აქციაში შინ ევროპისკენ 120 ათასიდან 135 ათასამდე ადამიანი მონაწილეობდა - ექსპრესნიუსმა დათვლის ორი მეთოდი გამოიყენა

2022-06-21 03:13:32, 1285 ნახვა

პოლიტიკა

20 ივნისს “შინ, ევროპისკენ” დემონსტრაციის მონაწილეები ფარავდნენ ოპერიდან – გალერეა თბილისამდე ტერიტორიას. ცენტრალურ ნაწილში საქართველოს პარლამენტის წინ, ასევე პირველი საშუალოს სკოლის და მოსწავლე ახალგაზრდობის სახლის წინ ხალხი იდგა მჭიდროდ, ამ შემთხვევაში "ექსპრესნიუსი" იყენებს ჯეიკობსის ფორმულას, მჭიდრო აქციის პირობებში კვადრატულ მეტრზე 4.5 ადამიანი ეტევა, ანუ 9 ადამიანი ორ კვადრატულზე.

ოპერის და ბალეტის თეატრიდან "გალერეა თბილისამდე" ტერიტორიის ფართობი, 40 000 კვ.მ.-ს შეადგენს.
ამ მეთოდის გამოყენებით აქციაზე "შინ ევროპისკენ" მინიმუმ 120 ათასი ადამიანი, მაქსიმუმ 135 ათასი ადამიანი გამოვიდა.
რას გულისხმობს ჯეიკობსის ფორმულა. - ამერიკელმა ჟურნალისტიკის პროფესორმა, ჰერბერტ ჯეიკობსმა 1960-იან წლებში შეიმუშავა ხალხმრავალ აქციებზე გამომსვლელთა დათვლის ხერხი.
ჯეიკობსმა ტერიტორია კვადრატულ მეტრებად დაყო და დაკვირდა, რამდენი ადამიანი ეტეოდა ამ კვადრატებში სხვადასხვა სიმჭიდროვის პირობებში. დაბალი სიმჭიდროვის პირობებში 1 ადამიანი 1 კვადრატულ მეტრს იკავებს. საშუალო სიმჭიდროვისას, 1 კვადრატულ მეტრზე 2.5 ადამიანია, ანუ 5 ადამიანს 2 კვადრატული მეტრი სჭირდება. მჭიდრო აქციის პირობებში კვადრატულ მეტრზე 4.5 ადამიანი ეტევა, ანუ 9 ადამიანი ორ კვადრატულზე.

მაგალითად, თუ ავიღებთ, რომ საქართველოს პარლამენტის წინ ტერიტორია დაახლოებით 2500 კვადრატული მეტრია, ყველაზე მჭიდრო განლაგების შემთხვევაში აქ დაახლოებით 11 250 ადამიანი დაეტევა (4.5x2500=11240). საერთაშორისო მედიაში ჯეიკობსის ფორმულის გამოყენება მიღებული პრაქტიკაა.

როგორც "ექსპრესნიუსმა დათვალა, რუსთაველის გამზირზე ოპერის თეატრის მიმდებარე ტერიტორიიდან გალერეა "თბილისამდე" MapChecking მონაცემებით, მინიმუმ 110 ათასი ადამიანი, მაქსიმუმ 125 ათასი აქციის მონაწილე იდგა, MapChecking ითვალისწინებს ხალხის სიხალვათეს, აქციის როგორც, ერთ, ასევე მეორე ბოლოში. დაბალი სიმჭიდროვის პირობებში 1 ადამიანი 1 კვადრატულ მეტრს იკავებს. საშუალო სიმჭიდროვისას, 1 კვადრატულ მეტრზე 2.5 ადამიანია, ანუ 5 ადამიანს 2 კვადრატული მეტრი სჭირდება. საბოლოო ჯამში, აქციის მონაწილეთა რაოდენობა, 110 ათასს ადამიანს აჭარბებს.
Mapchecking.com. ეს პლატფორმა ავტომატურად ითვლის ხალხის რაოდენობას მითითებული ტერიტორიისა და ხალხის სიმჭიდროვის მიხედვით.
საერთაშორისო კომპანია ალ ჯაზირამ დაწერა, რომ თბილისის ცენტრში აქციაზე "შინ ევროპისკენ" 100 ათასი ადამიანი შეიკრიბა. ტელეკომპანია ალ-ჯაზირა არ წერს რა მეთოდით დათვალა ხალხი.
“ნეტგაზეთის” მიერ დემონსტრანტების რაოდენობის მიახლოებითი დათვლით, მათი რაოდენობა მინიმუმ 120 ათასი იყო, მაქსიმუმ კი - 160 000.

გამოცემა წერს, რომ დემონსტრაციისა თუ სხვა ხალხმრავალი ღონისძიების მონაწილეთა რაოდენობის ზუსტად გამოთვლის მცდელობა ამაოა. შესაძლებელია მხოლოდ მიახლოებითი მასშტაბების დადგენა, რისთვისაც”ნეტგაზეთმა” გამოიყენა მეთოდი, რომელსაც მრავალი წელია, არაერთი საერთაშორისო მედიასაშუალება მიმართავს.