2023-08-01 11:17:31, 809 ნახვა

---

კობახიძე - ბათუმის აქცია ანტისახელმწიფოებრივი პოლიტიკური მიზნებით და გარე დავალებებით არის ნაკარნახევი

ყველა პოლიტიკური პროვოკაცია, მათ შორის გუშინ ბათუმში გამართული აქცია მხოლოდ ანტისახელმწიფოებრივი პოლიტიკური მიზნებით და გარე დავალებებით არის ნაკარნახევი,- ამის შესახებ "ქართული ოცნების" თავმჯდომარემ, ირაკლი კობახიძემ განაცხადა.

როგორც კობახიძემ ცოტა ხნის წინ გამართულ საგანგებო ბრიფინგზე აღნიშნა, ბათუმის პორტში სოჭიდან საკრუიზო გემის შემოსვლის გასაპროტესტებლად, ოპოზიციური პოლიტიკური პარტიების ნაწილის აქტივისტების გარდა, "არავინ მივიდა".

"გასაკვირი არაა, რომ ქვეყნის ეკონომიკური წინსვლის გამო, უკიდურესად შფოთავენ საქართველოს არაკეთილმოსურნეები, პირველ რიგში, კოლექტიური "ნაცმოძრაობა" და მისი უცხოელი პატრონები. სწორედ ამას უკავშირდება მათი ქსენოფობიური კამპანიები და ყველა პოლიტიკური პროვოკაცია, რომელიც საქართველოში ტურისტული ნაკადების ხელოვნურად შემცირებას ისახავს მიზნად.

ყველას კარგად გვახსოვს, ლარსის გამშვებ პუნქტზე პირადად როგორ ეგებებოდა რუს ტურისტებს კოლექტიური "ნაცმოძრაობის" ლიდერი მიხეილ სააკაშვილი რუსეთ-საქართველოს ომიდან სულ რაღაც 3 წლის თავზე; როგორ გააუქმა ცალმხრივად სავიზო რეჟიმი რუსეთის მოქალაქეებისთვის. ყველას გვახსოვს, როგორ საუბრობდნენ "ნაცმოძრაობის" სახეები - ელენე ხოშტარია, ზურა ჯაფარიძე, მიშა მშვილდაძე და სხვები იმავე პერიოდში რუსი ტურისტებისა და რუსეთთან ვაჭრობის მნიშვნელობაზე.

ამგვარი ფარისევლობა და ფსევდოანტირუსების ორმაგი სტანდარტი ცხადად მიანიშნებს, რომ ყველა პოლიტიკური პროვოკაცია, მათ შორის გუშინ ბათუმში გამართული აქცია მხოლოდ ანტისახელმწიფოებრივი პოლიტიკური მიზნებით და გარე დავალებებით არის ნაკარნახევი.

საზოგადოება ხედავს და აფასებს ყველაფერს და სწორედ ამის გამოა, რომ გუშინდელ აქცია კოლექტიური "ნაცმოძრაობის" - პარტია "ნაციონალური მოძრაობის", "ლელოს", გახარიას პარტიის, "გირჩისა" და "ევროპული საქართველოს" რამდენიმე ათეული აქტივისტის გარდა, არავინ მივიდა.

რაც შეეხება უშუალოდ კრუიზს, გემი დარეგისტრირებულია პალაუში და ცურავს პალაუს დროშის ქვეშ. მასზე რუსი ტურისტების გარდა იმყოფებოდნენ ტურისტები სხვა ქვეყნებიდანაც. გემი არ შესულა აფხაზეთში და შესაბამისად, გემსა და გემზე მყოფ პირებს არ დაურღვევიათ "ოკუპაციის შესახებ კანონი". ტურისტები საქართველოში ჩამოვიდნენ ერთი დღით ქალაქ ბათუმის მოსანახულებლად.

ვერავინ ახსნის, რა განსხვავებაა საქართველოში მანქანით შემოსულ და გემით შემოსულ რუს ტურისტებს შორის და შესაბამისად, რა ლოგიკური ახსნა ჰქონდა კოლექტიური "ნაცმოძრაობის" მიერ გუშინდელი აქციის მოწყობას. სინამდვილეში, ახსნა ერთადერთია - კოლექტიური "ნაცმოძრაობა" და მისი პატრონები ყველანაირად ცდილობენ პროვოკაციების მოწყობას, რისი მიზანიც ქვეყანაში თუნდაც მცირე არეულობის შემოტანა და ქვეყნის ეკონომიკური და პოლიტიკური ინტერესებისთვის ზიანის მიყენებაა.

აღსანიშნავია ისიც, რომ თითოეული კრუიზიდან საქართველოში რჩება 350 ათას ლარზე მეტი, საიდანაც, დაახლოებით, 100 ათასს შეადგენს ტურისტების დანახარჯები და დაახლოებით, 250 ათასს გემის მიერ პორტის მომსახურებისთვის გადახდილი თანხა. "ნაციონალებმა" იციან, რომ ამ შემოსავლების შემცირებით ისინი ქვეყნის ეკონომიკას ვერ დააქცევენ, მაგრამ მას თუნდაც მცირე ზიანს მიაყენებენ, რაც "ნაციონალებისა" და მათი პატრონების გადმოსახედიდან, უკვე საქმეა. ამასთან, მათი მთავარი მიზანი არა იმდენად საქართველოსთვის ეკონომიკური ზიანის მიყენება, რამდენადაც ქვეყანაში არეულობის შემოტანა და საქართველოსთვის პოლიტიკური რისკების შექმნაა. 

მადლობას ვუხდით თითოეულ პოლიციელს პროვოკაციაზე სათანადო რეაგირებისათვის. პროვოკაციის სიმძიმისა და შეურაცხყოფის არაერთი შემთხვევის მიუხედავად, პოლიციელებმა იმოქმედეს ადამიანის უფლებების უმაღლესი სტანდარტების შესაბამისად, რათა დაეცვათ საზოგადოებრივი წესრიგი და სახელმწიფოს ინტერესები",- განაცხადა კობახიძემ ბრიფინგზე.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი