2024-10-19 22:18:19, 329 ნახვა

---

პაპუაშვილი - ევროპის მოთხოვნა სააკაშვილის გათავისუფლებაზე სახელების გადანაცვლების შედეგია, სადაც მწამებელი ევროპელია და ომი - მშვიდობაა.

ევროპა სხვისი პატივისცემაა და არა დაქვემდებარება, სიმართლეა და არა თვალთმაქცობა, ხელის შეშველებაა და არა ფეხის დადება, სულიერებაა და არა უღმერთობა,  – ამის შესახებ საქართველოს პარლამენტის თავმჯდომარემ, შალვა პაპუაშვილმა, ქუთაისში „ქართული ოცნების“ საარჩევნო კამპანიის ფარგლებში გამართულ ღონისძიებაზე სიტყვით გამოსვლისას განაცხადა.

როგორც მან აღნიშნა, ქართველმა ხალხმა კარგად იცის, რომ ქვეყნის მიმართ ფარისევლობა მაშინვე დასრულდება, როდესაც შინ და გარეთ, ყველა დაინახავს, სად დგას რეალურად ქართველი ხალხი.

„ქართველმა ხალხმა ისიც კარგად იცის, რომ ეს ფარისევლობა დროებითი მოვლენაა, ეს აბსურდიც მალე დასრულდება. დასრულდება იმავე წამს, როდესაც ყველა, შინ და გარეთ, დაინახავს, სად დგას ქართველი ხალხი. დაინახავს, რომ ეს არის შემდგარი სახელმწიფო, საკუთარი ღირსებით, საკუთარი იდენტობით, საკუთარი ინტერესებით.

17 მაისს, ოჯახის სიწმინდის დღეს, ქართველმა ხალხმა უკვე ჩაატარა ერთი სახალხო რეფერენდუმი, როდესაც ერი და ბერი, მილიონამდე საქართველოს მოქალაქე ჩვენი ქვეყნის ქალაქებში გამოვიდა და თქვა, რომ არ არსებობს მომავალი წარსულის გარეშე;რომ არ არსებობს საქართველო მისი რწმენის, მისი ტრადიციების, მისი თვითმყოფადობის გარეშე“, –  აღნიშნა შალვა პაპუაშვილმა.

პაპუაშვილმა წინა ხელისუფლებაზეც ფართოდ ისაუბრა.

"მოვლენისა თუ საგნის სწორი სახელდება უმნიშვნელოვანესი აქტია. სამწუხაროდ, დღეს ეს პროცესი უგულებელყოფილია. ყოველდღიურად შავისთვის თეთრის დარქმევის გაუგონარ თვალთმაქცობას ვადევნებთ თვალს. ვხედავთ, როგორ წარმოგვიჩენენ ომს - მშვიდობად, ცალ ფეხზე დგომას - თავისუფლებად, სიცრუეს - ჭეშმარიტებად, იუდას ამბორს - ქართველი ხალხის სიყვარულად.

ევროპარლამენტის მიერ მიღებული ბოლო რეზოლუცია, სადაც, წამების რეჟიმის შემქმნელი სააკაშვილის გათავისუფლებასთან ერთად, ახლა უკვე საჯაროდ მოგვთხოვეს რუსეთისთვის სანქციების დაწესება, რა არის, თუ არა ნიველირება ყველაფრის, რაც კი ქართველებს ევროპულ ფასეულობებად გვესახება. სწორედ ეს არის სახელების გადანაცვლების შედეგი, სადაც მწამებელი ევროპელია და ომი - მშვიდობაა.

 

და ამ ყველაფრის მაყურებელ ქართველ კაცს უნებურად წამოსცდება კითხვა: 

- სააკაშვილის უპირობო გათავისუფლებას რომ მოითხოვ, ესაა ევროპა?

- ადეიშვილს ბრიუსელის კაბინეტებში რომ უმასპინძლებ, ესაა ევროპა?

- კეზერაშვილს სასჯელისგან რომ შეიფარებ, ესაა ევროპა?

- თავად ნატოს ატომური ქოლგის ქვეშ მყოფი, საქართველოსგან რუსეთისთვის სანქციების დაწესებას რომ მოითხოვ, ესაა ევროპა? = განაცხადა პაპუაშვილმა.

 

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი