ნიკოლენკო - „ჰამასის“ თავდასხმის შედეგად უკრაინის 3 მოქალაქე დაიღუპა, 9 კი დაშავდა

2023-10-11 14:44:55, 1077 ნახვა

მსოფლიო

ისრაელში ტერორისტული დაჯგუფება „ჰამასის“ თავდასხმის შედეგად უკრაინის 3 მოქალაქე დაიღუპა, 9 კი დაშავდა,- აღნიშნულის შესახებ ინფორმაციას უკრაინის საგარეო საქმეთა სამინისტროს პრესსპიკერი ოლეგ ნიკოლენკო ავრცელებს.

ნიკოლენკოს თქმით, უკრაინელი დიპლომატები, ისრაელის სამართალდამცავებთან ერთად, 6 დაკარგული უკრაინელის ადგილსამყოფლის დადგენას ცდილობენ.

"სამწუხაროდ, დადასტურებულია ინფორმაცია კიდევ 1 უკრაინელის გარდაცვალების შესახებ. ამრიგად, უკრაინის მოქალაქეებს შორის დაღუპულთა საერთო რაოდენობა 3 ადამიანია. დაშავდა 9 ჩვენი მოქალაქე. კიდევ 6 უკრაინელი დაკარგულად ითვლება, რომლებსაც უკრაინელი დიპლომატები ისრაელის სამართალდამცავ ორგანოებთან ერთად ეძებენ.

ამჟამად 700-მდე უკრაინელი ვერ ტოვებს ისრაელს გაუქმებული ფრენების გამო. საგარეო საქმეთა სამინისტრო, პრეზიდენტის აპარატი და საელჩო ისრაელში 24 საათის განმავლობაში მუშაობენ ჩვენი მოქალაქეების დასაბრუნებლად",- წერს ნიკოლენკო.

ცნობისთვის, 7 ოქტომბერს ღაზას სექტორიდან ისრაელის სამხრეთით მოულოდნელი სარაკეტო და სახმელეთო იერიში წამოიწყეს.

თავდასხმაზე პასუხისმგებლობა ისლამისტურმა დაჯგუფება "ჰამასმა" აიღო და ისრაელის წინააღმდეგ ოპერაციის "ალ-აკსას წარღვნა" დაწყების შესახებ განაცხადა.

იერიშის საპასუხოდ ისრაელის თავდაცვის სამინისტრომ ოპერაცია, სახელწოდებით "რკინის ხმლები" დაიწყო.

8 ოქტომბერს ისრაელს ლიბანის ტერიტორიიდან ცეცხლი გაუხსნა "ჰეზბოლამაც", რასაც ქვეყანამ საარტილერიო იერიშით უპასუხა, რის შემდეგაც ისრაელის უსაფრთხოების კაბინეტმა საომარი მდგომარეობა ოფიციალურად გამოაცხადა და ღაზას სექტორზე არაერთი იერიში მიიტანა.

9 ოქტომბერს ქვეყნის თავდაცვის ძალებმა გაავრცელეს ინფორმაცია, რომ ისრაელმა ღაზას საზღვართან მდებარე ყველა ქალაქზე კონტროლი დაიბრუნა. ამასთან, მოგვიანებით ისრაელის თავდაცვის მინისტრმა, იოავ გალანტმა ღაზას სექტორის სრული ბლოკირების ბრძანება გასცა.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,