„მიუხედავად არსებული გამომწვევებისა, ენერგეტიკის სექტორი ვითარდება და მომავალი წლიდან რამდენიმე ისტორიული პროექტი ამოქმედდება", - ამის შესახებ ეკონომიკისა და მდგრადი განვითარების მინისტრმა ნათია თურნავამ რადიო „მაესტროს" ეთერში საუბრისას განაცხადა.

ნათია თურნავას ინფორმაციით, 2019 წელს დასრულდა და ექსპლუატაციაში შევიდა 6 ახალი ჰესი, დადგმული სიმძლავრით 58 მგვტ, რომლებშიც ჯამში 80 მილიონ დოლარამდე ინვესტიცია განხორციელდა. „რაც შეეხება მომავალ წელს, დაგეგმილია 14 ახალი ჰესის და ერთი თბოელექტროსადგურის ექსპლუატაციაში შესვლა, რომელთა ჯამური დადგმული სიმძლავრე 500 მეგავატამდე იქნება. რაც ყველაზე მნიშვნელოვანია, ამოქმედდება ისტორიული პროექტები - შუახევჰესი დასრულდება და შევა ესპლუატაციაში; დაიწყება ნამახვანჰესის მშენებლობა; ნენსკრაჰესი კი  ძირითად სამშენებლო ეტაპზე გადავა", - აღნიშნა ეკონომიკის მინისტრმა.

მისივე თქმით, 2020 წელს ჯამში დაგეგმილია 13 ახალი ობიექტის, მათ შორის 8 ჰესის მშენებლობის დაწყება. ნათია თურნავას განცხადებით, ამ ჰესებს შორისაა ნამახვანჰესი, რომელიც არის უდიდესი პროექტი, 460 მეგავატი დადგმული სიმძლავრის, რომელშიც 800 მილიონამდე ინვესტიცია განხორციელდა და წლებია მიმდინარეობს ამ პროექტზე მუშაობა.

„ძალიან კომპლექსური პროექტია და მინდა აღვნიშნო, რომ რაც მთავარია, მიმდინარეობს საჯარო განხილვები ზედმეტი აჟიოტაჟის გარეშე, ძალიან აქტიურ ვითარებაში. მიხარია, რომ ჩვენ თანდათან, შევძელით, შევცვალეთ ტენდენცია და გვაქვს სერიოზული წინსვლა, რომ ზედმეტი ხმაურის და ზედმეტი აჟიოტაჟის გარეშე მოხდეს განხილვები", - განაცხადა ნათია თურნავამ.

რაც შეეხება „ხადორი სამს", ეს არის განსხვავებული შემთხვევა და როგორც პრემიერ-მინისტრმა განაცხადა, პროექტის მშენებლობა არ განახლდება,  ვიდრე არ იქნება უმაღლესი დონის კონსენსუსი მოსახლეობასთან.

ამასთან , მინისტრის თქმით, ყველა პროექტთან მიმართებაში, უფრო მეტი ყურადღება ექცევა მოსახლეობის სოციალურ მოთხოვნებს, გარემოზე ზემოქმედების შეფასებას, ასევე ინვესტორს უფრო მეტი პასუხისმგებლობის აღება უწევს.

„2018-2019 წელი იყო ამ გამოცდილების დაგროვების წელი. მე შემიძლია გითხრათ, რომ ჩვენ ეს გამოცდილება, ეს ცოდნა შევიძინეთ, როგორ გავუმკლავდეთ ამ გამოწვევებს და ეს ტენდენცია უკვე გადატეხილია არსებითად. აქედან გამომდინარე, იმის თქმა, რომ ენერგეტიკაში რაღაც დიდად გაპრობლემდა, არასწორი იქნება - მოვახერხეთ და გადავტეხეთ ტენდენცია. მე ვიტყოდი, რომ ამ სექტორში წინსვლა არის ენერგეტიკაში განხორციელებული რეფორმების შედეგი", - აღნიშნა ნათია თურნავამ.

ავტორი: NS (სტატია დაფინანსებულია),

სოციალური ქსელები

საშუალო სკოლის მოსწავლეების საპროტესტო აქციები საფრანგეთში: რატომ გადაიზრდება მშვიდობიანი საპროტესტო აქციები ძალადობაში?

ერდოღანის რეჟიმმა დააკავა ჟურნალისტი რომელმაც 2024 წელს საქართველოში ლგბტქ+ ორგანიზაციებზე სტატია დაწერა

რეპრესიული კანონების გამო, პანკისის ხეობაში საგანმანათლებლო სასწავლო ცენტრი დაიხურა სადაც ქართულ ენას გაძლიერებულად ასწავლიდნენ

ესტონეთის ახალი თავდაცვის დოქტრინა არმიას ავალდებულებს, რუსეთი საზღვარზე შეაჩეროს.