საქართველოს იუსტიციის სამინისტრო ყოფილ პატიმართა ბიზნესინიციატივების დაფინანსებას განაგრძობს. საგრანტო პროექტის ფარგლებში, დასავლეთ საქართველოს სხვადასხვა რეგიონში მცხოვრები 17 ყოფილი პატიმრის ბიზნესიდეა დაფინანსდა. პროექტის მიზანია სასჯელაღსრულების დაწესებულებებიდან გათავისუფლებული პირების რეაბილიტაციის ხელშეწყობა, მათი დაბრუნება საზოგადოების სრულუფლებიან წევრებად. მასში ჩართულნი არიან „ყოფილ პატიმართა რეაბილიტაციისა და რესოციალიზაციის პროგრამის“ ბენეფიციარები. ამ პროგრამას იუსტიციის სამინისტროს მმართველობის სფეროში მოქმედი სსიპ „დანაშაულის პრევენციის ცენტრი“ ახორციელებს.

რეგიონების მიხედვით გრანტი შემდეგნაირად გადანაწილდა: სამეგრელო − 10 გრანტი, აჭარა − 5 გრანტი, გურია და იმერეთი − თითო-თითო გრანტი. გრანტის მინიმალური თანხა ათას ლარს შეადგენს, ხოლო მაქსიმალური − 4.800 ლარს. გრანტის მიღებისას სავალდებულო იყო ყოფილი პატიმრის 25%-იანი თანამონაწილეობა მატერიალური ან არამატერიალური ქონებით.

საგრანტო პროექტით  სოფლის მეურნეობის, ვაჭრობის, წარმოებისა და მომსახურების დარგები დაფინანსდა. კერძოდ, ალექსი წეველიძეს ქობულეთის მუნიციპალიტეტის სოფელ დაგვაში  სოკოს მოყვანის მეურნეობა დაუფინანსდა; ბათუმელ მაია სამნიძეს, რომელიც თექაზე მუშაობს, ხელსაქმისთვის საჭირო ინვენტარი გადაეცემა; ბათუმელი დემურ დეკანაძე ხის საამქროს გაფართოებას შეძლებს; წალენჯიხელ ნანა კალანდიას ხელსაქმისთვის საჭირო საკერავი მანქანა გადაეცემა; ქობულეთის მუნიციპალიტეტის სოფელ ჭახათში ზურაბ ბაჟუნაიშვილი მესაქონლეობის მეურნეობის გაძლიერებას შეძლებს; ლანჩხუთელი ნ. წ. კი, მეფრინველეობის ფერმის ხელშეწყობისთვის შესაბამის ინვენტარს მიიღებს და სხვ. პროექტს დასავლეთ საქართველოში ახორციელებს ა(ა)იპ „გურიის ახალგაზრდული რესურსცენტრი“, რომელიც იუსტიციის სამინისტროს საგრანტო კონკურსის გამარჯვებულია.

აღსანიშნავია, რომ იუსტიციის სამინისტროს საგრანტო პროექტის ფარგლებში, ქვეყნის მასშტაბით, ამ 17 ახალი გრანტის გარდა,  43 ყოფილი პატიმრის 42 ბიზნესიდეა უკვე დაფინანსდა.  ეს პროექტები იმდენად წარმატებული აღმოჩნდა, რომ საგრანტო კონკურსის თანხა ყოველწლიურად იზრდება და უფრო მეტ ყოფილ პატიმარს შეუძლია საკუთარი ბიზნესიდეის განხორციელება. უახლოეს ხანში იუსტიციის სამინისტროს საგრანტო პროექტით აღმოსავლეთ საქართველოს სხვადასხვა რეგიონში მცხოვრები ყოფილი პატიმრების ბიზნესინიციატივები 72 ათას ლარამდე თანხით დაფინანსდება. პროექტის სახელწოდებაა „ყოფილ პატიმართა ბიზნესინიციატივების მხარდაჭერა“.

„ყოფილ პატიმართა რეაბილიტაციისა და რესოციალიზაციის პროგრამა“ 2012 წლის ბოლოს იუსტიციის მინისტრ თეა წულუკიანის ინიციატივით შეიქმნა. პროგრამის მიზანია სასჯელაღსრულების დაწესებულებებიდან გათავისუფლებული იმ პირების რეაბილიტაციის ხელშეწყობა, რომლებიც არ არიან პრობაციონერები და ამიტომ კიდევ მეტად სჭირდებათ სახელმწიფოს დახმარება. ყოფილ პატიმრებზე სახელმწიფო მზრუნველობა საზოგადოების განმეორებითი დანაშაულისაგან დაცვის წინაპირობაა. პროგრამა თბილისის გარდა მიმდინარეობს გორში, ქუთაისში, ზუგდიდსა და ბათუმში. 

(NS)

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

პუტინის უახლოეს თანამოაზრეებს შორის მისი ასაკის პირველი ადამიანი გარდაიცვალა - ივანოვი და საქართველო

საქართველოსთვის: კობახიძემ გაიფორმა თავი მოძალადე პრემიერად, ვერ გაექცევა პასუხისმგებლობას

პარლამენტის 2026 წლის საგაზაფხულო სესია ხელჩართული ჩხუბით დაიხურა

ექსპრეს ლომბარდი საკომუნიკაციო კამპანიას „ჰკითხე ექსპერტს“ აგრძელებს