირდება.
„სამხრეთ ოსეთის რესპუბლიკის დამოუკიდებლობის 25-ე წლისთავთან დაკავშირებით სადღესასწაულო ღონისძიებების პერიოდში უსაფრთხოების ზომების გამკაცრების მიზნით, 19, 20 და 21 სექტემბერს დროებით შეწყდება მოქალაქეთა გაშვება საქართველოსთან სახელმწიფო საზღვარზე“, - ნათქვამია ე.წ. სახელმწიფო უსაფრთხოების კომიტეტის განცხადებაში.
ე.წ. საზღვარზე მიმოსვლა 22 სექტმებრიდან ჩვეულ რეჟიმში აღდგება.