„კოალიცია ცვლილებისთვის“ წევრები დღეს, 24 დეკემბერს თბილისის საკრებულოში სხდომას, რომელზეც დედაქალაქის მერი კახა კალაძე დასამტკიცებლად ბიუჯეტს წარადგენს, არ დაესწრებიან. ამის შესახებ კოალიციიდან თბილისის საკრებულოს წევრები ერთობლივ განცხადებას ავრცელებენ. 

როგორც სოციალურ ქსელში გამოქვეყნებულ განცხადებაშია ნათქვამი, კალაძე „არალეგიტიმური ხელისუფლების ერთ-ერთი მთავარი სპიკერი და ანტიკონსტიტუციური, ანტისახელმწიფოებრივი, ანტიდემოკრატიული ძალადობრივი ქმედებებისა და რეჟიმის გამმართლებელია“ და საკრებულოს წევრები სწორედ ამ მიზეზით, „მასთან ერთად საკითხების განხილვაში მონაწილეობას“ დაუშვებლად მიიჩნევენ.

„დღეს, 24 დეკემბერს, თბილისის მერი კახა კალაძე თბილისის საკრებულოში ბიუჯეტს  დასამტკიცებლად წარადგენს. ჩვენ, „კოალიცია ცვლილებისთვის“ წევრები აღნიშნულ სხდომას არ დავესწრებით. დარბაზში ისხდებიან მხოლოდ კალაძე და მისი ხელქვეითები.

კორუფციით სახელგანთქმულ თბილისის მერ კახა კალაძესთან ერთად, რომელიც ამავდროულად არის „ქართული ოცნების“ გენერალური მდივანი, შესაბამისად - არალეგიტიმური ხელისუფლების, ერთ-ერთი მთავარი სპიკერი და ანტიკონსტიტუციური, ანტისახელმწიფოებრივი, ანტიდემოკრატიული ძალადობრივი ქმედებებისა და რეჟიმის გამმართლებელი. დაუშვებლად მიგვაჩნია მასთან ერთად საკითხების განხილვაში მონაწილეობა.

ახლა, როცა არჩევნების გაყალბება, საარჩევნო  მანიპულაციები, ხმის ფარულობის დარღვევა, მოქალაქეთა დაშინება და ხელისუფლების მხრიდან სხვა უხეში ჩარევა არჩევნებში უკვე დადასტურდა ეუთო-ოდირის დასკვნითაც, მაგრამ ამ ფონზე ის კვლავ განაგრძობს მისთვის ჩვეულ რიტორიკას, გამოვრიცხავთ მასთან ნებისმიერ საკითხზე მსჯელობას და მასთან ყალბ დისკუსიაში შესვლა იქნება ყოველდღიურად ბრძოლაში მყოფი, გულანთებული, პატრიოტი თბილისელების ღალატი.  

ჩვენ ვაგრძელებთ პოლიტიკურ პროტესტს და ვიდგებით ჩვენი თანამემამულეების გვერდით, ვიდრე არ გათავისუფლდებიან რეჟიმის პატიმრები და არ ჩაინიშნება ახალი არჩევნები“,- აღნიშნულია ერთობლივ განცხადებაში, რომელსაც ხელს აწერენ თბილისის საკრებულოს წევრები: ცოტნე კობერიძე, ნინო კვიტაიშვილი, ანა გოგოლაძე, გიორგი ონიანი, თორნიკე ბიკაშვილი, მამუკა გუგეშაშვილი.

ავტორი: ექსპრესნიუსი,

სოციალური ქსელები

NYT: აშშ-სა და რუსეთს შორის უკრაინასთან დაკავშირებული მოლაპარაკებები ლუკოილის აქტივების მრავალმილიარდიანი გარიგების საგანია

საფრანგეთში სკოლებში გამართული საპროტესტო აქციები ქუჩის არეულობაში გადაიზარდა, ერთ კვირაში 5000-ზე მეტი ადამიანი დააკავეს

გორდულაძე პატიმრის განცხადებაზე გაუპატიურების შესახებ - ეს გავს მიზანმიმართულ კამპანიას პენიტენციური სისტემის რეპუტაციის, ქართული ოცნების და სახელმწიფო სისტემის დასაზიანებლად

ელენე ხოშტარია - სისტემა კლავს, სისტემა რყვნის, სისტემა უნდა დაემხოს